IND vs SA / ક્યારે અને ક્યાં રમાશે બીજી ODI? જાણો મેચનો સમય અને લાઈવ સ્ટ્રીમિંગની વિગતો
છેલ્લું અપડેટ : 02 Dec 2025
સાઉથ આફ્રિકાએ બે મેચની ટેસ્ટ સિરીઝમાં ટીમ ઈન્ડિયાને ક્લીન સ્વીપ કરી હતી, પરંતુ ટીમ ઈન્ડિયાએ ODI સિરીઝની શરૂઆત જીત સાથે કરી હતી. ત્રણ મેચની ODI સિરીઝની પહેલી મેચ રવિવારે રાંચીમાં રમાયો હતો. ભારતે આ મેચ 17 રનથી જીતી હતી. જોકે, બંને ટીમોએ 300થી વધુ રન બનાવ્યા હતા. આ મેચમાં કુલ 681 રન બન્યા હતા. ભારત માટે વિરાટ કોહલીએ સદી ફટકારી હતી. જ્યારે કુલદીપ યાદવે 4 મહત્ત્વપૂર્ણ વિકેટ લીધી હતી. હવે ચાલો તમને જણાવીએ ભારત અને સાઉથ આફ્રિકા વચ્ચે બીજી ODI ક્યારે અને ક્યાં રમાશે.
ભારત અને સાઉથ આફ્રિકા વચ્ચે બીજી ODI 3 ડિસેમ્બર, બુધવારના રોજ રાયપુરમાં રમાશે. ટોસ બપોરે 1:00 વાગ્યે થશે. મેચ બપોરે 1:30 વાગ્યે શરૂ થશે. તમે સ્ટાર સ્પોર્ટ્સ નેટવર્કની ચેનલ પર ટીવી પર આ મેચ જોઈ શકો છો. જ્યારે મોબાઈલ પર મેચ જોનારા ફેન્સ JioHotstar પર મેચ લાઈવ જોઈ શકશે.
સાઉથ આફ્રિકાની ટીમમાં ફેરફાર થઈ શકે છે
સાઉથ આફ્રિકાનો નિયમિત કેપ્ટન ટેમ્બા બાવુમા રાંચીમાં રમાયેલી પહેલી ODIમાં નહતો રમ્યો. તે રાયપુરમાં રમાનારી મેચ માટે પાછો ફરી શકે છે. જો ટેમ્બા રમે છે, તો રાયન રિકલ્ટનને ટીમમાંથી બહાર કરવામાં આવી શકે છે. આવી સ્થિતિમાં એડન માર્કરામ અને ક્વિન્ટન ડી કોક બીજી ODIમાં ઈનિંગની શરૂઆત કરી શકે છે. કેપ્ટન ટેમ્બા બાવુમા ત્રીજા નંબરે જોવા મળી શકે છે. ટ્રિસ્ટન સ્ટબ્સ પણ પહેલી ODIમાં નહતો રમ્યો, તે બીજી મેચમાં રમે તેની શક્યતા ઓછી છે.
ટીમ ઈન્ડિયા કોઈ ફેરફાર વિના ઉતરી શકે છે
ભારતે પહેલી મેચમાં સાઉથ આફ્રિકાને 17 રનથી હરાવ્યું અને ત્રણ મેચની સિરીઝમાં 1-0ની લીડ મેળવી. હવે, ટીમ ઈન્ડિયા સિરીઝ જીતવા માટે રાયપુરમાં ટીમનો સામનો કરશે. આ સિરીઝમાં ટીમ ઈન્ડિયાનો કેપ્ટન કેએલ રાહુલ છે. ટીમ બીજી ODIમાં કોઈ ફેરફાર વગર ઉતરી શકે છે. આવી સ્થિતિમાં, રિષભ પંત અને તિલક વર્માને ફરી એકવાર બેન્ચ પર બેસવું પડશે.