Viral Video/ ખેતરમાં ઘૂસ્યો દીપડો... ભાગવાને બદલે વ્યક્તિ તેની સાથે સેલ્ફી લેવા લાગ્યો!
છેલ્લું અપડેટ : 28 Feb 2026
આજકાલ સોશિયલ મીડિયા પર રીલ્સ અને લાઈક્સ મેળવવા માટે લોકો કેવા કેવા જોખમો ઉઠાવે છે તેના અનેક કિસ્સાઓ સામે આવતા રહે છે. કોઈ પહાડની ટોચ પર લટકે છે, તો કોઈ ચાલુ બાઈક પર જોખમી સ્ટંટ કરે છે. પરંતુ હાલમાં ઈન્ટરનેટ પર એક એવો વીડિયો વાયરલ થઈ રહ્યો છે, જેને જોઈને સોશિયલ મીડિયા યુઝર્સ દંગ રહી ગયા છે. આ વીડિયોમાં એક વ્યક્તિ જંગલી અને ખતરનાક ગણાતા દીપડા સાથે એવી રીતે સેલ્ફી લઈ રહ્યો છે જાણે તે કોઈ પાલતુ પ્રાણી હોય!
શું છે આ વાયરલ વીડિયોમાં?
વાયરલ થઈ રહેલા આ વીડિયોમાં જોઈ શકાય છે કે એક ખેતરમાં દીપડો શાંતિથી બેઠો છે. સામાન્ય રીતે દીપડાને જોઈને લોકો ભાગવા લાગે છે, પરંતુ અહીં દ્રશ્ય કંઈક અલગ જ છે. એક વ્યક્તિ કોઈ પણ જાતના ડર વગર દીપડાની એકદમ નજીક જાય છે. નવાઈની વાત એ છે કે દીપડો પણ તેના પર હુમલો કરવાને બદલે એકદમ શાંત દેખાય છે. વ્યક્તિ પોતાના ખિસ્સામાંથી મોબાઈલ કાઢે છે અને અલગ-અલગ એંગલથી દીપડા સાથે સેલ્ફી લેવા લાગે છે.
લોકોએ શું કહ્યું?
આ વીડિયો સોશિયલ મીડિયા પર જોતજોતામાં વાયરલ થઈ ગયો છે. વીડિયોની શરૂઆતમાં એવું લાગે છે કે તે વ્યક્તિ દીપડા સાથે કંઈક વાત કરી રહ્યો હોય. યુઝર્સ આ વીડિયો પર રમુજી અને આશ્ચર્યજનક પ્રતિક્રિયાઓ આપી રહ્યા છે. એક યુઝરે મજાકમાં લખ્યું કે, "દીપડાએ તેની વાત માનવી જ પડી કારણ કે તે ખેડૂતના પોતાના ખેતરમાં બેઠો હતો!"
જોકે, આ વીડિયો ક્યાંનો છે અને તેની પાછળની ચોક્કસ હકીકત શું છે તે હજુ સ્પષ્ટ થયું નથી. પ્રાણી નિષ્ણાતોના મતે, વન્યજીવો આ રીતે શાંત દેખાય ત્યારે પણ તે ગમે ત્યારે હિંસક બની શકે છે, તેથી આવા જોખમો લેવા જીવલેણ સાબિત થઈ શકે છે.
આ વીડિયો ભલે જોવામાં રોમાંચક લાગતો હોય, પરંતુ વન વિભાગ હંમેશા સલાહ આપે છે કે જંગલી પ્રાણીઓ સાથે સેલ્ફી લેવી કે તેમની નજીક જવું એ કાયદાકીય ગુનો હોવાની સાથે અત્યંત જોખમી પણ છે. રીલ્સના ચક્કરમાં જીવ જોખમમાં મૂકવો સમજદારી નથી.
