ભારત ચેમ્પિયન્સ ટ્રોફી નહીં રમે કે પાકિસ્તાનની યજમાની છીનવાઈ જશે? આજે લેવાશે નિર્ણય

પાકિસ્તાન ચેમ્પિયન્સ ટ્રોફી 2025ની યજમાની કરી રહ્યું છે. પાડોશી દેશ આ ટૂર્નામેન્ટ માટે જોરશોરથી તૈયારી કરી રહ્યો છે. જોકે, ટીમ ઈન્ડિયાએ ત્યાં જવાની ના પાડ્યા બાદ પાકિસ્તાનની સાથે ICCને પણ મોટો ઝટકો લાગ્યો છે. આવી સ્થિતિમાં આ ટૂર્નામેન્ટ હાઈબ્રિડ મોડલના આધારે રમાઈ શકે છે. આજે એટલે કે 29 નવેમ્બરે ICCની મીટિંગ છે, જેમાં આ મુદ્દા પર ચર્ચા થશે અને સાંજ સુધીમાં અંતિમ નિર્ણય લેવામાં આવી શકે છે. મીટિંગના 24 કલાક પહેલા પાકિસ્તાને હાઈબ્રિડ મોડલ અપનાવવાનો ઈન્કાર કરી દીધો છે. આવી સ્થિતિમાં બે વસ્તુઓ થઈ શકે છે.

આ પણ વાંચો: VIDEO / ઓસ્ટ્રેલિયાની સંસદમાં રોહિત શર્માએ આપ્યું ભાષણ, જુઓ ભારતીય કેપ્ટને શું કહ્યું

પહેલું એ કે પાકિસ્તાન ચેમ્પિયન્સ ટ્રોફી 2025ની યજમાની ગુમાવી શકે છે અને બીજું એ કે આ ટૂર્નામેન્ટ ભારત વિના રમાશે. જો ટીમ ઈન્ડિયા આ ટૂર્નામેન્ટમાં નહીં રમે તો ICC સહિત બ્રોડકાસ્ટર્સને મોટું નુકસાન વેઠવું પડી શકે છે. આવી સ્થિતિમાં ICC ભારતને ન રમાડવાની ભૂલ નહીં કરે. જો આમ થાય છે તો આ ટૂર્નામેન્ટ પાકિસ્તાનને બદલે અન્ય કોઈ દેશમાં શિફ્ટ થઈ શકે છે.

આજે થશે મીટિંગ

ICC બોર્ડ આઠ ટીમોની ચેમ્પિયન્સ ટ્રોફીનું ભાવિ નક્કી કરવા માટે દુબઈના સમય મુજબ બપોરે 2:30 વાગ્યે (ભારતીય સમય મુજબ બપોરે 4:00 વાગ્યે) વર્ચ્યુઅલ મીટિંગ કરશે.

આ મીટિંગ તમામ હિતધારકોને, ખાસ કરીને ભારત અને પાકિસ્તાનને સંતુષ્ટ કરે તેવા ઉકેલ શોધવાની ICCની ક્ષમતાની એક મહત્ત્વપૂર્ણ પરીક્ષા હશે. મીટિંગનો સમય પણ મહત્ત્વનો છે, શ્રીલંકાની ટીમે અચાનક પાકિસ્તાનનો તેમનો પ્રવાસ ખતમ કર્યા અને રાજકીય અશાંતિના કારણે સ્વદેશ પરત ફર્યાના ત્રણ દિવસ બાદ આ મીટિંગ થઈ રહી છે. PCBએ કહ્યું છે કે રાજકીય અશાંતિને સુરક્ષાની ચિંતાઓ સાથે સરખાવી ન જોઈએ.

પાકિસ્તાને હાઈબ્રિડ મોડલનો વિરોધ કર્યો

એક અહેવાલ મુજબ, જાહેર કર્યું કે PCB એ વ્યાપકપણે ચર્ચિત હાઈબ્રિડ મોડલનો વિરોધ કર્યો છે, જેમાં સંભવિતપણે ભારતની પાંચ મેચો ન્યુટ્રલ વેન્યુ પર રમાશે. તમને જણાવી દઈએ કે, ચેમ્પિયન્સ ટ્રોફી 19 ફેબ્રુઆરીથી 9 માર્ચની વચ્ચે યોજાવાની છે. ટૂર્નામેન્ટની યજમાનીને લઈને મૂંઝવણને કારણે, તેના શેડ્યૂલની હજુ સુધી જાહેરાત કરવામાં આવી નથી.

દરમિયાન, PCB અધ્યક્ષે કહ્યું કે તેઓ દેશના હિતોની રક્ષા માટે શક્ય તમામ પ્રયાસ કરશે. મોહસીન નકવીએ બુધવારે રાત્રે લાહોરમાં એક તાત્કાલિક પ્રેસ કોન્ફરન્સમાં મીડિયાને જણાવ્યું હતું કે, "જો ભારતીય અધિકારીઓ તેમની ટીમને પાકિસ્તાન મોકલવાનો ઈનકાર કરવાનું ચાલુ રાખશે, તો પાકિસ્તાન ભારતમાં કાર્યક્રમોમાં ભાગ નહીં લે. આ પ્રકારનું અસંતુલન સ્વીકાર્ય નથી."

હાઈબ્રિડ મોડલ માટે ICCના સભ્યો મતદાન કરવાના દૃશ્ય વિશે પૂછવામાં આવતા, તેમણે કહ્યું, "અમારા વલણ વિશે દરેકને જાણ છે. અમે પાકિસ્તાનના હિતોનું રક્ષણ કરીશું."