VIDEO:ANDARNI VAAT/ભારતીય હવામાન વિભાગ દ્વારા રેડ એલર્ટ, મુંબઈ શહેરમાં ભારે વરસાદ

માયાનગરી મુંબઈમાં આખી રાત આક્રમક રીતે વરસેલા મુશળધાર વરસાદે સમગ્ર મહાનગરને બાનમાં લીધું છે, જેના પગલે હવામાન વિભાગ દ્વારા શહેરમાં રેડ એલર્ટ જાહેર કરવામાં આવ્યું છે. મરીન ડ્રાઈવ અને મલબાર હિલ જેવા દરિયાકાંઠાના વિસ્તારોમાં ઊંચા મોજાં સાથે ભારે વરસાદ વરસી રહ્યો છે, જેના લીધે દ્રશ્યતા ખૂબ ઓછી થઈ ગઈ છે. અવિરત વરસાદના કારણે નીચાણવાળા ભાગોમાં મોટા પાયે પાણી ભરાઈ જતાં વાહનવ્યવહારની ગતિ સાવ ધીમી પડી ગઈ છે. દાદર રેલ્વે સ્ટેશન અને તેની આસપાસના વિસ્તારો સંપૂર્ણપણે પાણીમાં ગરકાવ થઈ ગયા છે, જેને કારણે મુંબઈની લાઈફલાઈન ગણાતી લોકલ ટ્રેનો પણ પોતાના નિયત સમય કરતાં ઘણી મોડી ચાલી રહી છે. આ ઉપરાંત અકસ્માતોની હારમાળા પણ સર્જાઈ છે, જેમાં જેવીએલઆર વિક્રોલી વેસ્ટ સ્થિત શ્યામલાલ સોહનલાલ ગુપ્તા ચોક નજીક આવેલી સનસિટી કોમ્પ્લેક્સની દીવાલ ધરાશાયી થઈ છે, તો બીજી તરફ દાદરમાં એક ચાલુ કાર પર વિશાળ વૃક્ષ પડવાની ઘટના સામે આવી છે.

આ કુદરતી આફતની સૌથી મોટી અને માઠી અસર શાળા-કોલેજના વિદ્યાર્થીઓ પર પડી છે. માટુંગાની રૂઈયા કોલેજ સહિતની શૈક્ષણિક સંસ્થાઓમાં વરસાદી પાણી ઘૂસી જતાં અરાજકતાનો માહોલ સર્જાયો છે. વહેલી સવારે સાડા સાત વાગ્યે પ્રેક્ટિકલ પરીક્ષાઓ અને લેક્ચર્સ માટે નીકળેલા વિદ્યાર્થીઓ રસ્તામાં જ અટવાઈ પડ્યા હતા. કોલેજ કેમ્પસમાં પાણી ભરાઈ જવાના કારણે અને વહીવટી તંત્રના મેન્યુઅલ સિસ્ટમ બંધ થઈ જવાથી વિદ્યાર્થીઓને ભારે હાલાકી ભોગવવી પડી રહી છે. ટ્રેનો અને ટેક્સી સેવાઓ ખોરવાઈ જતાં દૂરના વિસ્તારોમાંથી આવતા વિદ્યાર્થીઓની મુશ્કેલી બમણી થઈ ગઈ છે. કોલેજ પ્રશાસન કે સરકાર દ્વારા શૈક્ષણિક કાર્ય રદ કરવા અંગે કોઈ આગોતરી સત્તાવાર માહિતી ન અપાતા વિદ્યાર્થીઓમાં ભારે રોષ જોવા મળી રહ્યો છે. પ્રશાસન દ્વારા હાલમાં પંપિંગ સ્ટેશનો મારફતે પાણીના નિકાલની અને રસ્તા પરથી કટકા થયેલા વૃક્ષો હટાવવાની કામગીરી યુદ્ધના ધોરણે કરવામાં આવી રહી છે.

બ્યૂરો રિપોર્ટ જીએસટીવી