'ઈરાનને પરમાણુ બોમ્બ નહીં બનાવવા દઈએ!' ચીનમાં પુતિન અને જિનપિંગની સામે જ ડોનાલ્ડ ટ્રમ્પનો સ્પષ્ટ સંદેશ, ઐતિહાસિક બેઠકમાં શું થઈ ચર્ચા?

વિશ્વની ત્રણ સૌથી મોટી મહાસત્તાઓ—અમેરિકા, ચીન અને રશિયાના સર્વોચ્ચ નેતાઓ ઈતિહાસમાં પહેલીવાર એકસાથે વાતચીતના ટેબલ પર આમને-સામને આવ્યા છે. અમેરિકી રાષ્ટ્રપતિ ડોનાલ્ડ ટ્રમ્પ, ચીનના રાષ્ટ્રપતિ શી જિનપિંગ અને રશિયાના રાષ્ટ્રપતિ વ્લાદિમીર પુતિને ચીનના ટેક હબ ગણાતા શેનઝેન શહેરમાં ઐતિહાસિક ત્રિપક્ષીય મુલાકાત કરી હતી. આ બેઠક દરમિયાન ડોનાલ્ડ ટ્રમ્પે પરમાણુ હથિયારો અને ઈરાનના મુદ્દે અત્યંત સ્પષ્ટ વલણ અપનાવ્યું હતું.
'અમે ઈરાનને પરમાણુ હથિયાર નહીં બનાવવા દઈએ'
ત્રણેય નેતાઓ વચ્ચેની વાતચીતમાં પરમાણુ હથિયારોના પ્રસારનો મુદ્દો મુખ્ય રહ્યો હતો. ટ્રમ્પે ઈરાનનો ઉલ્લેખ કરતા પુતિન અને જિનપિંગની સામે સ્પષ્ટ શબ્દોમાં કહ્યું કે, "અમે ઈરાનને પરમાણુ હથિયાર હાંસલ કરવા દઈશું નહીં." આ સાથે જ તેમણે પરમાણુ હથિયારોમાં ઘટાડો કરવા પર ભાર મૂકતા જણાવ્યું કે, અમેરિકા, રશિયા અને ચીન આજે એવી સ્થિતિમાં છે કે તેઓ વિશ્વમાં પરમાણુ હથિયારોની સંખ્યા ઘટાડવા અને તેના ઉપયોગનું જોખમ ઓછું કરવા પર ચર્ચા કરી શકે છે. તેમણે સ્વીકાર્યું કે એકવાર પરમાણુ હથિયાર મેળવી લીધા પછી કોઈ પણ દેશના નેતા માટે તેને છોડવા સરળ નથી હોતા, પરંતુ વૈશ્વિક સુરક્ષા માટે ત્રણેય દેશોનો સહયોગ અનિવાર્ય છે.
શી જિનપિંગે ગણાવી 'ઐતિહાસિક શરૂઆત'
ચીનની સરકારી સમાચાર એજન્સી શિન્હુઆ અનુસાર, રાષ્ટ્રપતિ શી જિનપિંગે આ મુલાકાતને એક મોટી શરૂઆત ગણાવી હતી. તેમણે કહ્યું કે, "આ પહેલીવાર છે જ્યારે ચીન, રશિયા અને અમેરિકાના રાષ્ટ્રાધ્યક્ષો વાતચીત માટે એકસાથે આવ્યા છે, અને તેનું ઐતિહાસિક મહત્વ છે."
મતભેદ ધરાવતા દેશો સાથે સંવાદ જરૂરી: ટ્રમ્પ
અમેરિકી રાષ્ટ્રપતિ ડોનાલ્ડ ટ્રમ્પે આ બેઠકને અમેરિકાની વિદેશ નીતિમાં એક નવા અભિગમની શરૂઆત ગણાવી હતી. તેમણે કહ્યું કે, "અગાઉ ઘણા નેતાઓ એવા દેશો સાથે વાતચીત કરવાનું ટાળતા હતા જેમની સાથે તેમના મતભેદો હતા. પરંતુ મારો અભિગમ અલગ છે. વિશ્વના ત્રણ સૌથી મોટા દેશોના વડા હોવાના નાતે આપણી જવાબદારી છે કે આપણે ખુલ્લો, સન્માનજનક અને સકારાત્મક સંવાદ જાળવી રાખીએ, કારણ કે તેની અસર માત્ર આપણા દેશો પર જ નહીં પરંતુ સમગ્ર વિશ્વ પર પડે છે."










