KL Rahul એ અડધી સદી ફટકારીને તોડ્યો ધોનીનો રેકોર્ડ, IPLમાં આ કારનામું કરનાર પ્રથમ વિકેટકીપર બેટ્સમેન બન્યો

IPL 2024માં, લખનૌ સુપર જાયન્ટ્સે આ સિઝનમાં ચેન્નાઈ સામે મળેલી હારનો બદલો લીધો હતો. તેના હોમ ગ્રાઉન્ડ પર લખનૌએ ચેન્નાઈ સુપર કિંગ્સને 8 વિકેટથી હરાવ્યું હતું. કેએલ રાહુલે 82 રન બનાવ્યા હતા. જાડેજાએ શાનદાર કેચ લઈને તેને પેવેલિયનનો રસ્તો બતાવ્યો હતો.

IPLની 34મી મેચ લખનૌના એકાના સ્ટેડિયમમાં રમાઈ હતી. પ્રથમ બેટિંગ કરતા ચેન્નાઈ સુપર કિંગ્સે 6 વિકેટના નુકસાને 176 રન બનાવ્યા હતા. રવિન્દ્ર જાડેજાએ અણનમ 57 રન જ્યારે ધોનીએ 9 બોલમાં અણનમ 28 રન બનાવ્યા હતા. લક્ષ્યનો પીછો કરતી વખતે ડી કોક અને કેએલ રાહુલ વચ્ચે સદીની પાર્ટનરશિપ થઈ હતી. ડી કોક અને કેએલ રાહુલ બંનેએ અડધી સદી પૂરી કરી હતી.

કેએલ રાહુલે ધોનીનો રેકોર્ડ તોડ્યો

રાહુલે પોતાની અડધી સદી પૂરી કરતાની સાથે જ CSKના પૂર્વ કેપ્ટન એમએસ ધોનીનો મોટો રેકોર્ડ તોડ્યો. કેએલ રાહુલ IPLમાં 25 અડધી સદી ફટકારનાર પ્રથમ વિકેટકીપર બેટ્સમેન બન્યો છે. આ પહેલા આ રેકોર્ડ ધોનીના નામે હતો. ધોનીએ વિકેટકીપર બેટ્સમેન તરીકે 24 અડધી સદી ફટકારી છે. ત્રીજા નંબર પર લખનૌ સુપર જાયન્ટ્સનો સ્ટાર બેટ્સમેન ક્વિન્ટન ડી કોક છે.

IPLમાં વિકેટકીપર તરીકે સૌથી વધુ અડધી સદી

• 25 – કેએલ રાહુલ
• 24 – એમએસ ધોની
• 23 – ક્વિન્ટન ડી કોક
• 21 – દિનેશ કાર્તિક
• 18 – રોબિન ઉથપ્પા

તમને જણાવી દઈએ કે એક સમયે એવું લાગતું હતું કે લખનૌ માટે લક્ષ્ય હાંસલ કરવું આસાન નહીં હોય. જો કે, જ્યારે રાહુલ અને ડી કોકે બેટિંગ શરૂ કરી ત્યારે પીચ બેટિંગ માટે સાનુકૂળ દેખાવા લાગી. ઝાકળના કારણે બેટ્સમેનો માટે રમવું સરળ બન્યું. લખનૌએ ચેન્નાઈ પાસેથી અગાઉની હારનો બદલો લીધો હતો.