પહેલી જ સિરીઝમાં કેપ્ટન શુભમન ગિલે કર્યું કારનામુ, આ મામલે રોહિત શર્માને પાછળ છોડ્યો

ભારતીય ટીમે ઝિમ્બાબ્વે સામેની પાંચમી T20 મેચ 42 રને જીતી લીધી છે. ટીમ ઈન્ડિયા માટે બોલરો અને બેટ્સમેનોએ શાનદાર પ્રદર્શન કર્યું હતું. ઝિમ્બાબ્વેના કેપ્ટન સિકંદર રઝાએ ટોસ જીતીને બોલિંગ કરવાનો નિર્ણય લીધો હતો. ભારતીય ટીમે ઝિમ્બાબ્વેને જીતવા માટે 168 રનનો ટાર્ગેટ આપ્યો હતો. જે ઝિમ્બાબ્વેની ટીમ હાંસલ ન કરી શકી અને 125 રનમાં ઓલઆઉટ થઈ ગઈ હતી. આ મેચ જીત્યા બાદ ટીમ ઈન્ડિયાએ સિરીઝ 4-1થી જીતી લીધી હતી. કેપ્ટન તરીકે શુભમન ગિલની આ પ્રથમ સિરીઝ હતી અને તેણે આ સિરીઝમાં સારું પ્રદર્શન કર્યું હતું.

શુભમન ગિલે રોહિત શર્માને પાછળ છોડ્યો

શુભમન ગિલે ઝિમ્બાબ્વે સામેની સિરીઝમાં બે અડધી સદી ફટકારી હતી. તેણે ટીમ ઈન્ડિયાની જીતમાં મહત્ત્વની ભૂમિકા ભજવી હતી. તેણે આ સિરીઝમાં 31, 2, 66, 58 અને 13 રનની ઈનિંગ્સ રમી અને કુલ 170 રન બનાવ્યા હતા. T20 સિરીઝમાં ભારતીય કેપ્ટન તરીકે સૌથી વધુ રન બનાવવાના મામલે તે ત્રીજા સ્થાને પહોંચી ગયો છે. તેણે રોહિત શર્માને પાછળ છોડી દીધો છે. હવે તેનાથી આગળ માત્ર વિરાટ કોહલી છે. રોહિત શર્માએ 2017ની T20 સિરીઝમાં શ્રીલંકા સામે કેપ્ટન તરીકે 162 રન બનાવ્યા હતા. આ યાદીમાં વિરાટ કોહલી પ્રથમ નંબરે છે. તેણે વર્ષ 2021માં ઈંગ્લેન્ડ સામે T20 સિરીઝમાં કેપ્ટન તરીકે 231 રન બનાવ્યા હતા.

T20 સિરીઝમાં સૌથી વધુ રન બનાવનાર ભારતીય કેપ્ટન

• 231 રન, વિરાટ કોહલી vs ઈંગ્લેન્ડ, 2021
• 183 રન, વિરાટ કોહલી vs વેસ્ટ ઈન્ડિઝ, 2019
• 170 રન, શુભમન ગિલ vs ઝિમ્બાબ્વે, 2024
• 162 રન, રોહિત શર્મા vs શ્રીલંકા, 2017
• 159 રન, રોહિત શર્મા vs ન્યુઝીલેન્ડ, 2021

કેપ્ટન તરીકે શુભમન ગિલનો રેકોર્ડ

હાર્દિક પંડ્યા, જસપ્રિત બુમરાહ અને અક્ષર પટેલ જેવા સિનીયર પ્લેયર્સને ઝિમ્બાબ્વે પ્રવાસ માટે આરામ આપવામાં આવ્યો હતો. આ કારણે શુભમન ગિલને કેપ્ટનશિપની જવાબદારી મળી હતી. તેણે પાંચ T20 આંતરરાષ્ટ્રીય મેચોમાં ટીમ ઈન્ડિયાની કમાન સંભાળી હતી, જેમાંથી ટીમ ઈન્ડિયા ચારમાં જીતી હતી. જ્યારે એક મેચમાં હારનો સામનો કરવો પડ્યો હતો.

ઝિમ્બાબ્વે સામેની પાંચમી T20 મેચમાં ભારતીય ટીમ માટે સંજુ સેમસને 58 રન બનાવ્યા હતા. આ સિવાય મુકેશ કુમારે બોલિંગમાં શાનદાર પ્રદર્શન કરીને 4 વિકેટ પોતાના નામે કરી હતી. શિવમ દુબેએ પણ બોલ અને બેટથી સારું પ્રદર્શન કર્યું હતું. તેણે 26 રન બનાવ્યા અને 2 વિકેટ પણ લીધી હતી. દુબેને તેના ઓલરાઉન્ડ પ્રદર્શનના કારણે પ્લેયર ઓફ ધ મેચનો એવોર્ડ મળ્યો હતો.