VIDEO / IPL 2026 પહેલા વૈભવ સૂર્યવંશીએ પ્રેક્ટિસમાં મચાવી ધમાલ, જોરદાર સિક્સ ફટકારીને તોડી પાણીની પાઈપ લાઈન
છેલ્લું અપડેટ : 20 Feb 2026
ઈન્ડિયન પ્રીમિયર લીગ (IPL) ની 19મી સિઝન શરૂ થવામાં હજુ સમય છે, પરંતુ ઘણી ટીમોએ આગામી સિઝન માટે તૈયારીઓ શરૂ કરી દીધી છે. રાજસ્થાન રોયલ્સ (RR) એ પણ તેના ટ્રેનિંગ કેમ્પ શરૂ કરી દીધા છે, જેમાં 14 વર્ષીય સ્ટાર બેટ્સમેન વૈભવ સૂર્યવંશી સહિત ઘણા ખેલાડીઓ પ્રેક્ટિસ સેશનમાં પરસેવો પાડી રહ્યા છે. આ દરમિયાન, સોશિયલ મીડિયા પર એક વીડિયો સામે આવ્યો છે જેમાં વૈભવ એક શક્તિશાળી પુલ શોટ રમે છે જેનાથી પાણીનો પાઈપ લાઈન તૂટી જાય છે.
વૈભવ સૂર્યવંશી છગ્ગો ફટકારીને તોડી પાણીની પાઈપ લાઈન
રાજસ્થાન રોયલ્સે તેના સોશિયલ મીડિયા એકાઉન્ટ પર એક વીડિયો શેર કર્યો છે, જેમાં વૈભવ સૂર્યવંશીએ પ્રેક્ટિસ દરમિયાન એટલો શક્તિશાળી પુલ શોટ ફટકાર્યો છે કે તેનાથી પાણીની પાઈપ લાઈન તૂટી ગઈ. મેચ હોય કે પ્રેક્ટિસ સેશન, વૈભવ ક્યારેય પોતાની ક્ષમતાઓ દર્શાવવામાં નિષ્ફળ નથી જતો. આ વીડિયો સોશિયલ મીડિયા પર ઝડપથી વાયરલ થઈ રહ્યો છે.
વૈભવ તાજેતરમાં જ 10મા ધોરણની CBSE બોર્ડની પરીક્ષા છોડી દેવાને કારણે સમાચારમાં છે. વૈભવે પરીક્ષા છોડીને ક્રિકેટ પર ધ્યાન કેન્દ્રિત કરવાનો નિર્ણય લીધો છે. મીડિયા રિપોર્ટ્સ અનુસાર, વૈભવના પિતા સંજીવએ જણાવ્યું હતું કે તે ક્રિકેટ પ્રેક્ટિસમાં વ્યસ્ત હોવાથી આ વર્ષે બોર્ડની પરીક્ષા નહીં આપે. વૈભવ હાલમાં રાજસ્થાન રોયલ્સ સાથે છે અને IPL 2026ની તૈયારી કરી રહ્યો છે.
અંડર-19 વર્લ્ડ કપમાં શાનદાર પ્રદર્શન
વૈભવ સૂર્યવંશી તાજેતરમાં અંડર-19 વર્લ્ડ કપ 2026 જીતનાર ભારતીય ટીમનો ભાગ હતો. વૈભવે સમગ્ર વર્લ્ડ કપ દરમિયાન શાનદાર પ્રદર્શન કર્યું અને ફાઈનલમાં રેકોર્ડબ્રેક 175 રન બનાવ્યા હતા. આ શાનદાર પ્રદર્શન માટે તેને 'પ્લેયર ઓફ ધ મેચ' જાહેર કરવામાં આવ્યો. તેણે ટુર્નામેન્ટમાં 7 મેચમાં કુલ 439 રન બનાવ્યા હતા અને ભારતની જીતમાં મુખ્ય ભૂમિકા ભજવી હતી.
વૈભવની IPL કારકિર્દીની વાત કરીએ તો, તેણે 2025ની સિઝનમાં રાજસ્થાન રોયલ્સ માટે ડેબ્યુ કર્યું હતું અને સાત મેચમાં 206.56ના શાનદાર સ્ટ્રાઇક રેટથી 252 રન બનાવ્યા હતા. IPL 2025માં તેણે ગુજરાત ટાઈટન્સ સામે માત્ર 32 બોલમાં તોફાની સદી ફટકારીને હેડલાઈન્સ બનાવી હતી.
