IND vs AUS / ટીમ ઈન્ડિયા માટે સારા સમાચાર, પર્થ ટેસ્ટ પહેલા ફિટ થઈ ગયો સ્ટાર બેટ્સમેન

ભારત અને ઓસ્ટ્રેલિયા વચ્ચે પાંચ મેચની ટેસ્ટ સિરીઝ રમાશે. આ સિરીઝ માટે ટીમ ઈન્ડિયા ઓસ્ટ્રેલિયા પહોંચી ગઈ છે. જ્યાં ભારતીય ખેલાડીઓ સખત મહેનત કરી રહ્યા છે. ભારત અને ઓસ્ટ્રેલિયા બંનેએ સિરીઝ માટે પોતાની ટીમની પણ જાહેરાત કરી દીધી છે. આ દરમિયાન સમાચાર સામે આવ્યા હતા કે ટીમ ઈન્ડિયાના કેટલાક ખેલાડીઓ પ્રેક્ટિસ સેશન દરમિયાન ઈજાગ્રસ્ત થયા છે. ત્યારે એવી વાત પણ સામે આવી હતી કે આ ઈજાગ્રસ્ત ખેલાડી સિરીઝની પ્રથમ મેચ ચૂકી શકે છે. આ ખેલાડીઓ શુભમન ગિલ, કેએલ રાહુલ અને સરફરાઝ ખાન છે, પરંતુ હવે આ ત્રણમાંથી એક ખેલાડી ફિટ થઈ ગયો છે અને ફરી એકવાર પ્રેક્ટિસ કરવા મેદાનમાં ઉતર્યો છે. આ ખેલાડી બીજું કોઈ નહીં પણ કેએલ રાહુલ છે.

આ પણ વાંચો: Champions Trophy 2025 / પાકિસ્તાનથી ભારત આવશે ચેમ્પિયન્સ ટ્રોફી, ICCએ કરી જાહેરાત

પ્રેક્ટિસ કરવા મેદાનમાં આવ્યો હતો

ટીમ ઈન્ડિયાના ખેલાડીઓ મેચ સિમ્યુલેશનમાં ભાગ લઈ રહ્યા છે. જ્યાં ભારતીય ખેલાડીઓ બે ટીમ બનાવીને મેચ રમી રહ્યા છે. આ દરમિયાન કેએલ રાહુલને જમણા હાથની કોણીમાં ઈજા થઈ હતી. જેના કારણે તેને મેચની વચ્ચે જ બહાર જવું પડ્યું હતું. રાહુલની આ ઈજાએ ફેન્સની ચિંતા વધારી દીધી હતી, પરંતુ ફરી એકવાર કેએલ રાહુલ 17 નવેમ્બરે પ્રેક્ટિસ કરવા મેદાનમાં આવ્યો છે. કેએલ રાહુલ આ સિરીઝ માટે ટીમ ઈન્ડિયાનો મહત્ત્વનો ભાગ છે. જો તે ઈજાના કારણે સિરીઝની પ્રથમ મેચ રમી ન શક્યો હોત તો ટીમ ઈન્ડિયાને મોટું નુકસાન થયું હોત.

રાહુલ ઓપન કરી શકે છે

ભારતીય ટીમના કેપ્ટન રોહિત શર્મા હાલ ભારતમાં જ છે. રોહિત શર્મા 15 નવેમ્બરની રાત્રે બીજી વખત પિતા બન્યો છે. તેની પત્ની રિતિકા સજદેહે પુત્રને જન્મ આપ્યો છે. જેના કારણે આ સમયે રોહિત શર્મા તેના પરિવાર સાથે હાજર છે. માનવામાં આવી રહ્યું છે કે રોહિત શર્મા પર્થ ટેસ્ટ ચૂકી શકે છે. આવી સ્થિતિમાં રોહિત શર્માની જગ્યાએ કેએલ રાહુલ આ મેચમાં ટીમ ઈન્ડિયા માટે ઓપનરની ભૂમિકા ભજવી શકે છે. કેએલ આ પહેલા પણ ટીમ ઈન્ડિયા માટે ઓપનિંગ કરી ચૂક્યો છે. આવી સ્થિતિમાં ટીમ ઈન્ડિયા માટે કેએલ રાહુલને ફિટ રાખવો ખૂબ જ જરૂરી છે.