ક્યારે અને કેવી રીતે થઈ વિજય પરેડની શરૂઆત? આજે ઈતિહાસનું પુનરાવર્તન કરશે ટીમ ઈન્ડિયા

T20 વર્લ્ડ કપ 2024ની વિજેતા ભારતીય ટીમ આજે સવારે જ બાર્બાડોસથી નવી દિલ્હી પહોંચી હતી. જે બાદ ટીમને મૌર્ય હોટલ લઈ જવામાં આવી હતી અને બપોરે તમામ ખેલાડીઓ ભારતના વડાપ્રધાન નરેન્દ્ર મોદીને મળ્યા હતા. આખી ટીમ અને સપોર્ટ સ્ટાફે પીએમ મોદી સાથે નાસ્તો પણ કર્યો અને ફોટોશૂટ કરાવ્યા બાદ ટીમ ઈન્ડિયા મુંબઈ માટે રવાના થઈ ગઈ. ભારતીય ક્રિકેટ કંટ્રોલ બોર્ડ (BCCI) અને મુંબઈ ક્રિકેટ એસોસિએશન (MCA)એ ભારતીય ટીમની વિજય પરેડ માટે તૈયારીઓ કરી લીધી છે. પરંતુ શું તમે જાણો છો કે, વિજય પરેડ કેવી રીતે શરૂ થઈ અને ટીમ ઈન્ડિયાની પહેલી વિજય પરેડ ક્યારે થઈ?

વિજય પરેડ ક્યાંથી શરૂ થઈ?

'વિજય પરેડ'ની શરૂઆત પ્રાચીન રોમથી થઈ હતી. જ્યારે જૂના સમયના રાજાઓ યુદ્ધ જીતીને પાછા ફર્યા ત્યારે વિજયની ઉજવણી કરવા માટે વિજય પરેડનું આયોજન કરવામાં આવ્યું હતું. પરંતુ સવાલ એ છે કે, યુદ્ધ અને રમતગમત વચ્ચે શું સંબંધ છે અને રમતગમતમાં વિજય પરેડનો ટ્રેન્ડ ક્યાંથી શરૂ થયો? તો હકીકતમાં અંગ્રેજી ભાષાના કવિ અને નવલકથાકાર જ્યોર્જ ઓરવેલે યુદ્ધની સરખામણી રમત સાથે કરી હતી. ત્યારપછી તેનો ઉપયોગ સ્પોર્ટ્સમાં પણ થયો જે સફળ પણ રહ્યો. ત્યારથી રમતગમતમાં પણ વિજય પરેડની પ્રથા શરૂ થઈ છે.

2007ના વર્લ્ડ કપની જીત બાદ પણ ઉજવણી થઈ

દક્ષિણ આફ્રિકામાં રમાયેલ 2007 T20 વર્લ્ડ કપની ફાઈનલ કોઈ કેવી રીતે ભૂલી શકે, જ્યારે ભારતે પાકિસ્તાનને 5 રનથી હરાવ્યું હતું. એમએસ ધોનીની કપ્તાની હેઠળ, ભારતની યુવા ટીમે પાકિસ્તાનને હરાવીને T20 ક્રિકેટના ઇતિહાસમાં પ્રથમ વિશ્વ ચેમ્પિયન બનવાનું ગૌરવ પ્રાપ્ત કર્યું. આ ઐતિહાસિક જીત બાદ જ્યારે ભારતીય ટીમ મુંબઈ પરત ફરી ત્યારે વર્લ્ડ કપ જીતવાની ઉજવણી કરવા માટે રોડ શોનું આયોજન કરવામાં આવ્યું હતું. તે સમયે પણ વાનખેડે સ્ટેડિયમમાં જ સમગ્ર ટીમ ઈન્ડિયાનું સન્માન કરવામાં આવ્યું હતું. ભારતીય ટીમના તમામ ખેલાડીઓ ખુલ્લી બસમાં મુસાફરી કરી રહ્યા હતા અને ટીમના સમર્થનમાં હજારો ફેન્સની ભીડ રસ્તાઓ પર ઉમટી પડી હતી.