હાર બાદ સંજુ સેમસનને વધુ એક ઝટકો, દોષી સાબિત થતા BCCIએ આપી મોટી સજા

બુધવારે ગુજરાત ટાઇટન્સ સામે રમાયેલી મેચમાં રાજસ્થાન રોયલ્સને 3 વિકેટથી હારનો સામનો કરવો પડ્યો હતો. આ હાર બાદ રાજસ્થાન રોયલ્સને વધુ એક મોટો ફટકો પડ્યો છે. હારના દુ:ખ વચ્ચે રાજસ્થાન રોયલ્સના કેપ્ટન સંજુ સેમસન માટે અચાનક એક ખરાબ સમાચાર આવ્યા છે. સંજુ સેમસને આ મેચમાં 38 બોલમાં 68 રનની વિસ્ફોટક ઇનિંગ રમી હતી. સંજુ સેમસને 178.95ના સ્ટ્રાઈક રેટથી બેટિંગ કરી અને 7 ચોગ્ગા અને 2 છગ્ગા ફટકાર્યા.

સંજુ સેમસન દોષિત સાબિત થયો

સંજુ સેમસનને તેની એક ભૂલને કારણે 12 લાખ રૂપિયાનું નુકસાન ભોગવવું પડ્યું છે. વાસ્તવમાં રાજસ્થાન રોયલ્સના કેપ્ટન સંજુ સેમસનને IPLની આચાર સંહિતાનું ઉલ્લંઘન કરવા બદલ 12 લાખ રૂપિયાનો દંડ ફટકારવામાં આવ્યો છે. IPL 2024 સિઝનમાં સંજુ સેમસનનો આ પહેલો ગુનો હતો. બીસીસીઆઈએ સંજુ સેમસનને સ્લો ઓવર રેટ માટે દોષિત જાહેર કર્યા બાદ આ સજા આપી  છે કારણ કે, રાજસ્થાન રોયલ્સની ટીમ નિર્ધારિત સમયમાં 20 ઓવર પૂરી કરવામાં નિષ્ફળ રહી હતી.

BCCIએ આપી મોટી સજા

સ્લો ઓવર રેટના કારણે રાજસ્થાન રોયલ્સે ગુજરાત ટાઇટન્સ સામેની IPL મેચની છેલ્લી ઓવરમાં 4ને બદલે 5 ખેલાડીઓને 30 યાર્ડની અંદર રાખવા પડ્યા હતા. IPLએ એક પ્રેસ રિલીઝ જારી કરીને કહ્યું કે, 'રાજસ્થાન રોયલ્સના કેપ્ટન સંજુ સેમસનને 10 એપ્રિલે ગુજરાત ટાઇટન્સ સામેની મેચ દરમિયાન IPL આચાર સંહિતા હેઠળ સ્લો ઓવર રેટ માટે દોષી ઠેરવવામાં આવ્યો છે. સ્લો ઓવર રેટ સંબંધિત આ સિઝનમાં સંજુ સેમસનનો પહેલો ગુનો હોવાથી તેને 12 લાખ રૂપિયાનો દંડ ફટકારવામાં આવ્યો છે.

આગલી વખતે દંડ મોટો થશે

જો રાજસ્થાન રોયલ્સનો કેપ્ટન સંજુ સેમસન ફરીથી સ્લો ઓવર રેટ માટે દોષિત થશે તો તેના પર 24 લાખ રૂપિયાનો દંડ થશે. સાથે જ ટીમના બાકીના ખેલાડીઓને 6 લાખ રૂપિયા અથવા મેચ ફીના 25% દંડ ફટકારવામાં આવશે. IPL 2024માં દિલ્હી કેપિટલ્સના કેપ્ટન ઋષભ પંતને બે વખત અને ગુજરાત ટાઇટન્સના કેપ્ટન શુભમન ગિલને સ્લો ઓવર રેટ માટે એક વખત દંડ ફટકારવામાં આવ્યો છે. નિયમો અનુસાર, જો કેપ્ટન IPL સિઝનમાં ત્રણ વખત સ્લો ઓવર રેટ માટે દોષી સાબિત થાય છે, તો 30 લાખ રૂપિયાના દંડ ઉપરાંત, તેના પર એક IPL મેચ માટે પ્રતિબંધ મૂકવામાં આવશે. તેમજ ઇમ્પેક્ટ પ્લેયર સહિત પ્લેઇંગ ઇલેવનના અન્ય ખેલાડીઓ પર 12 લાખ રૂપિયા અથવા મેચ ફીના 50% દંડ ફટકારવામાં આવશે.