બ્રાઝીલ/ યુનિવર્સિટીના વિદ્યાર્થીઓને લઈ જતી બસ ટ્રક સાથે અથડાઈ, 12 વિદ્યાર્થીઓના મોત, 19 ઘાયલ

બ્રાઝિલમાં એક ભયાનક બસ અકસ્માત થયો છે. આ બસ અકસ્માતમાં એક યુનિવર્સિટીના 12 વિદ્યાર્થીઓના મોત થયા હતા, જ્યારે 19 લોકો ઘાયલ થયા હતા. આ અકસ્માત સાઓ પાઉલો રાજ્યના રિબેરાવ પ્રેટો શહેર નજીક બન્યો હતો. વિદ્યાર્થીઓથી ભરેલી બસ એક ઝડપી ટ્રક સાથે અથડાઈ, જેના કારણે આ ભયાનક અકસ્માત સર્જાયો.

રાત્રે બનેલી આ દુર્ઘટના બાદ, ફાયર ફાઇટરોએ ઝડપથી રાહત અને બચાવ કાર્ય શરૂ કર્યું. તેઓએ બસમાં ફસાયેલા ઘાયલોને બહાર કાઢ્યા અને તેમને તાત્કાલિક હોસ્પિટલ લઈ ગયા. અકસ્માત બાદ બસના ટુકડા થઈ ગયા હતા અને ટ્રાફિક સંપૂર્ણપણે ખોરવાઈ ગયો હતો. મીડિયા રિપોર્ટ્સ અનુસાર, મૃતકોમાં મોટાભાગના વિદ્યાર્થીઓ છે, આ બસ યુનિવર્સિટી ઓફ ફ્રાન્કા (યુનિફ્રાન) ના વિદ્યાર્થીઓને લઈ જઈ રહી હતી. યુનિવર્સિટીના એથ્લેટિક એસોસિએશને આ ઘટના પર શોક વ્યક્ત કર્યો અને પીડિતોના પરિવારજનો પ્રત્યે સંવેદના વ્યક્ત કરી.

પીડિતોના પ્રત્યક્ષદર્શીઓ અને સંબંધીઓની પ્રતિક્રિયા

પીડિત વિદ્યાર્થીમાંથી એકના પિતા જીન કાર્લોસ ડોસ રીસે જણાવ્યું હતું કે મેં ફોન કરીને પૂછ્યું, પરંતુ મારી પત્નીએ મને કહ્યું કે મારો પુત્ર હજુ સુધી આવ્યો નથી.સ્થાનિક રહેવાસી ક્લેબર દો નાસિમેન્ટોએ જણાવ્યું હતું કે આખું શહેર શોકમાં ડૂબી ગયું છે, ભલે અમે પીડિતોને વ્યક્તિગત રીતે જાણતા ન હતા.

અકસ્માત બાદ ટ્રક ચાલક સામે કાર્યવાહી

અધિકારીઓ અકસ્માતમાં સંડોવાયેલા ટ્રક ડ્રાઈવર પર સદોષ માનવવધ, બેદરકારીથી ઈજા પહોંચાડવા અને સહાય પૂરી પાડવામાં નિષ્ફળતાનો આરોપ લગાવે તેવી શક્યતા છે. દુર્ઘટનાગ્રસ્ત બસને ઘટનાસ્થળેથી દૂર ખેંચી લેવામાં આવી હતી, અને મૃતદેહોને ફોરેન્સિક સંસ્થામાં મોકલવામાં આવ્યા હતા. તે જ સમયે, રાજ્યના ફાયર વિભાગે સોશિયલ મીડિયા પર માહિતી આપી હતી કે આ અકસ્માતમાં કુલ 31 લોકો પ્રભાવિત થયા છે, જેમાંથી 12 લોકોના મોત થયા છે, જ્યારે અન્ય લોકોને હોસ્પિટલમાં દાખલ કરવામાં આવ્યા છે.