VIDEO: ઈરાનને ઘૂંટણિયે લાવવા ટ્રમ્પનો માસ્ટર પ્લાન, અમેરિકી સેનાને હુમલાનો આપ્યો આદેશ
છેલ્લું અપડેટ : 01 Aug 2026
અમેરિકા અને ઈરાન વચ્ચેનો તણાવ સતત વધી રહ્યો છે અને યુદ્ધ સતત વકરતું જ જઇ રહ્યું છે. અમેરિકી પ્રમુખ ડોનાલ્ડ ટ્રમ્પ દ્વારા સેનાને આ સપ્તાહાંત સુધીમાં ઈરાન પર નવો હુમલો કરવાનો નિર્દેશ આપવામાં આવ્યો છે. અહેવાલો મુજબ, આ પ્રસ્તાવિત સૈન્ય કાર્યવાહીનો મુખ્ય હેતુ તેહરાનને ઘૂંટણ ટેકવવા મજબૂર કરવાનો છે.
ઊર્જા કેન્દ્રો અને રિફાઇનરીઓ પર હુમલાની આશંકા
આ ઘટનાક્રમ ટ્રમ્પના એ નિવેદનો પછી સામે આવ્યો છે. જેમાં તેમણે તેહરાન સાથે ચાલી રહેલી કૂટનીતિક વાતચીતને લઈને અનિશ્ચિતતા વ્યક્ત કરી હતી. 'વોલ સ્ટ્રીટ જર્નલ'ના અહેવાલ મુજબ, જોર્ડનમાં અમેરિકી સૈન્ય ઠેકાણા પર થયેલા હુમલા બાદ ભારે સૈન્ય જવાબી કાર્યવાહીની ચેતવણી આપવામાં આવી હતી.
ઇરાન પર જોરદાર હુમલો કરીશું
શુક્રવારે મેરીલેન્ડમાં કેમ્પ ડેવિડ ખાતે કેબિનેટની બેઠક દરમિયાન ટ્રમ્પે જણાવ્યું હતું કે, "આપણે ઇરાન પર ખૂબ જોરદાર હુમલો કરીશું." બીજી તરફ સીબીએસ (CBS) ના રિપોર્ટ અનુસાર, વોશિંગ્ટન ઈરાનના ઊર્જા કેન્દ્રો જેમ કે પાવર પ્લાન્ટ્સ અને પેટ્રોલિયમ રિફાઇનરીઓ પર સંભવિત હુમલાઓ અંગે વિચારણા કરી રહ્યું છે.
માનવાધિકાર સંસ્થાઓની ચિંતા અને બજાર પર અસર
માનવાધિકારની ભલામણ કરતી સંસ્થાઓએ ચેતવણી આપી છે કે સામાન્ય નાગરિકોના ઉપયોગ વાળી સુવિધાઓને જાણી જોઈને નિશાન બનાવવું એ યુદ્ધ અપરાધ બની શકે છે. આ રિપોર્ટ્સ સામે આવ્યા બાદ શુક્રવારે બપોરે ટ્રેડિંગમાં વેસ્ટ ટેક્સાસ ઇન્ટરમીડિયેટ (WTI) ક્રૂડ ઓઈલની કિંમતો 86 ડૉલર પ્રતિ બેરલથી ઉપર પહોંચી ગઈ છે.
વ્હાઇટ હાઉસની પ્રતિક્રિયા
વ્હાઇટ હાઉસના પ્રેસ સેક્રેટરી કેરોલિન લેવિટે પ્રતિક્રિયા આપતા જણાવ્યું કે, "ઈરાને ત્યાં સુધી કિંમત ચૂકવવી પડશે જ્યાં સુધી તેઓ પ્રમુખ ટ્રમ્પના જણાવ્યા મુજબ વાતચીત માટે તૈયાર નથી થઈ જતા." ઉલ્લેખનીય છે કે 28 ફેબ્રુઆરીના રોજ અમેરિકા અને ઇઝરાયેલના સંયુક્ત સૈન્ય હુમલાઓ બાદ સમગ્ર ક્ષેત્રમાં અસ્થિરતા ફેલાઈ ગઈ છે અને તેહરાન દ્વારા હોર્મુઝની ખાડી બંધ કરી દેવાતા શિપમેન્ટને ભારે મુશ્કેલીઓનો સામનો કરવો પડી રહ્યો છે.
