VIDEO: ટ્રમ્પની ઈરાનને આકરી ચેતવણી! સતત 10માં દિવસે પણ અમેરિકાની એરસ્ટ્રાઈક, ક્રૂડના ભાવ 88 ડોલરને પાર
છેલ્લું અપડેટ : 21 Jul 2026
અમેરિકા અને ઈરાન વચ્ચે તણાવ ચરમસીમા પર પહોંચી ગયો છે. હોર્મુઝ સ્ટ્રેટ ફરીથી ખોલાવવાના હેતુથી અમેરિકન સેનાએ ઈરાન પર સતત 10મી રાત્રે પણ જોરદાર હવાઈ હુમલા ચાલુ રાખ્યા છે. અમેરિકન પ્રમુખ ડોનાલ્ડ ટ્રમ્પે પણ સોશિયલ મીડિયા પર કડક શબ્દોમાં ચેતવણી આપતા કહ્યું છે કે, 'જ્યારે પણ ઈરાન કોઈ અમેરિકન સૈનિકની હત્યા કરશે, ત્યારે તેણે તેની ઘણી મોટી કિંમત ચૂકવવી પડશે!'
બીજી તરફ ઈરાની મીડિયાના અહેવાલો અનુસાર, અમેરિકન હુમલામાં અત્યાર સુધીમાં 50થી વધુ લોકોના મોત થયા છે અને 517 લોકો ઘાયલ થયા છે, જ્યારે 28 ફેબ્રુઆરીથી શરૂ થયેલા યુદ્ધમાં અત્યાર સુધીમાં 17 અમેરિકન સૈનિકોએ જીવ ગુમાવ્યો છે.
યુએસ સેનાના જવાબી હુમલા અને ઈરાનની સૈન્ય ક્ષમતા પર ફટકો
અમેરિકન સેન્ટ્રલ કમાન્ડે સોશિયલ મીડિયા પર માહિતી આપતા જણાવ્યું હતું કે, 'આ હુમલાઓનો મુખ્ય હેતુ હોર્મુઝ સ્ટ્રેટમાં વ્યાપારી જહાજો પર હુમલો કરવા માટે વપરાતી ઈરાની સૈન્ય ક્ષમતાઓને નષ્ટ કરવાનો છે. અમેરિકન હવાઈ હુમલામાં ઈરાની મિલિટ્રી કમાન્ડ સેન્ટર્સ, એર ડિફેન્સ, કોસ્ટલ સર્વેલન્સ સાઇટ્સ, મિસાઇલ અને ડ્રોન લોન્ચ સાઇટ્સ તેમજ કમ્યુનિકેશન નેટવર્કને નિશાન બનાવવામાં આવ્યા છે.'
ઈરાની સરકારી ન્યૂઝ એજન્સી IRNA અનુસાર, તબરીઝ શહેર અને બંદર ઈમામ ખોમેની, સિરિક, જસ્ક, કોનારાક અને ચાબહાર જેવા દરિયાકાંઠાના વિસ્તારો પર મોટા પ્રમાણમાં બોમ્બમારો કરવામાં આવ્યો છે.
મધ્ય પૂર્વના સહયોગી દેશો પર ઈરાની હુમલા
અમેરિકા સાથેની અથડામણ વચ્ચે ઈરાને મધ્ય પૂર્વમાં અમેરિકાના સહયોગી દેશો કુવૈત, જૉર્ડન અને બહેરીનને પણ નિશાન બનાવ્યા છે. જૉર્ડનમાં થયેલા હુમલામાં અમેરિકાના બે સૈનિકો માર્યા ગયા છે અને એક ગુમ થયો છે, જ્યારે ઈરાનના એક ડ્રોન ધમાકામાં વધુ એક સૈનિકનું મોત થયું છે. જવાબમાં જૉર્ડને ત્રણ ઈરાની મિસાઈલોને હવામાં જ તોડી પાડી હતી. આ ઉપરાંત બહેરીનના વિદેશ મંત્રાલયે દેશની એર ટ્રાફિક સિસ્ટમને નિશાન બનાવીને કરવામાં આવેલા ઈરાની ડ્રોન હુમલાની સખત શબ્દોમાં નિંદા કરી છે.
હોર્મુઝ અને રાતા સમુદ્રમાં ઓઇલના ટેન્કરો પર સંકટ
હોર્મુઝ સ્ટ્રેટમાંથી પસાર થતો વૈશ્વિક ઊર્જા પુરવઠો આ યુદ્ધના કારણે સંપૂર્ણપણે ઠપ્પ થઈ ગયો છે. તાજેતરમાં જ યુનાઇટેડ કિંગડમ મરીન ટ્રેડ ઓપરેશન્સ (UKMTO) અનુસાર, સંયુક્ત આરબ એમિરેટ્સ (UAE) અને ઓમાનના દરિયાકાંઠા નજીક ટેન્કરો પર હુમલા બાદ જહાજોમાં આગ લાગવાની અને ક્રૂ મેમ્બર્સ દ્વારા જહાજ છોડવાની ઘટનાઓ સામે આવી છે. આ સંકટ વચ્ચે યમનના હુથી બળવાખોરોએ પણ સાઉદી અરેબિયા સામે રાતા સમુદ્રમાં દરિયાઈ નાકાબંધીની જાહેરાત કરી દીધી છે, જેનાથી વૈશ્વિક ઓઇલ બજાર પર વધુ એક મોટું સંકટ ઊભું થયું છે.
ક્રૂડ ઓઈલના ભાવમાં ઉછાળો અને ડિપ્લોમસીની આશા
આ વધતા તણાવ અને દરિયાઈ માર્ગો બંધ થવાને કારણે આંતરરાષ્ટ્રીય બજારમાં ઓઇલની કિંમતોમાં ભારે ઉછાળો આવ્યો છે. બ્રેન્ટ ક્રૂડ પ્રતિ બેરલ $88ને પાર પહોંચી ગયું છે, જ્યારે અમેરિકામાં પણ પેટ્રોલના ભાવ વધવાથી લોકોના ખિસ્સા પર બોજ વધી રહ્યો છે. આ ભારે તણાવ વચ્ચે કૂટનીતિક સ્તરે શાંતિની થોડી આશા પણ જાગી છે. યુદ્ધવિરામ પુનઃસ્થાપિત કરવાના પ્રયાસરૂપે ઈરાનના આંતરિક મંત્રી પાકિસ્તાનની મુલાકાતે પહોંચ્યા છે, જ્યાં તેઓ બંને દેશો વચ્ચે મધ્યસ્થી કરાવવા માટે બેઠકો કરી રહ્યા છે. અમેરિકાએ પણ સ્પષ્ટ કર્યું છે કે તેઓ વાટાઘાટો માટે તૈયાર છે, પરંતુ ઈરાને તેના માટે ગંભીરતા દર્શાવવી પડશે.
