સીરિયામાં  ISISનો મોટો હુમલો, ઘટનામાં 2 અમેરિકન જવાન સહિત એક નાગરિકનું મોત

સીરિયામાં ઇસ્લામિક સ્ટેટ જૂથ દ્વારા કરવામાં આવેલા હુમલામાં બે અમેરિકન સૈનિક અને એક અમેરિકન નાગરિકના મોત નિપજ્યા અને ત્રણ ઘાયલ થયા હતા. અમેરિકન સેન્ટ્રલ કમાન્ડે આ વાતની પુષ્ટિ કરી હતી. સંરક્ષણ અધિકારીઓના જણાવ્યા અનુસાર, સીરિયાના પ્રમુખ બશર અલ-અસદને પદભ્રષ્ટ કર્યાના એક વર્ષ પછી, સીરિયામાં અમેરિકન સૈનિકો પરનો આ પહેલો હુમલો છે.

આ પણ વાંચો :

સીરિયાના પ્રમુખે 60 વર્ષમાં પહેલીવાર UNમાં કર્યું સંબોધન, દેશમાં શેરીએ શેરીએ સ્ક્રીનો લગાવી

UN સિક્યોરિટી કાઉન્સિલે હટાવ્યા સીરિયાના પ્રમુખ પરના પ્રતિબંધો, ટૂંક સમયમાં લઈ શકે છે ટ્રમ્પની મુલાકાત

સીરિયાના સુરક્ષા દળોના કર્મચારીઓ પણ ઘાયલ

સેન્ટ્રલ કમાન્ડે સોશિયલ મીડિયા પર જણાવ્યું હતું કે, મૃતક સૈનિકોની ઓળખ 24 કલાક સુધી જાહેર કરવામાં આવશે નહીં જેથી તેમના પરિવારોને પહેલા જાણ કરી શકાય. આ યુદ્ધ વિભાગની નીતિ અનુસાર છે.

સીરિયાની સરકારી મીડિયાના અહેવાલ અનુસાર, અમેરિકન સૈનિકોની મુલાકાત દરમિયાન મધ્ય સીરિયાના એક ઐતિહાસિક શહેરમાં ગોળીબાર થયો હતો, જેમાં ઘણા લોકો ઘાયલ થયા હતા. પાલમિરા નજીક થયેલા ગોળીબારમાં સીરિયન સુરક્ષા દળોના બે સભ્યો અને અનેક અમેરિકન સૈનિકો ઘાયલ થયા હતા.

હુમલાખોર ઠાર

સ્થાનિક અહેવાલોમાં કહેવામાં આવ્યું છે કે, હુમલાખોર માર્યો ગયો છે. પરંતુ, વધુ વિગતો આપવામાં આવી નથી. એક અમેરિકન સંરક્ષણ અધિકારીએ નામ ન આપવાની શરતે જણાવ્યું હતું કે, વોશિંગ્ટન આ અહેવાલોથી વાકેફ છે પરંતુ હાલમાં તેમની પાસે જાહેર કરવા માટે કોઈ નક્કર માહિતી નથી.

બ્રિટન સ્થિત સીરિયન ઓબ્ઝર્વેટરી ફોર હ્યુમન રાઇટ્સે જણાવ્યું હતું કે, ઓછામાં ઓછા ત્રણ સીરિયન સુરક્ષા કર્મચારીઓ અને ઘણા અમેરિકનો ઘાયલ થયા હતા. તેણે એવો પણ દાવો કર્યો હતો કે હુમલાખોર સીરિયન સુરક્ષા દળોનો સભ્ય હતો.

સ્લીપર સેલનું જોખમ

ઇસ્લામિક સ્ટેટ સામે ચાલી રહેલા અભિયાનના ભાગ રૂપે અમેરિકાએ પૂર્વ સીરિયામાં ઘણા સો સૈનિકો તૈનાત કર્યા છે. 2019માં સીરિયામાં આતંકવાદી સંગઠનનો પ્રાદેશિક રીતે પરાજય થયો હોવા છતાં, તેના સ્લીપર સેલ હુમલાઓ ચાલુ રાખે છે. સંયુક્ત રાષ્ટ્રનો અંદાજ છે કે, સીરિયા અને ઇરાકમાં 5,000થી 7,000 ઇસ્લામિક સ્ટેટ લડવૈયાઓ હજુ પણ છે.