ઈતિહાસ રચવાની નજીક છે સ્ટાર ઓલરાઉન્ડર, કપિલ દેવ અને કુંબલે પછી આવું કરનાર ત્રીજો ભારતીય બનશે

ભારતીય ક્રિકેટ ટીમ ટૂંક સમયમાં એક્શનમાં જોવા મળશે. ભારત અને બાંગ્લાદેશ વચ્ચે 19 સપ્ટેમ્બરથી 2 મેચની ટેસ્ટ સિરીઝ શરૂ થઈ રહી છે. ટેસ્ટ સિરીઝની પ્રથમ મેચ ચેન્નાઈમાં રમાશે જેમાં ટીમ ઈન્ડિયામાં સ્પિન બોલિંગની જવાબદારી રવિચંદ્રન અશ્વિન અને રવિન્દ્ર જાડેજાના ખભા પર રહેશે. બંને સ્પિનરોને પ્રથમ ટેસ્ટ મેચમાં તક મળશે તે નિશ્ચિત માનવામાં આવે છે. જો આવું થાય તો ભારતીય ટેસ્ટ ક્રિકેટમાં ઈતિહાસ રચાઈ શકે છે.

ટેસ્ટ ક્રિકેટમાં, રવિન્દ્ર જાડેજા બોલ અને બેટ બંનેથી અજાયબી કરવામાં માહિર છે. જાડેજાએ ભારત માટે અત્યાર સુધીમાં 72 ટેસ્ટ મેચ રમી છે. આમાં તેણે બેટ વડે 3036 રન બનાવ્યા છે જ્યારે બોલ વડે 294 વિકેટ ઝડપી છે. જો તે પહેલી જ ટેસ્ટમાં 6 વિકેટ લેવાની સિદ્ધિ હાંસલ કરશે તો તે ટેસ્ટ ક્રિકેટમાં 3000 રન અને 300 વિકેટ લેનારો ભારતનો ત્રીજો ઓલરાઉન્ડર બની જશે. અગાઉ આ કારનામું કપિલ દેવ અને આર અશ્વિને કર્યું હતું.

ખાસ ક્લબ પર જાડેજાની નજર

આટલું જ નહીં, જો રવિન્દ્ર જાડેજા બાંગ્લાદેશ સામેની સિરીઝમાં 6 વિકેટ અને 8 કેચ લેવાની સિદ્ધિ હાંસલ કરે છે, તો તે ટેસ્ટ ક્રિકેટના ઈતિહાસમાં 1000થી વધુ રન, 50થી વધુ વિકેટ અને 50 કેચ પકડનાર ત્રીજો ભારતીય ઓલરાઉન્ડર બની જશે. ટેસ્ટ ક્રિકેટમાં ભારતીય ક્રિકેટરોમાં અત્યાર સુધી આ સિદ્ધિ માત્ર કપિલ દેવ અને અનિલ કુંબલેના નામે છે. કપિલ દેવે ટેસ્ટ ક્રિકેટમાં 5248 રન અને 434 વિકેટ લેવા ઉપરાંત 64 કેચ પણ લીધા છે. તે જ સમયે, અનિલ કુંબલેએ ટેસ્ટમાં 2506 રન અને 619 વિકેટ લીધી હતી. આ સાથે જ તેણે ટેસ્ટમાં 60 કેચ પકડવાની  સિદ્ધિ હાંસલ કરી હતી.

ટેસ્ટ ક્રિકેટમાં 1000 રન, 50 વિકેટ અને 50 કેચ પકડનાર ભારતીય

• કપિલ દેવ - 5248 રન, 434 વિકેટ અને 64 કેચ.
• અનિલ કુંબલે - 2506 રન, 619 વિકેટ અને 60 કેચ.

નોંધનીય છે કે 35 વર્ષના રવિન્દ્ર જાડેજાએ T20I ક્રિકેટને અલવિદા કહી દીધું છે. T20I વર્લ્ડ કપ જીત્યા પછી, તેણે રોહિત શર્મા અને વિરાટ કોહલી સાથે જ 20 ઓવરના ઈન્ટરનેશનલ ક્રિકેટને અલવિદા કહ્યું હતું. હવે તેનું સંપૂર્ણ ધ્યાન ટેસ્ટ અને વનડે ક્રિકેટ પર છે.