PM મોદી જિનપિંગ અને મ્યાનમારના લશ્કરી વડાને મળશે, ટ્રમ્પના ટેરિફ વચ્ચે વિશ્વની નજર SCO સમિટ પર
છેલ્લું અપડેટ : 31 Aug 2025
સોર્સ : GSTV
ચીનના બે દિવસના પ્રવાસ દરમિયાન, પ્રધાનમંત્રી નરેન્દ્ર મોદી 31 ઓગસ્ટ અને 1 સપ્ટેમ્બરના રોજ તિયાનજિનમાં યોજાનાર શાંઘાઈ સહયોગ સંગઠન (SCO) ના વાર્ષિક શિખર સંમેલનમાં હાજરી આપશે. જાપાનની બે દિવસીય મુલાકાત પૂર્ણ કર્યા પછી, PM મોદી સીધા ચીન પહોંચ્યા છે.
નરેન્દ્ર મોદીની તિયાનજિનની મુલાકાતનું ઉષ્માભર્યું સ્વાગત
ચીનના રાજદૂત શુ ફેઇહોંગે પ્રધાનમંત્રી નરેન્દ્ર મોદીની તિયાનજિનની મુલાકાતનું ઉષ્માભર્યું સ્વાગત કર્યું છે. તેમણે કહ્યું કે પીએમ મોદીની આ મુલાકાત બંને દેશો વચ્ચેના સંબંધોમાં નવી ઉર્જા અને ગતિ લાવશે. શુ ફેઇહોંગે સોશિયલ મીડિયા પ્લેટફોર્મ પર લખ્યું 'ચીનમાં પ્રધાનમંત્રી મોદીનું સ્વાગત છે. અમને વિશ્વાસ છે કે આ મુલાકાત ચીન-ભારત સંબંધોને નવી દિશા અને નવી ગતિ આપશે.'
