VIDEO: ચીને પાકિસ્તાન મારફતે ઈરાનને આપ્યા 400 રોકેટ લોંચર? ડોનાલ્ડ ટ્રમ્પે કહ્યું- 'આ ચોંકાવનારી બાબત'
છેલ્લું અપડેટ : 30 Jul 2026
વોશિંગ્ટન: મિડલ ઈસ્ટમાં (Middle East) ઈરાન અને અમેરિકા વચ્ચે ચાલી રહેલો સંઘર્ષ વધુ તીવ્ર બની રહ્યો છે. બંને દેશો સતત એકબીજાના ઠેકાણાઓ પર હુમલા કરી રહ્યા છે. આ દરમિયાન એક એવો અહેવાલ સામે આવ્યો છે જેણે સમગ્ર વિશ્વને ચોંકાવી દીધું છે. એવો દાવો કરવામાં આવી રહ્યો છે કે ચીન આ યુદ્ધમાં ઈરાનની મદદ કરી રહ્યું છે અને તેણે પાકિસ્તાનના રસ્તે ઈરાનને 400 રોકેટ લોંચરની (Rocket Launchers) સપ્લાય કરી છે. આ અહેવાલો પર હવે અમેરિકી રાષ્ટ્રપતિ ડોનાલ્ડ ટ્રમ્પનું (Donald Trump) નિવેદન સામે આવ્યું છે, જેમાં તેમણે આ બાબતને ભારે ચોંકાવનારી ગણાવી છે.
ડોનાલ્ડ ટ્રમ્પે શું કહ્યું?
પાકિસ્તાન મારફતે ચીન દ્વારા ઈરાનને શસ્ત્રો પહોંચાડવાના અહેવાલો પર વ્હાઈટ હાઉસ ખાતેથી (White House) વાતચિત કરતા ડોનાલ્ડ ટ્રમ્પે કહ્યું, "આ ખૂબ જ ચોંકાવનારી બાબત હશે. આવી ઘટનાઓ બનતી રહે છે. ચીની રાષ્ટ્રપતિ શી જિનપિંગે (Xi Jinping) મને ખૂબ મજબૂતીથી કહ્યું હતું કે તેઓ આ બાબતમાં સામેલ થશે નહીં. જોકે, તેઓ જાણે છે કે જો આવું થશે તો મને ભારે નિરાશા થશે."
આ અગાઉ ટ્રમ્પે ઈરાન સામે સખત જવાબી કાર્યવાહી કરવાની કસમ ખાતા ચેતવણી આપી હતી કે અમેરિકા ઈરાનને "ખરાબ રીતે કચડી નાખશે" (Crush) અને તેનો કડક જવાબ આપશે.
AI ની રેસમાં અમે ચીનથી ઘણા આગળ: ટ્રમ્પ
આ સાથે જ આર્ટિફિશિયલ ઈન્ટેલિજન્સ અર્થાત એઆઈ (Artificial Intelligence - AI) ની વૈશ્વિક સ્પર્ધા અંગે પણ ટ્રમ્પે ચીન પર નિશાન સાધ્યું હતું. તેમણે જણાવ્યું હતું કે, "એઆઈ ક્ષેત્રે અમે ચીનથી ઘણા આગળ છીએ. ચીનમાં આની પર કોઈ ખાસ નિયંત્રણ (Control) નથી અને ત્યાં કોઈ પણ જાતના રોકટોક વગર કામ થઈ રહ્યું છે. તેથી અમારે બંને રીતે સાવચેત રહેવું પડશે."
ટ્રમ્પે વધુમાં ઉમેર્યું હતું કે, "અમે એઆઈ ક્ષેત્રે એવા કોઈ પ્રતિબંધો લગાવવા નથી માંગતા જેનાથી અમે અચાનક ચીનથી પાછળ રહી જઈએ. જે પણ દેશ એઆઈની આ રેસ જીતશે, તે જ વૈશ્વિક સ્તરે વર્ચસ્વ મેળવશે. આ મામલો અત્યંત મહત્વપૂર્ણ છે અને હું શ્રેષ્ઠ કામગીરીને રોકવા નથી માંગતો."
