VIDEO: ANDAR NI VAAT/ શોપિયાંમાં આતંકીઓ સાથે સેનાની અથડામણ, વિસ્તાર કોર્ડન કરી સર્ચ ઓપરેશન શરૂ

જમ્મુ અને કાશ્મીરમાં સુરક્ષા દળો દ્વારા આતંકવાદ વિરોધી અભિયાન અત્યંત આક્રમક બનાવવામાં આવ્યું છે. હાલમાં ડોડા જિલ્લાના ભલેસા જંગલ વિસ્તારમાં સેના અને સુરક્ષા દળો દ્વારા સર્ચ ઓપરેશન ચલાવવામાં આવી રહ્યું છે, ત્યારે જ શોપિયાં જિલ્લાના ચાનાપોરા વિસ્તારમાં રાત્રિ દરમિયાન ગોળીબારની ઘટના સામે આવતા ભારે તણાવની સ્થિતિ સર્જાઈ છે. સુરક્ષા એજન્સીઓને મળેલી ચોક્કસ બાતમીના આધારે સેના, પોલીસ અને અર્ધલશ્કરી દળોએ ચાનાપોરા વિસ્તારને સંપૂર્ણપણે ઘેરી લીધો છે. વિસ્તારમાં શંકાસ્પદ હિલચાલ જોવા મળતા સુરક્ષા દળો દ્વારા કોર્ડન એન્ડ સર્ચ ઓપરેશન હાથ ધરવામાં આવ્યું છે. જેનો મુખ્ય હેતુ છુપાયેલા આતંકવાદીઓને શોધીને તેમને ઠાર કરવાનો અથવા પકડવાનો છે. આ ઓપરેશન દરમિયાન બંને તરફથી ગોળીબાર થયો હોવાના અહેવાલો છે. સુરક્ષા દળોની સજ્જતાને કારણે આતંકીઓના મનસૂબાઓ નિષ્ફળ બનાવવા માટે તમામ પ્રકારના આધુનિક ટેકનોલોજી અને ડ્રોનનો ઉપયોગ કરવામાં આવી રહ્યો છે. સ્થાનિક સ્તરે કાયદો અને વ્યવસ્થા જાળવવા માટે વધારાના પોલીસ દળો તૈનાત કરવામાં આવ્યા છે. શોપિયાંના ચાનાપોરામાં ચાલી રહેલા ઓપરેશનમાં કોઈ પણ નાગરિકને નુકસાન ન થાય અને આતંકવાદીઓ છટકી ન શકે તે માટે સુરક્ષા દળો અત્યંત સાવચેતીપૂર્વક આગળ વધી રહ્યા છે. છેલ્લા કેટલાક સમયથી જમ્મુ અને કાશ્મીરમાં આતંકવાદીઓની હિલચાલમાં વધારો જોવા મળ્યો છે. જેનો જવાબ ભારતીય સેના દ્વારા ખૂબ જ અસરકારક રીતે આપવામાં આવી રહ્યો છે. હાલમાં સમગ્ર વિસ્તારને સીલ કરી દેવામાં આવ્યો છે અને દરેક ખૂણે સઘન તપાસ કરવામાં આવી રહી છે. ડોડા અને શોપિયાં એમ બંને સ્થળોએ ચાલી રહેલા આ અભિયાન પાછળ સરકાર અને સુરક્ષા એજન્સીઓનો સ્પષ્ટ સંદેશ છે કે આતંકવાદ સામે ઝીરો ટોલરન્સની નીતિ અપનાવવામાં આવશે. બ્યુરો રિપોર્ટ જીએસટીવી