VIDEO: મધ્ય પૂર્વમાં જંગ વધુ ભડકશે! ટ્રમ્પને ઈરાન પર હુમલો કરતા રોકવાનો પ્રસ્તાવ US સંસદમાં ફગાવી દેવાયો
છેલ્લું અપડેટ : 06 Mar 2026
ઈરાન અને ઈઝરાયેલ-અમેરિકા વચ્ચેનું યુદ્ધ સતત ભયાનક બની રહ્યું છે. આ દરમિયાન ઈરાન પરના હુમલા રોકવા માટે અમેરિકી સંસદમાં એક પ્રસ્તાવ લાવવામાં આવ્યો હતો. વિપક્ષી સાંસદોએ 'વોર પાવર રિઝોલ્યુશન' (War Powers Resolution) લાવવાની માંગ કરી હતી, પરંતુ સંસદમાં આ પ્રસ્તાવ 212 વિરુદ્ધ 219 મતોથી ફગાવી દેવામાં આવ્યો છે. આનો અર્થ એ છે કે હવે રાષ્ટ્રપતિ ડોનાલ્ડ ટ્રમ્પ પર તાત્કાલિક સૈન્ય કાર્યવાહી રોકવાનું કોઈ દબાણ રહેશે નહીં.
જણાવી દઈએ કે 'વોર પાવર રિઝોલ્યુશન' અમેરિકાનો એક કાયદો છે, જે 1973માં પસાર કરવામાં આવ્યો હતો. તેનો હેતુ એ નક્કી કરવાનો છે કે રાષ્ટ્રપતિ અને સંસદ (કોંગ્રેસ) વચ્ચે યુદ્ધ છેડવાની સત્તાની વહેંચણી કેવી રીતે થશે.
ઈરાન પર હુમલા રોકવાનો પ્રસ્તાવ નામંજૂર
અમેરિકી પ્રતિનિધિ સભાએ (House of Representatives) રાષ્ટ્રપતિ ટ્રમ્પના ઈરાન પરના હુમલા રોકવાના પ્રસ્તાવને ફગાવી દીધો છે. આ પ્રસ્તાવની તરફેણમાં 212 મત પડ્યા, જ્યારે 219 સાંસદોએ તેની વિરુદ્ધમાં મતદાન કર્યું. જો આ પ્રસ્તાવ પસાર થઈ ગયો હોત, તો ટ્રમ્પ વહીવટીતંત્રે ઈરાન વિરુદ્ધના હુમલા ત્યાં સુધી રોકવા પડ્યા હોત જ્યાં સુધી કોંગ્રેસ તેની મંજૂરી ન આપે. આ અગાઉ સેનેટમાં પણ આવો જ પ્રસ્તાવ 47-53 મતોથી ફગાવી દેવામાં આવ્યો હતો.
ટ્રમ્પની વ્યૂહરચના અંગે કોંગ્રેસમાં મતભેદ
આ મતદાનથી સ્પષ્ટ થાય છે કે અમેરિકામાં ઈરાન પરના હુમલાને લઈને સાંસદો વચ્ચે ઊંડા મતભેદ છે. ઘણા સાંસદોનું કહેવું છે કે બંધારણ મુજબ યુદ્ધનો નિર્ણય લેવાનો અધિકાર માત્ર કોંગ્રેસ પાસે છે, રાષ્ટ્રપતિ પાસે નહીં. વિદેશી બાબતોની સમિતિના વરિષ્ઠ ડેમોક્રેટ સાંસદ ગ્રેગરી મીક્સે કહ્યું કે, "રાષ્ટ્રપતિ ટ્રમ્પ કોઈ રાજા નથી. જો તેમને લાગે છે કે ઈરાન સાથેનું યુદ્ધ અમેરિકાના હિતમાં છે, તો તેમણે પહેલા કોંગ્રેસ સમક્ષ આવીને તે સાબિત કરવું જોઈએ."
ટ્રમ્પને મળ્યો રિપબ્લિકન પાર્ટીનો સાથ
અમેરિકાની સત્તાધારી રિપબ્લિકન પાર્ટીના મોટાભાગના સાંસદો ટ્રમ્પના નિર્ણયની સાથે રહ્યા છે. તેમનું માનવું છે કે ઈરાન લાંબા સમયથી પશ્ચિમી દેશો માટે ખતરો બનેલું હતું અને આ સૈન્ય કાર્યવાહી તેને ખતમ કરવાનો પ્રયાસ છે. રિપબ્લિકન સાંસદ બ્રાયન મસ્ટે કહ્યું કે, રાષ્ટ્રપતિ ટ્રમ્પ અમેરિકાને તાત્કાલિક ખતરાથી બચાવવાનો પ્રયાસ કરી રહ્યા છે. તેમનું કહેવું છે કે યુદ્ધ રોકવાનો પ્રસ્તાવ એ રાષ્ટ્રપતિને 'કંઈ ન કરવા' માટે કહેવા સમાન હતો.
