IND-W vs IRE-W / પહેલી મેચ પછી આ બોલરની એક્શન પર ઉભા થયા સવાલો, 14 દિવસનું મળ્યું અલ્ટીમેટમ
આયર્લેન્ડની મહિલા ક્રિકેટ ટીમ હાલમાં ભારતના પ્રવાસે છે જ્યાં તે યજમાન ટીમ સામે ત્રણ મેચની ODI સિરી
આયર્લેન્ડની મહિલા ક્રિકેટ ટીમ હાલમાં ભારતના પ્રવાસે છે જ્યાં તે યજમાન ટીમ સામે ત્રણ મેચની ODI સિરીઝ રમવા માટે આવી છે. આ સિરીઝની પહેલી મેચ 10 જાન્યુઆરીએ રાજકોટના મેદાન પર રમાઈ હતી, જે ટીમ ઈન્ડિયાએ 6 વિકેટથી સરળતાથી જીતી લીધી હતી. આ સિરીઝની બીજી મેચ પહેલા, આયર્લેન્ડ મહિલા ટીમની સ્પિન બોલર એમી મેગ્વાયરની બોલિંગ એક્શન શંકાસ્પદ હોવાનું જાણવા મળ્યું હતું, ત્યારબાદ તેને તેની એક્શન તપાસવા માટે 14 દિવસનો અલ્ટીમેટમ આપવામાં આવ્યું છે. એમી મેગ્વાયર માત્ર 18 વર્ષની છે અને તેણે 2023માં આંતરરાષ્ટ્રીય ક્રિકેટમાં ડેબ્યુ કર્યું હતું.
આ પણ વાંચો: Champions Trophy / ભારતને લાગી શકે છે મોટો ઝટકો, લાંબા સમય સુધી ટીમમાંથી બહાર રહેશે જસપ્રીત બુમરાહ!
પહેલી ODI મેચમાં એમીએ ત્રણ વિકેટ લીધી હતી
ભારત સામેની ત્રણ મેચની ODI સિરીઝની પહેલી મેચમાં એમી મેગ્વાયરે 8 ઓવર ફેંકી હતી જેમાં તેણે 57 રન આપીને 3 વિકેટ લીધી હતી. ICCના નિયમો મુજબ, એમી મેગ્વાયરે હવે 14 દિવસની અંદર ICC દ્વારા માન્યતા પ્રાપ્ત બોલિંગ ટેસ્ટિંગ સેન્ટરમાં પોતાની એક્શનનું પરીક્ષણ કરાવવું પડશે. આ સમય દરમિયાન તે ટેસ્ટનું પરિણામ ન આવે ત્યાં સુધી બોલિંગ ચાલુ રાખી શકે છે. એમી મેગ્વાયરની વાત કરીએ તો, તેણે અત્યાર સુધીમાં 11 વનડે અને 9 T20 મેચ રમી છે, જેમાં તે 25 વિકેટ લેવામાં સફળ રહી છે. એમી મેગ્વાયરનું શ્રેષ્ઠ ODI બોલિંગ પ્રદર્શન ગયા વર્ષે ઈંગ્લેન્ડ સામે આવ્યું હતું જ્યારે તેણે 19 રન આપીને 5 વિકેટ લીધી હતી.
અંડર-19 વર્લ્ડ કપ ટીમમાં મેગ્વાયરની જગ્યાએ મોરિસીએ સ્થાન મેળવ્યું
ICC અંડર-19 મહિલા T20 વર્લ્ડ કપ 18 જાન્યુઆરીથી મલેશિયામાં રમાશે, જેમાં એમી મેગ્વાયર પણ આયર્લેન્ડની ટીમનો ભાગ હતી, હવે તેની બોલિંગ એક્શન પર પ્રશ્નો ઉભા થયા બાદ, તે અંડર-19 મહિલા T20 વર્લ્ડ કપમાં ભાગ નહીં લઈ શકે અને તેના સ્થાને આયર્લેન્ડ ક્રિકેટ દ્વારા એક રિપ્લેસમેન્ટ ખેલાડીની જાહેરાત કરવામાં આવી છે, જેમાં એમી મેગ્વાયરના સ્થાને મોરિસીને ટીમમાં સામેલ કરવામાં આવી છે.
