જ્યારે સચિન તેંડુલકરે સુરેશ રૈનાને ગણાવ્યો પોતાનો પુત્ર, ક્રિકેટરે જણાવ્યો રસપ્રદ કિસ્સો
છેલ્લું અપડેટ : 14 Aug 2025
ભારતીય ક્રિકેટના મહાન બેટ્સમેન સચિન તેંડુલકર હંમેશા તેમના નમ્ર અને રમુજી સ્ટાઇલ માટે જાણીતા છે. તાજેતરમાં, ભૂતપૂર્વ ભારતીય ખેલાડી સુરેશ રૈનાએ એક ઇન્ટરવ્યુમાં ખુલાસો કર્યો હતો કે જ્યારે તે ભારતીય ટીમનો ભાગ બન્યો, ત્યારે સચિને તેને કેવી રીતે પોતાનો દીકરો બનાવ્યો, અને આ ઘટના 30,000 ફૂટની ઊંચાઈ પર બની હતી. સચિન તેંડુલકર અને સુરેશ રૈના બંને 2011 ODI વર્લ્ડ કપ વિજેતા ટીમના સભ્ય રહી ચૂક્યા છે.
30 હજાર ફૂટની ઊંચાઈની વાર્તા
ટીમ ઈન્ડિયાના 2011 ODI વર્લ્ડ કપ વિનર ટીમના સભ્ય સુરેશ રૈનાએ 'ચીકી સિંગલ્સ' શોમાં વાતચીત દરમિયાન એક રસપ્રદ કિસ્સો જણાવ્યો. તેણે જણાવ્યું કે જ્યારે તે લગભગ 18 વર્ષનો હતો અને ભારતીય ટીમ સાથે ટેસ્ટ મેચ રમવા જઈ રહ્યો હતો, ત્યારે તે બિઝનેસ ક્લાસમાં સચિન તેંડુલકરની બાજુમાં બેઠો હતો. થોડીવાર પછી, એક એર હોસ્ટેસે આવીને સચિનને પૂછ્યું, "ગુડ મોર્નિંગ, સચિન સર! તમે કેમ છો?" અને રૈનાને સચિનની સાથે બેઠેલો જોઈને, તેણે તેનો દીકરો સમજી લીધો. તે એર હોસ્ટેસે રૈનાને કહ્યું, "હાય અર્જુન! તું કેમ છે? તારી માતા કેમ છે?"
સચિનનો રમુજ અંદાજ
સચિને તરત જ એર હોસ્ટેસને રમુજી રીતે જવાબ આપ્યો, "હા, તે બિલકુલ ભણતો નથી, હું શું કરું? મેં આ વિશે અંજલિ (પત્ની) ને પણ કહ્યું છે." રૈનાએ જણાવ્યું કે સચિનનો આ રમુજી અંદાજ જોઈને એર હોસ્ટેસ થોડીવાર માટે મૂંઝાઈ ગઈ.
સચિને પાછળથી સત્ય જણાવ્યું
થોડીવાર પછી, સચિને એર હોસ્ટેસને સમજાવ્યું કે રૈના તેનો દીકરો નથી પણ ભારતીય ક્રિકેટ ટીમનો ખેલાડી છે. આ પછી, એર હોસ્ટેસે આ ભૂલ માટે રૈનાની માફી પણ માંગી. સુરેશ રૈનાએ જણાવ્યું કે સચિન હંમેશા આવા મજાક કરવામાં નિષ્ણાત હતો અને નવા ખેલાડીઓને હસાવવાની તક ક્યારેય નહતો ચૂકતો.
