IND vs NZ / ન્યુઝીલેન્ડની ધરતી પર ચિંતાજનક છે ટીમ ઈન્ડિયાનો ટેસ્ટ રેકોર્ડ, 17 વર્ષ પહેલા મળી હતી છેલ્લી જીત

T20 અને ODI સિરીઝના સમાપન પછી ભારત અને ન્યુઝીલેન્ડ બે મેચની ટેસ્ટ સિરીઝ રમવા કરવા માટે તૈયાર છે. પહેલી ટેસ્ટ મેચ 19 નવેમ્બરે વેલિંગ્ટનમાં રમાશે, જ્યારે બીજી ટેસ્ટ 27 નવેમ્બરે ક્રાઈસ્ટચર્ચમાં રમાશે. ICC વર્લ્ડ ટેસ્ટ ચેમ્પિયનશિપ (WTC) ની દૃષ્ટિએ આ સિરીઝ ભારત માટે મહત્ત્વપૂર્ણ છે. T20 અને ODI સિરીઝ જીત્યા પછી ટીમ ઈન્ડિયા ટેસ્ટ સિરીઝ પણ જીતવાનું લક્ષ્ય રાખશે. જોકે, ટીમ ઈન્ડિયા માટે ઘરઆંગણે કિવીઓને હરાવવું સરળ નહીં રહે, કારણ કે ન્યુઝીલેન્ડમાં ભારતીય ટેસ્ટ ટીમનું પ્રદર્શન ખરાબ રહ્યું છે. તો, ચાલો ન્યુઝીલેન્ડમાં ભારતના ટેસ્ટ રેકોર્ડ પર એક નજર કરીએ.
1977થી ભારતે ન્યુઝીલેન્ડમાં ફક્ત એક જ ટેસ્ટ જીતી છે
ન્યુઝીલેન્ડમાં ભારતીય ટીમનો ટેસ્ટ રેકોર્ડ ખૂબ જ ખરાબ રહ્યો છે. ટીમ ઈન્ડિયાએ ન્યુઝીલેન્ડની ધરતી પર કુલ 25 ટેસ્ટ મેચ રમી છે, જેમાં ફક્ત પાંચમાં જીત મેળવી છે અને 10માં હારનો સામનો કરવો પડ્યો છે. જ્યારે 10 મેચ ડ્રો રહી છે. ભારતના રેકોર્ડ પર નજર કરીએ તો, ટીમ ઈન્ડિયાએ 1977 પછી ન્યુઝીલેન્ડમાં ફક્ત એક જ ટેસ્ટ મેચ જીતી છે. આ જીત 2009ના પ્રવાસ દરમિયાન હેમિલ્ટનમાં મળી હતી, જ્યાં ટીમ ઈન્ડિયાએ યજમાન ટીમને 10 વિકેટથી હરાવી હતી. ત્યારબાદ સિરીઝની બીજી અને ત્રીજી મેચ ડ્રો રહી હતી, જેના કારણે ત્રણ મેચની ટેસ્ટ સિરીઝમાં ભારતનો 1-0થી વિજય થયો હતો.
તે પ્રવાસ પછી ટીમ ઈન્ડિયા બે વાર ન્યુઝીલેન્ડનો પ્રવાસ કરી ચૂકી છે, પરંતુ એક પણ ટેસ્ટ મેચ નથી જીતી શકી. 2013-14માં, ભારત એક મેચ હારી ગયું હતું અને બીજી ડ્રો રહી હતી. જ્યારે 2019-20ના પ્રવાસ દરમિયાન ન્યુઝીલેન્ડે ટીમ ઈન્ડિયાને ક્લીન સ્વીપ કરી હતી, બંને ટેસ્ટ મેચ જીતી હતી.
ભારતે ન્યુઝીલેન્ડમાં ફક્ત બે ટેસ્ટ સિરીઝ જીતી છે
ટીમ ઈન્ડિયાએ પહેલીવાર 1968માં ન્યુઝીલેન્ડનો પ્રવાસ કર્યો હતો. ત્યારથી, ટીમ ઈન્ડિયાએ ન્યુઝીલેન્ડની ધરતી પર કુલ 10 ટેસ્ટ સિરીઝ રમી છે, પરંતુ માત્ર બે જ જીતી છે. જોકે, ભારતે ન્યુઝીલેન્ડના પોતાના પહેલા જ પ્રવાસમાં ઈતિહાસ રચ્યો હતો. ટીમ ઈન્ડિયાએ ન્યુઝીલેન્ડની ધરતી પર ટેસ્ટ ક્રિકેટમાં વિદેશમાં પહેલી ટેસ્ટ સિરીઝ જીત મેળવી. નવાબ મન્સૂર અલી ખાન પટૌડીની કેપ્ટનશિપમાં ટીમ ઈન્ડિયાએ ચાર મેચની ટેસ્ટ સિરીઝ 3-1થી જીતી હતી. આ પછી ભારતને ન્યુઝીલેન્ડમાં બીજી ટેસ્ટ સિરીઝ જીતવા માટે 41 વર્ષ રાહ જોવી પડી.
2009માં એમએસ ધોનીની કેપ્ટનશિપમાં ટીમ ઈન્ડિયાએ આ રાહનો અંત લાવ્યો અને ન્યુઝીલેન્ડને તેની જ ધરતી પર ટેસ્ટ સિરીઝમાં હરાવ્યું. આ બે સિરીઝ જીત સિવાય ભારતને ઘણી વખત નિરાશાનો સામનો કરવો પડ્યો. આ સમયગાળા દરમિયાન કેટલીક સિરીઝ ડ્રોમાં સમાપ્ત થઈ, જ્યારે ન્યુઝીલેન્ડે છ ટેસ્ટ સિરીઝ જીતી. દરમિયાન ન્યુઝીલેન્ડે તેના છેલ્લા ટેસ્ટ પ્રવાસ દરમિયાન ભારતને તેના ઘરઆંગણે 3-0થી હરાવ્યું. ટીમ ઈન્ડિયા તે હારનો બદલો લેવા અને કિવીઓને તેના જ મેદાન પર હરાવવાનું લક્ષ્ય રાખશે.






