IND A vs NZ A / સાઈ સુદર્શન અને ધ્રુવ જુરેલ સદી ચૂકી ગયા, ત્રીજી મેચમાં ભારતીય ટીમ મજબૂત સ્થિતિમાં
ભારતીય ક્રિકેટ ટીમના સ્ટાર ખેલાડીઓ ઈન્ડિયા A તરફથી ન્યુઝીલેન્ડ A સામે રમી રહ્યા છે. ઈન્ડિયા Aના સ્ટાર ખેલાડીઓ લિંકનના બર્ટ સટક્લિફ ઓવલ ખાતે શાનદાર પ્રદર્શન કરી રહ્યા છે. યશસ્વી જયસ્વાલે પહેલા દિવસે શાનદાર સદી ફટકારી હતી. બીજા દિવસે સાઈ સુદર્શન અને કેપ્ટન ધ્રુવ જુરેલે ઉત્તમ ઈનિંગ્સ રમી હતી, પરંતુ તેઓ સદી ફટકારવામાં નિષ્ફળ ગયા. આ બંને ખેલાડીઓની શાનદાર ઈનિંગ્સે મેચમાં ઈન્ડિયા Aની સ્થિતિ મજબૂત બનાવી છે.
સાઈ સુદર્શને શાનદાર ઈનિંગ્સ રમી હતી
ઓપનિંગ બેટ્સમેન સાઈ સુદર્શને પહેલા દિવસે 77 રન બનાવ્યા હતા. જોકે, તેણે બીજા દિવસે વધુ 11 રન ઉમેર્યા હતા, જેના પરિણામે તે 255 બોલમાં 88 રન બનાવીને પવેલિયન પરત ફર્યો હતો. સુદર્શને આ સિરીઝમાં કેટલીક સારી ઈનિંગ્સ રમી છે. આ મેચની બીજી ઈનિંગમાં સદી ફટકારીને સુદર્શન મુખ્ય ટીમની પ્લેઈંગ ઈલેવનમાં સ્થાન મેળવી શકે છે. સુદર્શને આ ઈનિંગમાં કુલ 11 ફોર ફટકારી હતી.
વિકેટકીપર-બેટ્સમેન અને કેપ્ટન ધ્રુવ જુરેલે પહેલા દિવસના અંતે 12 રન બનાવ્યા હતા. બીજા દિવસે તેણે 95 બોલમાં 9 ફોર અને 2 જબરદસ્ત છગ્ગા ફટકારીને 71 રન બનાવ્યા હતા. જુરેલે અગાઉ બીજી મેચમાં શાનદાર સદી ફટકારી હતી. ટેસ્ટ સિરીઝની શરૂઆત પહેલા જુરેલ સતત રન બનાવી રહ્યો છે, જેનાથી ભારતીય ટીમનો આત્મવિશ્વાસ વધ્યો છે. જુરેલ ભવિષ્યમાં પણ આ પ્રકારનું પ્રદર્શન કરતો રહેશે.
ઈન્ડિયા A ટીમનું શાનદાર પ્રદર્શન
પહેલા દિવસે યશસ્વી જયસ્વાલે 102 રન બનાવ્યા હતા, જ્યારે દેવદત્ત પડિક્કલ માત્ર 15 રન બનાવીને આઉટ થયા હતા. બીજા દિવસે, સાઈ સુદર્શન અને કેપ્ટન ધ્રુવ જુરેલે સારી બેટિંગ કરી હતી. ઈન્ડિયા Aના સ્ટાર બેટ્સમેન તિલક વર્માએ 164 બોલમાં ચાર ચોગ્ગા ફટકારીને અણનમ 81 રન બનાવીને અણનમ રહ્યો. અનુભવી ઓલરાઉન્ડર રવિન્દ્ર જાડેજાએ આ મેચમાં 25 રન બનાવ્યા.
સ્પિન ઓલરાઉન્ડર વોશિંગ્ટન સુંદર પણ 107 બોલમાં 50 રન બનાવીને અણનમ રમી રહ્યો છે. બીજા દિવસે ત્રીજા સેશનમાં ઈન્ડિયા Aએ પાંચ વિકેટ ગુમાવીને 464 રન બનાવીને પહેલી ઈનિંગ ડિક્લેર કરી. બોલિંગ વિભાગમાં જસપ્રીત બુમરાહ અને પ્રસિદ્ધ કૃષ્ણ જેવા મેચ વિજેતા બોલર્સ પાસેથી અપેક્ષા છે, જ્યારે મુકેશ કુમાર અને મુકેશ ચૌધરી પણ ટીમમાં છે.
