VIDEO: અમિત ચાવડાએ જીતનો વિશ્વાસ કર્યો વ્યક્ત, મતદાન બાદ ભાજપ પર લગાવ્યા ધાકધમકીના ગંભીર આક્ષેપ

રાજ્યમાં 15 મહાનગરપાલિકા, 84 નગરપાલિકા, 34 જિલ્લા પંચાયત અને 260 તાલુકા પંચાયતની ચૂંટણી પ્રક્રિયા પૂર્ણ થયા બાદ હવે રાજકીય નિવેદનોનો દોર શરૂ થયો છે. કોંગ્રેસના પ્રદેશ પ્રમુખ અમિત ચાવડા દ્વારા સ્થાનિક સ્વરાજ્યની આ ચૂંટણીમાં ઉત્સાહપૂર્વક ભાગ લેવા બદલ તમામ મતદારોનો આભાર માનવામાં આવ્યો છે. ખાસ કરીને ગરમીના પ્રકોપ વચ્ચે પણ ગ્રામ્ય વિસ્તારોમાં થયેલું અંદાજે 60% અને શહેરી વિસ્તારોમાં થયેલું 50% મતદાન પરિવર્તનનો સંકેત હોવાનું મનાઈ રહ્યું છે.

ગંભીર આક્ષેપો અને લોકશાહીના મૂલ્યો

ઉમેદવારી ફોર્મ ભરવાની પ્રક્રિયાથી જ તંત્ર સામે લોકોમાં ભારે આક્રોશ જોવા મળ્યો હતો. અમિત ચાવડાએ આક્ષેપ કર્યો છે કે ભાજપને પોતાની હાર સ્પષ્ટ દેખાતી હોવાથી તેમણે પોલીસ તંત્રનો દુરુપયોગ કરી ઉમેદવારોના ફોર્મ પરત ખેંચાવવા દબાણ કર્યું હતું. વધુમાં, મતદાનની પૂર્વ સંધ્યાએ મતદારોને લોભાવવા માટે દારૂ અને લાલચો આપવાનો તેમજ ધાક-ધમકીનો ખેલ ખેલાયો હોવાના ગંભીર આરોપો લગાવવામાં આવ્યા છે.

ચૂંટણી દરમિયાનની ગેરરીતિઓ

મતદાનના દિવસે અનેક જગ્યાએથી વ્યાપક ફરિયાદો ઉઠી હતી. સરખેજ જેવા વિસ્તારોમાં કોંગ્રેસના ટેબલો તોડી પાડવામાં આવ્યા અને કાર્યકરોમાં ભયનો માહોલ ઉભો કરાયો હોવાનું અમિત ચાવડાએ જણાવ્યું છે. અનેક મતદારોએ ફરિયાદ કરી હતી કે મતદાર યાદીમાંથી તેમના નામ ગાયબ હતા. પોલીસની ભૂમિકા પર સવાલ ઉઠાવતા જણાવવામાં આવ્યું છે કે, પોલીસ ભાજપના એજન્ટ તરીકે કામ કરતી હોય તેવું દ્રશ્ય અનેક જગ્યાએ જોવા મળ્યું હતું.