'તેમને બોલવામાં તકલીફ...', વિનોદ કાંબલીના સ્વાસ્થ્ય અંગે તેમના નાના ભાઈએ આપ્યું અપડેટ
છેલ્લું અપડેટ : 21 Aug 2025
વિનોદ કાંબલીના નાના ભાઈ વીરેન્દ્ર કાંબલીએ તેમના સ્વાસ્થ્ય અંગે અપડેટ આપ્યું છે. તેણે જણાવ્યું હતું કે કાંબલી હજુ સંપૂર્ણપણે સ્વસ્થ નથી. તેમને બોલવામાં તકલીફ પડી રહી છે. તમને જણાવી દઈએ કે ગયા વર્ષે ઓક્ટોબરમાં કાંબલી બગડતી તબિયતને કારણે હેડલાઇન્સમાં આવ્યા હતા. તે સમયે તેમને યુરીનમાં ઇન્ફેકશન થયું હતું. જોકે તેઓ પાછળથી સ્વસ્થ થયા હતા, પરંતુ ડિસેમ્બરમાં આ સમસ્યા ફરી વધી ગઈ અને તેમને હોસ્પિટલમાં દાખલ કરવા પડ્યા. તપાસમાં તેમના મગજમાં એક કલોટ મળી આવ્યો હતો. સારવાર અને દેખરેખ પછી તેમને રજા આપવામાં આવી હતી.
તેઓ પહેલા કરતાં વધુ સારા છે, પરંતુ સારવાર ચાલુ છે - વીરેન્દ્ર
કાંબલીની હાલત પહેલા કરતાં વધુ સારી છે, પરંતુ તેમાં વધુ સમય લાગશે. તેમના ભાઈએ જણાવ્યું હતું કે કાંબલી બોલવામાં મુશ્કેલી પડી રહી છે. તેમણે લોકોને પ્રાર્થના કરવા પણ અપીલ કરી છે જેથી કાંબલી જલ્દી સ્વસ્થ થઈ શકે. હાલમાં, તેઓ બાંદ્રા સ્થિત તેમના ઘરે છે અને ચાલવામાં મુશ્કેલીનો સામનો કરી રહ્યા છે.
વીરેન્દ્રએ કહ્યું, "તેઓ અત્યારે ઘરે છે. તેઓ ધીમે ધીમે સ્વસ્થ થઈ રહ્યા છે, પરંતુ સારવાર ચાલુ છે. તેમને બોલવામાં તકલીફ પડી રહી છે. સ્વસ્થ થવામાં સમય લાગશે. પરંતુ તેઓ એક ચેમ્પિયન છે, તેઓ ચોક્કસપણે વાપસી કરશે. મને વિશ્વાસ છે કે તેઓ ચાલશે, દોડશે અને કદાચ મેદાન પર પણ જોવા મળશે."
દરેકના પ્રેમ અને સપોર્ટની જરૂર છે - વીરેન્દ્ર
વીરેન્દ્રએ વધુમાં કહ્યું, "તેમણે 10 દિવસ રિહેબ પણ કરાવ્યું અને તેમના આખા શરીરની તપાસ કરવામાં આવી, જેમાં બ્રેઈન સ્કેન અને યુરીન ટેસ્ટનો સમાવેશ થાય છે. રિપોર્ટ્સમાં કોઈ મોટી સમસ્યા નહતી, પરંતુ ચાલવામાં મુશ્કેલીને કારણે, ડોકટરોએ તેમને ફિઝીયોથેરાપી કરવાની સલાહ આપી. હજુ પણ તેમની જીભ થોડી લથડી રહી છે, પરંતુ તેઓ ધીમે ધીમે સ્વસ્થ થઈ રહ્યા છે. હું ફક્ત એટલું જ કહેવા માંગુ છું કે લોકોએ તેના માટે પ્રાર્થના કરવી જોઈએ. તેમને બધાના પ્રેમ અને સપોર્ટની જરૂર છે."
