અમેરિકા/ પ્રમુખપદની ચૂંટણી પહેલાં, જો બાઇડનને મોટો આંચકો, પુત્ર હન્ટર ગંભીર આરોપોમાં દોષિત ઠર્યો

અમેરિકામાં રાષ્ટ્રપતિની ચૂંટણી પહેલા જો બાઇડનને મોટો ઝટકો લાગ્યો છે. જો બાઇડનને તેમના પુત્ર હન્ટર બાઇડનના પગલાંને કારણે ચૂંટણીમાં નુકસાન થઈ શકે છે. હકીકતમાં, યુએસ પ્રમુખ જો બાઇડનના પુત્ર હન્ટર બાઇડનને 2018 માં રિવોલ્વરની ખરીદી સાથે સંબંધિત ત્રણેય આરોપોમાં મંગળવારે દોષી ઠેરવવામાં આવ્યો હતો. આ કેસમાં ન્યાયાધીશે સજાની તારીખ જાહેર કરી નથી. 

હન્ટરે જવાબ ન આપ્યો

વકીલોએ દલીલ કરી હતી કે પ્રમુખના પુત્રએ ફરજિયાત બંદૂક ખરીદી ફોર્મ પર જૂઠું બોલ્યું હતું કે તેણે ગેરકાયદેસર નશાયુક્ત પદાર્થનો ઉપયોગ કર્યો નથી અથવા તે ડ્રગનો વ્યસની નથી.  જ્યારે બંને પક્ષોની દલીલો પછી ચુકાદો જાહેર કરવામાં આવ્યો, ત્યારે હન્ટર બાઇડન આગળ જોતા રહ્યા અને પ્રતિક્રિયા આપી ન હતી. ચુકાદા પછી, તેણે તેના બંને વકીલોને ગળે લગાવ્યા અને માત્ર હસ્યો હતો. 

હન્ટર બાઇડનનું લેખિત નિવેદન

એક લેખિત નિવેદનમાં, હન્ટર બાઇડને કહ્યું કે તે નિર્ણયથી નિરાશ છે, પરંતુ પરિવાર અને મિત્રોના સમર્થન માટે આભારી છે. હન્ટરના વકીલે કહ્યું કે તે ઉપલબ્ધ તમામ કાનૂની વિકલ્પોનો સહારો લેશે.  રાષ્ટ્રપતિ જો બાઇડનની પત્ની જીલ બાઇડન અદાલતે ચુકાદો જાહેર કર્યાની મિનિટોમાં કોર્ટમાં પહોંચી હતી. હન્ટર બાઇડન તેની માતા અને પત્નીનો હાથ પકડીને કોર્ટરૂમમાંથી બહાર નીકળી ગયો. તેમણે પત્રકારો સાથે વાત કરી ન હતી. કોર્ટના નિર્ણયની ઘોષણા થયા પછી, રાષ્ટ્રપતિ બાઇડને કહ્યું કે તેઓ કેસના પરિણામને સ્વીકારે છે અને ન્યાયિક પ્રક્રિયાનું સન્માન કરે છે. 

હન્ટર બાઇડન સામે કયો કેસ છે?

હન્ટર બાઇડનને બે કેસમાં દોષિત ઠેરવવામાં આવ્યા છે. પ્રથમ કિસ્સામાં, તેના પર એક ફોર્મમાં ખોટી માહિતી આપીને કોલ્ટ કોબ્રા રિવોલ્વર ખરીદવાનો આરોપ હતો. આગળનો આરોપ એ હતો કે જ્યારે તે નશાનું સેવન કરી રહ્યા હતા ત્યારે હન્ટર પાસે બંદૂક હતી. હકીકતમાં, અમેરિકામાં કોઈપણ બંદૂક ખરીદતી વખતે ખરીદનારને એક મહત્ત્વપૂર્ણ પ્રશ્ન પૂછવામાં આવે છે કે શું તે ડ્રગ એડિક્ટ છે? આરોપ છે કે હંટરે આ પ્રશ્નનો ખોટો જવાબ આપ્યો હતો.

હન્ટર બાઇડન વિરુદ્ધ જુબાની કોણે આપી 

હન્ટર બાઇડનની ભૂતપૂર્વ પત્ની અને ભૂતપૂર્વ ગર્લફ્રેન્ડે ક્રેક પાઇપ્સ અને અન્ય ડ્રગ સામગ્રીની શોધ વિશે જુબાની આપી હતી. ઉલ્લેખનીય છે કે,  હન્ટર બાઇડન ભૂતકાળમાં પણ તેના ડ્રગ વ્યસન અને સેક્સની લતને કારણે કુખ્યાત રહ્યો છે. અમેરિકાની એક હોટલના રૂમમાંથી હન્ટર બિડેનના નગ્ન અવસ્થામાં ભાગવાનો વીડિયો પણ વાયરલ થયો હતો. આ સિવાય તેના લેપટોપમાંથી પણ મોટા ખુલાસા થયા હતા.