નીરજ ચોપરા ક્યારે પાર કરશે 90 મીટરનો આંકડો? ગોલ્ડન બોયે પોતે આપ્યો જવાબ

પેરિસ ઓલિમ્પિક 2024માં સિલ્વર મેડલ જીતનાર ભારતના સ્ટાર જેવલિન થ્રોઅર નીરજ ચોપરા માટે 90 મીટરનું અંતર પાર કરવું હજુ પણ મોટો પડકાર છે. લગભગ બે વર્ષ પહેલા સ્ટોકહોમ ડાયમંડ લીગમાં નીરજે 89.94 મીટરનો થ્રો કર્યો હતો જે તેની કારકિર્દીનો સૌથી લાંબો થ્રો હતો. પરંતુ 90 મીટરનું જાદુઈ અંતર હજુ પણ તેનાથી માત્ર 0.06 મીટર દૂર છે. અનેક પ્રયાસો છતાં આ અંતર પાર ન કરી શકયા બાદ નીરજે હવે આ પડકાર ભગવાન પર છોડવાનો નિર્ણય કર્યો છે.

નીરજ ચોપરા લાંબા સમયથી 90 મીટરના આ પડકારનો સામનો કરી રહ્યો છે, પરંતુ પેરિસ ઓલિમ્પિક 2024માં તેનો એકમાત્ર માન્ય થ્રો 89.45 મીટર હતો, જે તેને બીજા સ્થાને લઈ ગયો. સતત બીજી ઓલિમ્પિકમાં મેડલ જીતવો નીરજ માટે ગર્વની વાત છે, પરંતુ પાકિસ્તાનના અરશદ નદીમના 92.97 મીટરના શાનદાર થ્રોએ તેને ગોલ્ડ મેડલથી વંચિત રાખ્યો હતો.

નીરજ ચોપરાએ હવે 90 મીટરનું લક્ષ્ય ભગવાન પર છોડી દીધું

મીડિયા સાથે વાત કરતાં નીરજ ચોપરાએ કહ્યું- "હવે હું ભગવાન પર છોડી દઉં છું. મેં મારા શ્રેષ્ઠ પ્રયાસો કર્યા છે અને હવે હું જોવા માંગુ છું કે મારી તૈયારીનું શું પરિણામ આવે છે. 90 મીટર વિશે પહેલેથી જ ઘણી વાતો થઈ રહી છે. હવે હું તેને ભગવાન પર છોડી દઉં છું પેરિસમાં મેં વિચાર્યું કે તે થઈ શકે છે."

નીરજ ચોપરા પીઠની ઈજાથી પરેશાન છે

નીરજ ચોપરાએ એમ પણ કહ્યું હતું કે તે તેની આગામી બે-ત્રણ ઈવેન્ટમાં 100 ટકા આપવાનો પ્રયત્ન કરશે અને જોશે કે પરિણામ શું આવે છે. 13-14 સપ્ટેમ્બરના રોજ બ્રસેલ્સમાં ડાયમંડ લીગ પછી, નીરજ તેની પીઠની ઈજા માટે ડોકટરોની સલાહ લેશે અને જો શક્ય હશે તો સર્જરી પણ કરાવશે.

નીરજ ચોપરાએ એ વાત પર પણ ભાર મૂક્યો હતો કે તેની ઈજાના કારણે તે તેના પ્રદર્શનમાં વધુ સુધારો કરી શકતો નથી. તેણે કહ્યું- "મેં વિચાર્યું કે હું અંતર વધારી શકતો હતો, પરંતુ મારી ઈજાએ મને રોકી દીધો. મારી ક્વોલિફિકેશન અને અંતિમ થ્રો બંને સિઝનના મારા બેસ્ટ થ્રોમાં હતા. પરંતુ અંતર વધારવા માટે, માટે સંપૂર્ણપણે ઈજા મુક્ત થવું પડશે."