IND vs NZ / 5 મેચમાં ફક્ત 16 રન અને 4 વિકેટ, છતાં 26 વર્ષીય આયુષ બદોનીને ટીમ ઈન્ડિયામાં કેમ મળ્યું સ્થાન?
છેલ્લું અપડેટ : 13 Jan 2026
BCCIએ ન્યુઝીલેન્ડ સામેની પહેલી ODIમાં ઈજાગ્રસ્ત થયેલા વોશિંગ્ટન સુંદરના રિપ્લેસમેન્ટની જાહેરાત કરી દીધી છે. દિલ્હીના કેપ્ટન આયુષ બદોનીને પહેલીવાર ટીમ ઈન્ડિયા માટે પસંદ કરવામાં આવ્યો છે. BCCIની જાહેરાત બાદ બદોની સોશિયલ મીડિયા પર ટ્રેન્ડ કરી રહ્યો છે અને ફેન્સ આ ખેલાડી વિશે વધુ જાણવા માટે ઉત્સુક છે. હાલમાં બદોની વિજય હજારે ટ્રોફી 2025-26માં રમતો જોવા મળ્યો હતો, જ્યાં તેણે 5 મેચમાં ફક્ત 16 રન બનાવ્યા હતા અને 4 વિકેટ લીધી હતી.
આયુષ બદોની કોણ છે?
26 વર્ષીય આયુષ બદોની દિલ્હી માટે મેચ ફિનિશર તરીકે રમે છે. તે ઓફ-સ્પિન બોલિંગ પણ કરે છે. જરૂર પડે ત્યારે, બદોની વિકેટ કીપિંગ પણ કરે છે. આ જ કારણ છે કે તે રિષભ પંતની ગેરહાજરીમાં દિલ્હીની ટીમનું નેતૃત્વ કરતો જોવા મળે છે. બદોની છેલ્લી 3 સિઝનથી IPLમાં લખનૌ સુપર જાયન્ટ્સ (LSG) માટે રમી રહ્યો છે. લખનૌએ IPL 2026 માટે આયુષને પણ રિટેન કર્યો છે. તે હવે ટીમ ઈન્ડિયા અને લખનૌ સુપર જાયન્ટ્સ બંને માટે સારું પ્રદર્શન કરવાનો પ્રયાસ કરશે. હાલમાં બદોની અપેક્ષા રાખશે કે તેને બીજી ODIમાં રમવાની તક મળે.
ઘરેલુ ક્રિકેટમાં બદોનીની કારકિર્દી
આયુષ બદોનીએ 21 ફર્સ્ટ-ક્લાસ મેચ રમી છે, જેમાં 57.96ની એવરેજથી 1681 રન બનાવ્યા છે. તેણે 23.50ની એવરેજથી 22 વિકેટ પણ લીધી છે. લિસ્ટ Aમાં આયુષે 27 મેચ રમી છે, જેમાં 36.47ની એવરેજથી 693 રન બનાવ્યા છે અને 29.72ની એવરેજથી 18 વિકેટ લીધી છે. T20 ફોર્મેટમાં આયુષે 96 મેચોની 79 ઈનિંગ્સમાં 137.96ના સ્ટ્રાઈક રેટથી 1788 રન બનાવ્યા છે. જ્યારે તેણે T20 ફોર્મેટમાં 26 ઈનિંગ્સમાં 25.88ની એવરેજથી 17 વિકેટ પણ લીધી છે. બદોનીએ અત્યાર સુધીમાં IPLમાં 56 મેચ રમી છે. જેમાં તેણે 46 ઈનિંગ્સમાં બેટિંગ કરતા 963 રન બનાવ્યા છે અને 7 ઈનિંગ્સમાં બોલિંગ કરતા 4 વિકેટ લીધી છે.
