MUMBAI: ઓશીકા-ચાદર લઈને દરિયાકિનારે સુવા દોડ્યા લોકો! વિશ્વાસ ના હોય તો જુઓ VIDEO

મુંબઈ: જૂન મહિનો અડધો વીતી ગયો હોવા છતાં મુંબઈમાં ભારે ગરમી પડી રહી છે. ૩૩ ડિગ્રી તાપમાનના કારણે લોકોની હાલત ખરાબ છે. દિવસ દરમિયાન અસહ્ય બફારો રહે છે અને રાત્રે પણ ગરમીથી રાહત નથી મળી રહી. ગરમી અને બફારાથી લોકો ત્રાસી ગયા છે. ખાસ કરીને ઝૂંપડપટ્ટી અને રસ્તા પર રહેતા લોકોને ભારે હાલાકીનો સામનો કરવો પડી રહ્યો છે. તેઓને દિવસે ગરમીની તપન અને બફારો સહન કરવો પડે છે અને રાત્રે પણ ગરમી વેઠવી પડે છે. હવે બસ ચોમાસાની રાહ જોવાઈ રહી છે, જેથી વરસાદથી ગરમીમાં થોડો ઘટાડો થઈ શકે. જોકે, આ દરમિયાન મુંબઈના લોકોએ ગરમીથી બચવા માટે એક સરસ જુગાડ શોધી કાઢ્યો છે.

 

 

ગરમીથી બચવા અને ઠંડકવાળી ઊંઘ મેળવવા માટે લોકો રોજ સાંજે ઓશીકું અને ચાદર લઈને દરિયાકિનારે (બીચ પર) પહોંચી જાય છે. એક વીડિયો સામે આવ્યો છે, જેમાં મોટી સંખ્યામાં લોકો વર્સોવા બીચના કિનારે સૂતા જોવા મળી રહ્યા છે. પોતાની ચાદર પાથરીને લોકો રેતી પર સૂતા દેખાયા. કેટલાક લોકો તો ચાદર વગર જ રેતી પર સૂઈ ગયા હતા. બીચ પર સૂનારાઓમાં મોટાભાગે પુરુષો સામેલ છે. મુંબઈના લોકોએ ગરમીને માત આપવાનો આ અનોખો જુગાડ શોધી કાઢ્યો છે.

 

 

ઝૂંપડપટ્ટીમાં રહેતા એક યુવકે ન્યૂઝ એજન્સીને જણાવ્યું કે, ગરમી લાગે છે એટલે જ તેઓ લોકો બીચ પર આવીને સૂઈ જાય છે. અહીં દરિયાકિનારો હોવાને કારણે ઠંડો પવન ચાલે છે. તેણે કહ્યું કે ગરમીના દિવસોમાં બધા લોકો બીચ પર જ સૂવે છે, પરંતુ જ્યારે વરસાદની ઋતુ હોય છે ત્યારે અહીં કોઈ નથી સૂતું. જ્યારે તે યુવક આ વાત કહી રહ્યો હતો ત્યારે ખૂબ જ તેજ પવન ફૂંકાઈ રહ્યો હતો, જેનો અવાજ માઈકમાં પણ સંભળાઈ રહ્યો છે.