Women's Kabaddi World Cup / ભારતે સતત બીજી વખત જીત્યો વર્લ્ડ કપ, ફાઈનલમાં ચાઈનીઝ તાઇપેઈને હરાવ્યું
છેલ્લું અપડેટ : 25 Nov 2025
ભારતીય વિમેન્સ કબડ્ડી ટીમે ઢાકામાં રમાયેલા વિમેન્સ કબડ્ડી વર્લ્ડ કપની ફાઈનલમાં ચાઈનીઝ તાઇપેઈને 35-28થી હરાવીને ફરી એકવાર વિશ્વ પર પોતાનું વર્ચસ્વ સ્થાપિત કર્યું છે. આ ભારતનું સતત બીજો વર્લ્ડ કપ ટાઈટલ છે, જે વિમેન્સ કબડ્ડીમાં દેશની વધતી જતી તાકાત અને શ્રેષ્ઠતાને સાબિત કરે છે.
સમગ્ર ટુર્નામેન્ટમાં ભારતનો દબદબો રહ્યો
ભારતીય ટીમે ગ્રુપ સ્ટેજથી ફાઈનલ સુધી શાનદાર પ્રદર્શન કર્યું. ટીમે ગ્રુપ સ્ટેજમાં બધી મેચ જીતી હતી. ભારતીય ટીમે સેમીફાઈનલમાં ઈરાનને 33-21થી અને ફાઈનલમાં ચાઈનીઝ તાઇપેઈને 35-28થી હરાવીને ટાઈટલ જીત્યું. ચાઇનીઝ તાઇપેઈએ પણ ગ્રુપ સ્ટેજમાં બધી મેચ જીતી હતી, તેણે સેમીફાઈનલમાં યજમાન બાંગ્લાદેશને 25-18થી હરાવીને ફાઈનલમાં પ્રવેશ કર્યો હતો.
ભારતજીત પર અનુભવી ખેલાડીઓની પ્રતિક્રિયાઓ
ભારતીય ટીમની જીત પર હરિયાણા સ્ટીલર્સના હેડ કોચ મનપ્રીત સિંહે ટીમની પ્રશંસા કરતા કહ્યું કે, "વિમેન્સ ટીમે એવું પ્રદર્શન કર્યું કે જેના પર સમગ્ર દેશ ગર્વ કરી શકે છે. તેમનો આત્મવિશ્વાસ અને ટીમવર્ક ઉત્તમ હતું. એક ભૂતપૂર્વ ભારતીય ખેલાડી તરીકે, હું જાણું છું કે આ સ્તર સુધી પહોંચવું કેટલું મુશ્કેલ છે. ખેલાડીઓ અને સપોર્ટ સ્ટાફને શુભકામનાઓ."
પુનેરી પલટનના હેડ કોચ અજય ઠાકુરે પણ ખુશી વ્યક્ત કરી હતી. તેણે કહ્યું કે, "વિમેન્સ ટીમ દ્વારા સતત બીજો વર્લ્ડ કપ જીતવો એ સમગ્ર દેશ માટે ગર્વની વાત છે. ફાઈનલમાં તેમનું વર્ચસ્વ દર્શાવે છે કે છેલ્લા કેટલાક વર્ષોમાં વિમેન્સ કબડ્ડીએ કેટલી પ્રગતિ કરી છે. બાંગ્લાદેશમાં વર્લ્ડ કપ યોજાવવો પણ રમતની વૈશ્વિક લોકપ્રિયતાને સ્પષ્ટપણે પ્રતિબિંબિત કરે છે. આશા છે કે આગામી વર્ષોમાં પણ આ ગતિ ચાલુ રહેશે." તમને જણાવી દઈએ કે વિમેન્સ કબડ્ડી વર્લ્ડ કપ 2025માં 11 દેશોએ ભાગ લીધો હતો, જે દર્શાવે છે કે વિમેન્સ કબડ્ડી વૈશ્વિક સ્તરે કેટલી ઝડપથી પ્રગતિ કરી રહી છે.