ઇઝરાયેલ-લેબનોન યુદ્ધવિરામ પહેલા મોટી ઘટના, હિજબુલ્લાહ કમાન્ડરની ગોળી મારીને હત્યા

લેબનોનના અલ-અખબારના અહેવાલ મુજબ હિજબુલ્લાહ કમાન્ડર મોહમ્મદ હમ્માદીને તેના ઘરની સામે જ ગોળી મારીને હત્યા કરવામાં આવી હતી. હુમલાખોરો બે વાહનોમાં આવ્યા હતા અને હમ્માદી પર અંધાધૂંધ ગોળીબાર કર્યો હતો. આ હત્યા પાછળનું કારણ શું છે અને તેની પાછળ કોણ છે તે સ્પષ્ટ થયું નથી. આ હત્યા એવા સમયે થઈ છે જ્યારે લેબનોનમાં હિજબુલ્લાહ અને ઇઝરાયેલ વચ્ચે યુદ્ધવિરામની સમયમર્યાદા નજીક આવી રહી છે.

સુરક્ષા દળોએ વિસ્તારને ઘેરી લીધો

મોહમ્મદ હમ્માદીની હત્યા બાદ લેબનીઝ સૈન્ય એકમોએ મછઘરાને ઘેરી લીધું છે. સુરક્ષા દળોએ પશ્ચિમી બેકાના શહેરોમાં મોબાઇલ ચેકપોઇન્ટ્સ ગોઠવી અને હુમલાખોરો માટે મોટા પાયે શોધખોળ અભિયાન શરૂ કર્યું. હિજબુલ્લાહે હજુ સુધી આ હત્યા અંગે કોઈ સત્તાવાર નિવેદન બહાર પાડ્યું નથી.

આ ઘટનાક્રમ વચ્ચે, ઉત્તરી લેબનોનમાં યુદ્ધવિરામના પ્રથમ તબક્કાના 60 દિવસ રવિવારે પૂરા થવા જઈ રહ્યા છે. કરાર હેઠળ, ઇઝરાયલી સેના દક્ષિણ લેબનોનમાંથી તેના સૈનિકો પાછા ખેંચી લેશે અને તેમને સરહદની ઇઝરાયેલી બાજુએ તૈનાત કરશે. એક વરિષ્ઠ પશ્ચિમી રાજદ્વારીએ કહ્યું છે કે સમયરેખા મહત્ત્વપૂર્ણ નથી. અમને આશા છે કે ઇઝરાયેલ જ્યાં હાજર છે ત્યાંથી તેના સૈનિકો પાછા ખેંચવાનું ચાલુ રાખશે.

દરમિયાન, નવી સીરિયન સરકારે લેબનોન સાથેની તેની વહેંચાયેલ સરહદ પર સ્થિરતા જાળવવાની ઇચ્છા વ્યક્ત કરી છે. સીરિયન સરકારે આંતરરાષ્ટ્રીય સમુદાય અને ઇઝરાયલને સંદેશ આપ્યો છે કે તે ઈરાન અને હિજબુલ્લાહને સીરિયાથી લેબનોનમાં શસ્ત્રોનો પુરવઠો ફરી શરૂ કરતા અટકાવશે. આ લેબનોન માટે મહત્ત્વપૂર્ણ છે.