કૃણાલ પંડ્યાએ હાર્દિક સાથેના અણબનાવની અટકળો પર તોડ્યું મૌન, કહ્યું- ' પંડ્યા પરિવારના ઘરમાં 10 ટ્રોફી...'
છેલ્લું અપડેટ : 05 Jun 2026
ભારતીય ક્રિકેટ જગતની સૌથી લોકપ્રિય ભાઈઓની જોડી એટલે કે હાર્દિક પંડ્યા અને કૃણાલ પંડ્યા વચ્ચે ખરાબ સંબંધો હોવાની અફવાઓ છેલ્લા કેટલાક સમયથી સોશિયલ મીડિયા પર જોર પકડી રહી હતી. IPL 2026 દરમિયાન જ્યારે વાનખેડે સ્ટેડિયમમાં મુંબઈ ઈન્ડિયન્સ (MI) અને રોયલ ચેલેન્જર્સ બેંગલુરુ (RCB) વચ્ચે મેચ રમાઈ, ત્યારે બંને ભાઈઓ એકબીજા સાથે ખૂબ જ શાંત અને ઉદાસીન દેખાતા હતા. મેચ દરમિયાન કૃણાલે હાર્દિકને બાઉન્સર ફેંક્યો હતો અને હાર્દિક આઉટ થયો ત્યારે કૃણાલે જોરદાર સેલિબ્રેશન પણ કર્યું હતું, જેના કારણે ફેન્સે અટકળો શરૂ કરી દીધી હતી કે બંને ભાઈઓ વચ્ચે હવે પહેલા જેવો પ્રેમ રહ્યો નથી.
RCB તરફથી રમતા અને તાજેતરમાં જ IPL 2026ની ટ્રોફી જીતનારા કૃણાલ પંડ્યાએ એક ઇન્ટરવ્યુમાં આ તમામ અફવાઓ પર પૂર્ણવિરામ મૂકી દીધું છે અને હાર્દિક સાથેના પોતાના ખાસ બોન્ડ વિશે ખૂલીને વાત કરી છે.
અમારી વચ્ચે હંમેશાં ક્રિકેટને લઈને તંદુરસ્ત ચર્ચાઓ થાય છે: કૃણાલ પંડ્યા
પોતાના નાના ભાઈ હાર્દિક પંડ્યા સાથેના સંબંધો અને ક્રિકેટિંગ સફર વિશે વાત કરતાં કૃણાલ પંડ્યાએ જણાવ્યું કે, "સ્વાભાવિક છે કે અમે બંને સાથે રમ્યા છીએ. ટેક્ટિકલ અને ટેકનિકલ બાબતોને લઈને અમારી વચ્ચે હંમેશાં ક્રિકેટ પર ખૂબ જ તંદુરસ્ત અને સારી ચર્ચાઓ થાય છે, જે અમને બંનેને એક ખેલાડી તરીકે બહેતર બનવામાં હંમેશાં મદદ કરે છે."
તેણે આગળ ઉમેર્યું કે, "જ્યારે પોતાનો ભાઈ પણ એ જ રમત રમી રહ્યો હોય, ત્યારે એ એકબીજાને માટે આગળ વધવામાં ખૂબ મદદરૂપ સાબિત થાય છે. જો હું અમારા પરિવારની સામૂહિક સફળતા અને ટ્રોફીની વાત કરું, તો પંડ્યા પરિવારના ઘરમાં 10 IPL ટ્રોફી હોવી એ કોઈ નાની વાત નથી. ભગવાન અમારા પર ખૂબ દયાળુ રહ્યા છે."
તમને જણાવી દઈએ કે પંડ્યા બ્રધર્સના નામે હવે 5-5 IPL ટ્રોફી છે. હાર્દિકે 4 ટ્રોફી MI સાથે અને 1 GTના કેપ્ટન તરીકે જીતી છે, જ્યારે કૃણાલે 3 ટ્રોફી MI સાથે અને 2 ટ્રોફી RCB સાથે જીતી છે.
IPL ટ્રોફી જીતવી એ બાળકો હોવા જેવું છે, તમે પસંદગી ન કરી શકો!
અમદાવાદમાં રમાયેલી ફાઈનલ મેચમાં ચેમ્પિયન બન્યા બાદ IPL ટ્રોફીના મહત્ત્વ વિશે વાત કરતાં કૃણાલે એક રસપ્રદ ઉદાહરણ આપ્યું હતું. કૃણાલે કહ્યું કે, "તેમાં કોઈ શંકા નથી કે દરેક IPL ટ્રોફી ખાસ હોય છે. આ બિલકુલ બાળકો હોવા જેવું છે, બરાબર ને? જેમ તમે તમારા બાળકોમાંથી કોઈ એકની પસંદગી ન કરી શકો, તેવી જ રીતે IPL ટ્રોફીનું પણ છે, કારણ કે દરેક ટ્રોફી પાછળ ખૂબ જ સખત મહેનત છુપાયેલી હોય છે. હું ઘણો ખુશ અને આભારી છું કે મારા 11 વર્ષના કરિયરમાં મારી પાસે 5 ટ્રોફી છે, જે મારા માટે ખૂબ જ ખાસ છે."
RCBની હરાજીની રણનીતિના વખાણ કરતાં કૃણાલે વધુમાં જણાવ્યું કે, "ગયા વર્ષે હરાજી પહેલા ફ્રેન્ચાઇઝીએ જે રીતે તૈયારી કરી અને જે રીતે ટીમનું સંતુલન સેટ કર્યું તે અદ્ભુત હતું. ઘણી વખત અડધી મેચ તો હરાજીના ટેબલ પર જ જીતાઈ જતી હોય છે. મને લાગે છે કે મેનેજમેન્ટે બહુ સારું કામ કર્યું અને આખરે મેદાન પર જઈને શાનદાર પ્રદર્શન કરવાની જવાબદારી અમારી હતી. મને આનંદ છે કે અમે બેક-ટુ-બેક ટ્રોફી પર અમારો કબજો જાળવી રાખવામાં સફળ રહ્યા."