રોહિત-કોહલી સાથે સરખામણી પર યશસ્વી જયસ્વાલે આપ્યો આવો જવાબ, કહ્યું- ''હું અને ગિલ એક સમયે...'

ઝિમ્બાબ્વે સામેની ચોથી T20 મેચમાં શુભમન ગિલ અને યશસ્વી જયસ્વાલે ટીમ ઈન્ડિયાને 10 વિકેટે જીત અપાવી હતી. આ મેચમાં ઝિમ્બાબ્વેએ પ્રથમ બેટિંગ કરીને 152 રન બનાવ્યા હતા. જવાબમાં ભારતીય ટીમે 15.2 ઓવરમાં કોઈ પણ વિકેટ ગુમાવ્યા વિના લક્ષ્ય હાંસલ કરી લીધું હતું. ભારત તરફથી યશસ્વી જયસ્વાલે 53 બોલમાં અણનમ 93 રન અને શુભમન ગિલે 39 બોલમાં અણનમ 58 રન બનાવ્યા હતા. મેચ બાદ જયસ્વાલે રોહિત શર્મા અને વિરાટ કોહલી સાથે સરખામણી પર શાનદાર જવાબ આપ્યો હતો.

વિરાટ કોહલી અને રોહિત શર્માએ ભારતીય ટીમ માટે અવિશ્વસનીય પ્રદર્શન કર્યું છે અને યશસ્વી જયસ્વાલ નથી ઈચ્છતો કે તેને કે તેના ઓપનિંગ પાર્ટનર શુભમન ગિલ તેમની કારકિર્દીની શરૂઆતમાં અપેક્ષાઓના બોજનો સામનો કરે. રોહિત અને કોહલી બંનેએ ભારતની વર્લ્ડ કપ જીત્યા બાદ T20 ઈન્ટરનેશનલમાંથી નિવૃત્તિની જાહેરાત કરી હતી. જયસ્વાલ પણ આ ટીમનો ભાગ હતો, પરંતુ તેને એક પણ મેચ રમવાની તક મળી ન હતી.

યશસ્વી જયસ્વાલે આ વાત કહી

યશસ્વી જયસ્વાલે કહ્યું કે, રોહિત અને કોહલી સાથે ડ્રેસિંગ રૂમ શેર કરવો એ 'આશીર્વાદ' સમાન છે. જયસ્વાલે મેચ બાદ પ્રેસ કોન્ફરન્સમાં કહ્યું, 'મને લાગે છે કે તેઓએ (રોહિત અને વિરાટ) ભારતીય ક્રિકેટ માટે જે કર્યું છે તે અવિશ્વસનીય છે અને તેમની ડ્રેસિંગ રૂમ શેર કરવો આશીર્વાદ જેવું છે. અમે (તે અને ગિલ) પ્રક્રિયા પર ધ્યાન કેન્દ્રિત કરી રહ્યા છીએ, મેચ-બાય-મેચ અને એક સમયે એક મેચ પર ધ્યાન આપવાનો પ્રયાસ કરી રહ્યા છીએ.

જ્યારે ગિલને પૂછવામાં આવ્યું કે શું ટેસ્ટ ક્રિકેટ રમવાથી તેને ફાયદો થયો છે, તો તેણે કહ્યું, 'તેનાથી લાગણીઓને કાબૂમાં રાખવામાં અને રમતને સારી રીતે સમજવામાં મદદ મળે છે, કારણ કે મેદાન પર અલગ-અલગ પરિસ્થિતિઓ હોય છે, અને જ્યારે પણ હું રોહિત ભાઈ અથવા વિરાટ ભાઈ સાથે વાત કરું છું, ત્યારે મને ઘણો અનુભવ મળે છે. તેમની સાથે વાત કરવાનો અને તેમની પાસેથી શીખવાનો આનંદ મળે છે.