સ્મૃતિ મંધાના અને પલાશ મુછાલના લગ્નની અટકળો તેજ, પલાશે સંબંધની પુષ્ટિ કરી
છેલ્લું અપડેટ : 19 Oct 2025
ભારતીય મહિલા ક્રિકેટ ટીમની સ્ટાર ખેલાડી સ્મૃતિ મંધાના હાલમાં ઇન્દોરમાં છે, જ્યાં ભારત આજે ઇંગ્લેન્ડ સામે વર્લ્ડ કપની મહત્વપૂર્ણ મેચ (IND-W vs ENG-W) રમવા જઈ રહ્યું છે. અગાઉ, સમાચાર આવ્યા હતા કે મંધાના ઇન્દોરની પુત્રવધૂ બનવા જઈ રહી છે, આ વાતની પુષ્ટિ તે જ વ્યક્તિ દ્વારા કરવામાં આવી, જેની સાથે મંધાનાના લગ્ન થશે તેવી ચર્ચા ચાલી રહી છે.
પલાશે જ કર્યો સંબંધનો ખુલાસો
ફિલ્મ નિર્માતા અને ગાયક પલાશ મુછાલે જ તેમના સંબંધોનો ખુલાસો કર્યો છે, જેના કારણે તેમના લગ્નના સમાચાર હેડલાઇનમાં છે. એક સમાચાર એજન્સીને ટાંકીને મીડિયા રિપોર્ટ્સમાં જણાવાયું છે કે પલાશે કહ્યું કે, ક્રિકેટર સ્મૃતિ મંધાના ટૂંક સમયમાં ઇન્દોરની વહુ બનશે. નોંધનીય છે કે, સ્મૃતિ હાલમાં ઇન્દોરમાં છે. આજે ભારતીય ટીમ ઇન્દોરના હોલકર સ્ટેડિયમમાં ઇંગ્લેન્ડ સામે ICC મહિલા ODI વર્લ્ડ કપ 2025ની તેની પાંચમી મેચ રમશે.
પ્રથમ બે મેચમાં શ્રીલંકા અને પાકિસ્તાનને હરાવ્યા બાદ, ભારતીય ટીમ વર્લ્ડ કપમાં સતત બે મેચ હાર્યા બાદ મુશ્કેલીમાં મુકાઈ ગઈ છે. ટીમ ઇન્ડિયાનો ઓસ્ટ્રેલિયા અને દક્ષિણ આફ્રિકા સામે પરાજય થયો હતો.
આ બધાની વચ્ચે સ્મૃતિ મંધાના અને પલાશ મુછાલના સંબંધો વિશેની અટકળો ચાલી રહી છે અને આ પહેલી વાર છે જ્યારે તેમના સંબંધો વિશે જાહેરમાં કોઈ નક્કર સમાચાર સામે આવ્યા છે. એવા અહેવાલ છે કે, 30 વર્ષીય પલાશ અનેે 29 વર્ષીય સ્મૃતિ 2019થી એકબીજાને ડેટ કરી રહ્યા છે.
