VIDEO: અષાઢી બીજ અને કચ્છી નવું વર્ષ, ભુજના હમીરસર તળાવ કિનારે જામશે 'કચ્છ કાર્નિવલ'નો રંગ!

કચ્છી નૂતન વર્ષ એટલે કે અષાઢી બીજના પવિત્ર પર્વ નિમિત્તે ભુજમાં ભવ્ય કચ્છ કાર્નિવલનું સુંદર આયોજન કરવામાં આવ્યું છે. કચ્છ-મોરબીના સાંસદ વિનોદભાઈ ચાવડાના માર્ગદર્શન અને આયોજન હેઠળ ભુજના ઐતિહાસિક હમીરસર તળાવના કાંઠે આ રંગારંગ કાર્યક્રમ યોજાશે. કચ્છની સમૃદ્ધ લોકસંસ્કૃતિ, કલા અને પરંપરાગત વારસાને ઉજાગર કરતા આ કાર્નિવલમાં વિવિધ સાંસ્કૃતિક કાર્યક્રમો અને લોકકલાની ૬૦થી વધુ કૃતિઓનું પ્રદર્શન રજૂ કરવામાં આવશે. આ મહોત્સવ દ્વારા સ્થાનિક કલાકારો અને યુવાનોને પોતાની સુષુપ્ત પ્રતિભા પ્રદર્શિત કરવાનો ઉત્તમ મંચ પૂરો પાડવામાં આવશે. અષાઢી બીજના પર્વને ઉત્સાહભેર ઉજવવાના આ અનોખા પ્રયાસમાં મોટી સંખ્યામાં સ્થાનિક નાગરિકો અને પ્રવાસીઓ ઉમટી પડશે, જે સૌ માટે આકર્ષણનું મુખ્ય કેન્દ્ર બની રહેશે.