IND vs AUS / શું ટીમ ઈન્ડિયા સાથે ઓસ્ટ્રેલિયા નહીં જાય હાર્દિક પંડ્યા? ઈજાના કારણે સિરીઝમાંથી થયો બહાર?
છેલ્લું અપડેટ : 30 Sept 2025
ટીમ ઈન્ડિયાનો ઓસ્ટ્રેલિયા પ્રવાસ આવતા મહિને શરૂ થઈ રહ્યો છે. આ વ્હાઈટ બોલની ક્રિકેટ સિરીઝ દરમિયાન હાર્દિક પંડ્યા ટીમ ઈન્ડિયા માટે મહત્ત્વપૂર્ણ ખેલાડી છે. જોકે, હવે એવું લાગે છે કે તે આ પ્રવાસ ચૂકી જશે. ટીમ ઈન્ડિયાએ તેના વિના ઓસ્ટ્રેલિયા જવું પડશે. અહેવાલો સૂચવે છે કે ભારતીય ઓલરાઉન્ડર તેની ઈજામાંથી સાજો નથી થયો, જેના કારણે તે એશિયા કપ 2025ની ફાઈનલમાં પણ નહતો રમી શક્યો.
શું પંડ્યા ઓસ્ટ્રેલિયા પ્રવાસમાંથી બહાર થયો?
શ્રીલંકા સામેની છેલ્લી સુપર-4 મેચમાં હાર્દિક પંડ્યાની ઈજાની જાણ થઈ હતી. તેને ડાબા ક્વાડ્રિસેપ્સ ઈજા થઈ હોવાનું કહેવામાં આવી રહ્યું છે.આ સાથળના સ્નાયુ સંબંધિત છે. એશિયા કપ દરમિયાન કોમેન્ટ્રી કરી રહેલા રવિ શાસ્ત્રીએ પંડ્યાની ઈજા વિશે માહિતી આપી હતી.
વ્હાઈટ બોલની સિરીઝ માટે ભારતનો ઓસ્ટ્રેલિયા પ્રવાસ 19 ઓક્ટોબરથી શરૂ થઈને 8 નવેમ્બર સુધી ચાલશે. BCCI સૂત્રો અનુસાર, પંડ્યાની હાલની ઈજાને સાજા થવામાં ચાર અઠવાડિયા લાગી શકે છે. આનો અર્થ એ થયો કે જો તે શરૂઆતમાં ઓસ્ટ્રેલિયા પ્રવાસ પર ટીમ ઈન્ડિયા સાથે મુસાફરી ન કરે, તો પણ તે છેલ્લી કેટલીક T20 મેચો માટે ઉપલબ્ધ થઈ શકે છે. જોકે, આ અંગે અંતિમ નિર્ણય BCCI મેડિકલ ટીમ દ્વારા તપાસ કર્યા પછી જ લેવામાં આવશે.
ભારતના ઓસ્ટ્રેલિયા પ્રવાસનું શેડ્યૂલ
- પ્રથમ ODI - 19 ઓક્ટોબર, પર્થ (ઓપ્ટસ સ્ટેડિયમ)
- બીજી ODI - 23 ઓક્ટોબર, એડિલેડ (એડિલેડ ઓવલ)
- ત્રીજી ODI - 25 ઓક્ટોબર, સિડની (સિડની ક્રિકેટ ગ્રાઉન્ડ)
- પ્રથમ T20 - 29 ઓક્ટોબર, કેનબેરા (મનુકા ઓવલ)
- બીજી T20 - 31 ઓક્ટોબર, મેલબોર્ન (મેલબોર્ન ક્રિકેટ ગ્રાઉન્ડ)
- ત્રીજી T20 - 2 નવેમ્બર, હોબાર્ટ (નીન્જા સ્ટેડિયમ)
- ચોથી T20 - 6 નવેમ્બર, ગોલ્ડ કોસ્ટ (હેરિટેજ બેંક સ્ટેડિયમ)
- પાંચમી T20 - 8 નવેમ્બર, બ્રિસ્બેન (ગાબ્બા)
