VIDEO: IPL / કોણ બનશે CSKનો નવો હેડ કોચ? રવિચંદ્રન અશ્વિને આ ખેલાડીને ગણાવ્યો શ્રેષ્ઠ વિકલ્પ
છેલ્લું અપડેટ : 17 Jul 2026
ચેન્નાઈ સુપર કિંગ્સ (CSK) અને સ્ટીફન ફ્લેમિંગે પરસ્પર સહમતિથી અલગ થવાનો નિર્ણય લીધો છે. આ સાથે જ IPL ઈતિહાસના સૌથી સફળ કોચમાંથી એક એવા ફ્લેમિંગના 17 વર્ષના કાર્યકાળનો અંત આવ્યો છે. હવે ફ્રેન્ચાઈઝી નવા હેડ કોચની શોધ કરી રહી છે. આ વચ્ચે ભારતના અનુભવી ઓફ સ્પિનર રવિચંદ્રન અશ્વિને આ મુદ્દે પોતાની પ્રતિક્રિયા આપી છે. અશ્વિનનું માનવું છે કે, 'CSKએ હવે એક નવા યુગની શરૂઆત કરવી જોઈએ. જોકે, તેણે એમ પણ ઉમેર્યું કે જો મહેન્દ્ર સિંહ ધોની કોચિંગની જવાબદારી સંભાળવા તૈયાર થાય, તો ફ્રેન્ચાઈઝી માટે તેનાથી શ્રેષ્ઠ વિકલ્પ બીજો કોઈ નહીં હોઈ શકે.'
અશ્વિને કહ્યું કે, 'સ્ટીફન ફ્લેમિંગ અને મહેન્દ્ર સિંહ ધોનીના વિચારો એકબીજા સાથે ખૂબ મળતા આવતા હતા. ફ્લેમિંગ જાણતા હતા કે ધોની કઈ રીતે નિર્ણયો લે છે અને ધોની પણ સમજતા હતા કે ફ્લેમિંગ ટીમ માટે કેટલા મહત્ત્વપૂર્ણ સહયોગી છે. બંનેની આ સફળ ભાગીદારી લાંબા સમય સુધી ચાલી. હવે ચેન્નાઈ સુપર કિંગ્સે ભવિષ્યની દિશામાં આગળ વધવાની જરૂર છે.'
ધોની શ્રેષ્ઠ વિકલ્પ
તેણે આગળ કહ્યું કે, "જો ધોની હેડ કોચ બનવા માટે તૈયાર હોય તો CSK માટે તેમનાથી શ્રેષ્ઠ વિકલ્પ નહીં હોઈ શકે. પરંતુ જો એવું ન થાય, તો ટીમે એક એવા કોચની શોધ કરવી પડશે જે પોતાના દમ પર નિર્ણયો લેવા અને તેની જવાબદારી ઉઠાવવામાં સક્ષમ હોય."
અશ્વિનનું માનવું છે કે, "જે પણ નવા હેડ કોચ બનશે, તેમના માટે પડકાર સરળ નહીં હોય. તેનું કારણ એ છે કે, મહેન્દ્ર સિંહ ધોની આજે પણ ટીમના સૌથી પ્રભાવશાળી ચહેરાઓમાંથી એક છે અને ટીમની પસંદગી સહિતના ઘણા મહત્ત્વના નિર્ણયો પર તેનો અભિપ્રાય ઘણો મહત્ત્વનો રહે છે. નવા કોચ સામે શરૂઆતમાં કેટલીક અનિશ્ચિતતાઓ ચોક્કસપણે રહેશે. મહેન્દ્ર સિંહ ધોની ખૂબ મોટું નામ છે અને આજે પણ ટીમની પસંદગી સહિતની ઘણી મહત્ત્વની ચર્ચાઓનો ભાગ રહે છે."
સ્ટીફન ફ્લેમિંગના કાર્યકાળ દરમિયાન CSKએ 5 IPL ખિતાબ જીત્યા
સ્ટીફન ફ્લેમિંગ 2008માં IPLની પ્રથમ સિઝનમાં એક ખેલાડી તરીકે ચેન્નાઈ સુપર કિંગ્સ સાથે જોડાયો હતો. ત્યારબાદ 2009માં તેણે ટીમના મુખ્ય કોચનું પદ સંભાળ્યું હતું. તેના કાર્યકાળ દરમિયાન CSKએ પાંચ IPL ખિતાબ અને બે ચેમ્પિયન્સ લીગ T20 ટ્રોફી પોતાના નામે કરી હતી. આ સિવાય ટીમે રેકોર્ડ 12 વખત પ્લેઓફમાં જગ્યા બનાવી હતી અને 10 વખત IPL ફાઈનલ રમી હતી.
