શ્રીલંકાની આ ખેલાડીએ મહિલા એશિયા કપમાં પ્રથમ સદી ફટકારીને રચ્યો ઈતિહાસ! ચોગ્ગા અને છગ્ગાનો થયો વરસાદ

મહિલા T20 એશિયા કપ 2024 હાલમાં શ્રીલંકામાં ચાલી રહ્યો છે. આ ટુર્નામેન્ટની 7મી મેચ એકદમ ઐતિહાસિક બની હતી. આ મેચ શ્રીલંકા અને મલેશિયા વચ્ચે રમાઈ હતી. શ્રીલંકાએ આ મેચમાં મોટા અંતરથી જીત મેળવી હતી. પરંતુ જે બાબત વધુ ચર્ચાનો વિષય બની હતી તે T20 મહિલા એશિયા કપની પ્રથમ સદી હતી, જે શ્રીલંકાની ખેલાડી ચમારી અટાપટ્ટુએ ફટકારી હતી.

T20 મહિલા એશિયા કપમાં અટાપટ્ટુએ ફટકારી સદી

ચમારી અટાપટ્ટુએ રંગીરી દામ્બુલા ઈન્ટરનેશનલ સ્ટેડિયમમાં મલેશિયા સામે શાનદાર ઈનિંગ રમી હતી. પ્રથમ બેટિંગ કરવા આવેલી શ્રીલંકાની ટીમને વિશ્મી ગુણારત્ને વહેલી આઉટ થતાં શરૂઆતી ફટકો પડ્યો હતો. આ પછી કેપ્ટન અટાપટ્ટુ મેદાનમાં આવી અને હર્ષિતા સમરવિક્રમા સાથે 64 રનની પાર્ટનરશિપ કરી. બાદમાં તેણે અનુષ્કા સંજીવની સાથે 115 રનની શાનદાર પાર્ટનરશિપ કરી હતી.

X પર જુઓ

ચમારી અટાપટ્ટુએ 35 બોલમાં તેની અડધી સદી પૂરી કરી અને તેની ટીમ માટે મજબૂત સ્કોર બનાવવાનો માર્ગ મોકળો કર્યો. 18મી ઓવર પછી, તેણે આક્રમક રીતે બેટિંગ કરી, આયના હમીઝા હાશિમ સામે ચોગ્ગા અને બે છગ્ગા ફટકાર્યા હતા. આ પછી, તેણે 19મી ઓવરની શરૂઆત ચોગ્ગાથી કરી અને પછી બે છગ્ગા ફટકારીને આયશા અલિસા પર પ્રભુત્વ જમાવ્યું.

19મી ઓવરમાં ચમારી અટાપટ્ટુએ 63 બોલમાં પોતાની સદી પૂરી કરી હતી. તેણે આ ઐતિહાસિક ક્ષણને વિનફ્રેડ દુરાઈસિંગમની બોલ પર લાંબી સિક્સ ફટકારીને સીલ કરી હતી. તેની શાનદાર ઈ નિંગ્સના કારણે શ્રીલંકાએ નિર્ધારિત 20 ઓવરમાં 184/4નો મજબૂત સ્કોર બનાવ્યો હતો.

અટાપટ્ટુના નામે ત્રણ T20I સદી છે

મલેશિયા સામે, ચમારી અટાપટ્ટુએ 172.46ના સ્ટ્રાઈક રેટથી 69 બોલમાં અણનમ 119 રન બનાવ્યા, જેમાં 14 ચોગ્ગા અને 7 છગ્ગાનો સમાવેશ થાય છે. અટાપટ્ટુની આ ત્રીજી T20 ઈન્ટરનેશનલ સદી છે. અત્યાર સુધી તેણે 136 મેચમાં 24.44ની એવરેજથી 3153 રન બનાવ્યા છે. તેની છેલ્લી બે સદી ઓસ્ટ્રેલિયા અને સ્કોટલેન્ડ સામે આવી હતી. અટાપટ્ટુ હાલમાં સુઝી બેટ્સ, હરમનપ્રીત કૌર, મેગ લેનિંગ, સ્મૃતિ મંધાના, સ્ટેફની ટેલર અને સોફી ડેવાઇન પછી મહિલા T20 ઈન્ટરનેશનલમાં સૌથી વધુ રન બનાવનાર ખેલાડીઓની યાદીમાં સાતમા ક્રમે છે.