National Sports Day 2024 / શા માટે દર વર્ષે 29 ઓગસ્ટના રોજ ઉજવવામાં આવે છે નેશનલ સ્પોર્ટ્સ ડે? જાણો તેનું મહત્ત્વ

2012થી, દર વર્ષે 29 ઓગસ્ટને નેશનલ સ્પોર્ટ્સ ડે તરીકે ઉજવવામાં આવે છે. વાસ્તવમાં આ દિવસે દિગ્ગજ ખેલાડી ધ્યાનચંદનો જન્મ થયો હતો. મેજર ધ્યાનચંદને 'હોકીના જાદુગર' કહેવામાં આવે છે. તેમની 22 વર્ષની કારકિર્દીમાં 400થી વધુ ગોલ કરનાર મહાન ખેલાડીને યાદ કરવા માટે, ભારત સરકારે 2012થી તેમની જન્મજયંતિ પર નેશનલ સ્પોર્ટ્સ ડે ઉજવવાની જાહેરાત કરી હતી. તમને જણાવી દઈએ કે, 1956માં તેમને દેશના ત્રીજા સર્વોચ્ચ સન્માન પદ્મ ભૂષણથી નવાજવામાં આવ્યા હતા. ચાલો આ ખાસ અવસર પર આ દિવસ સાથે જોડાયેલી કેટલીક રસપ્રદ વાતો જાણીએ.

આ દિવસનો ઈતિહાસ રસપ્રદ છે

આ દિવસે મહાન હોકી ખેલાડી મેજર ધ્યાનચંદની જન્મજયંતિ છે, તેમનો જન્મ 29 ઓગસ્ટ 1905ના રોજ અલ્હાબાદના એક રાજપૂત પરિવારમાં થયો હતો. પિતાના પગલે પગલે ધ્યાનચંદ સેનામાં જોડાયા અને સેનામાં જ હોકી રમવાનું શરૂ કર્યું. ધ્યાનચંદ તે ભારતીય હોકી ટીમનો ભાગ હતા જેણે 1928, 1932 અને 1936 ઓલિમ્પિકમાં ગોલ્ડ મેડલ જીત્યા હતા. તેમણે તેમની 22 વર્ષની કારકિર્દીમાં 400થી વધુ ગોલ કર્યા છે.

ધ્યાનચંદે 1936ની બર્લિન ઓલિમ્પિક્સની ફાઈનલમાં ત્રણ ગોલ કરીને ટીમનું નેતૃત્વ કર્યું હતું, આ મેચમાં ભારત જર્મની સામે 8-1થી જીત્યું હતું. આ મેચમાં ધ્યાનચંદના નેતૃત્વમાં ભારતનું હોકીમાં બેસ્ટ પરફોર્મન્સ હતું. તમને જણાવી દઈએ કે, સંન્યાસ લીધા બાદ પણ તેમણે રમતમાં પોતાનું યોગદાન આપવાનું ચાલુ રાખ્યું હતું. તેમણે નેશનલ ઇન્સ્ટિટ્યૂટ ઓફ સ્પોર્ટ્સ, પટિયાલામાં હેડ કોચ તરીકે સેવા આપવા ઉપરાંત રાજસ્થાનમાં અનેક કોચિંગ કેમ્પમાં પણ શીખવ્યું હતું.

શું છે આ દિવસનું મહત્ત્વ?

દર વર્ષે નેશનલ સ્પોર્ટ્સ ડે પર, ભારતના રાષ્ટ્રપતિ અર્જુન એવોર્ડ, દ્રોણાચાર્ય એવોર્ડ અને ધ્યાનચંદ ખેલ રત્ન એવોર્ડ જેવા તમામ સ્પોર્ટ્સ સંબંધિત એવોર્ડ આપે છે આ એવોર્ડ દ્વારા એવા ખેલાડીઓ અને કોચને સન્માનિત કરવામાં આવે છે જેમણે તેમની સંબંધિત રમતમાં દેશને ગૌરવ અપાવ્યું હોય.

ખેલો ઈન્ડિયા ચળવળ, જેનું ઉદ્ઘાટન 2018માં વડાપ્રધાન નરેન્દ્ર મોદી દ્વારા કરવામાં આવ્યું હતું, તે છેલ્લા કેટલાક વર્ષોમાં સરકાર દ્વારા આ દિવસે શરૂ કરાયેલી રમતગમતની પહેલોમાંથી એક છે.

આ દિવસે દેશભરમાં વિવિધ ટુર્નામેન્ટનું આયોજન કરવામાં આવે છે. ઘણી કોલેજો, શાળાઓ અને ઓફિસો આ દિવસના મહત્ત્વને ધ્યાનમાં રાખીને સેમિનાર અને રમતોનું આયોજન કરે છે.