પહેલીવાર હેડ કોચ બન્યો સૌરવ ગાંગુલી, અચાનક મળી ગઈ આ ટીમની જવાબદારી
છેલ્લું અપડેટ : 25 Aug 2025
ભારતીય ક્રિકેટ દિગ્ગજ અને ભૂતપૂર્વ કેપ્ટન સૌરવ ગાંગુલીએ પોતાની નવી ઈનિંગ શરૂ કરી છે. તે ટૂંક સમયમાં કોઈ મોટી ક્રિકેટ લીગમાં હેડ કોચ તરીકે કામ કરતો જોવા મળશે. આ પહેલીવાર હશે જ્યારે તે હેડ કોચ તરીકે કોઈ ટીમમાં જોડાશે. તાજેતરમાં, તેણે ટીમ ઈન્ડિયાના કોચ બનવાની ઈચ્છા પણ વ્યક્ત કરી હતી. તેણે કહ્યું હતું કે, "હું ભારતીય ટીમનો કોચ બનવા માટે તૈયાર છું." આવી સ્થિતિમાં, તેના નિર્ણયને એક મોટું પગલું માનવામાં આવી રહ્યું છે.
સૌરવ ગાંગુલીને આ ટીમનો હેડ કોચ બનાવ્યા
સાઉથ આફ્રિકાની T20 લીગ SA20ની આગામી સિઝન માટે પ્રિટોરિયા કેપિટલ્સના હેડ કોચ તરીકે સૌરવ ગાંગુલીની નિમણૂક કરવામાં આવી છે. ગાંગુલી માટે કોઈ પ્રોફેશનલ ક્રિકેટ ટીમ સાથે ફૂલ ટાઈમ કોચિંગનો આ પહેલો અનુભવ હશે. પ્રિટોરિયા કેપિટલ્સે સોશિયલ મીડિયા પર એક પોસ્ટ શેર કરીને ગાંગુલીની નિમણૂકની સત્તાવાર જાહેરાત કરી હતી. ફ્રેન્ચાઈઝીએ સોશિયલ મીડિયા પર 'કોલકાતાના રાજકુમાર' માટે નવી શરૂઆત ગણાવી અને કહ્યું, "અમે સૌરવ ગાંગુલીને અમારા નવા હેડ કોચ તરીકે જાહેર કરતા ખૂબ ખુશ છીએ."
ગાંગુલીની નિમણૂક ઈંગ્લેન્ડના ભૂતપૂર્વ બેટ્સમેન જોનાથન ટ્રોટના કોચ પદ પરથી રાજીનામું આપ્યાના એક દિવસ પછી આવી છે, જેણે ગયા સિઝનમાં ટીમનો હવાલો સંભાળ્યો હતો. હવે સૌરવ ગાંગુલી આ જવાબદારી સંભાળતો જોવા મળશે. ક્રિકેટમાં સૌરવ ગાંગુલીના યોગદાનને કોઈ પરિચયની જરૂર નથી. ભારતીય ક્રિકેટને મજબૂત બનાવવામાં તેની કેપ્ટનશિપની ઐતિહાસિક ભૂમિકા રહી છે. તેણે BCCI પ્રમુખ તરીકે પણ યોગદાન આપ્યું હતું. તાજેતરમાં, તે IPL અને WPLમાં ક્રિકેટ ડિરેક્ટર તરીકે દિલ્હી કેપિટલ્સ સાથે સંકળાયેલો હતો.
ટીમ ગઈ સિઝનમાં ખરાબ સ્થિતિમાં હતી
SA20ની આગામી સિઝન 26 ડિસેમ્બર 2025થી 25 જાન્યુઆરી 2026 સુધી ચાલશે. ગાંગુલી પાસે પ્રિટોરિયા કેપિટલ્સને ગઈ સિઝનની નિરાશામાંથી બહાર કાઢવાનો અને તેને ટાઈટલ રેસમાં લાવવાનો પડકાર હશે. ફ્રેન્ચાઈઝી પહેલી સિઝનમાં ફાઈનલમાં પહોંચી હતી, પરંતુ 2025માં તેનું પ્રદર્શન ખૂબ જ ખરાબ રહ્યું હતું.
