એશિયા કપ 2026 માટે જાહેર કરવામાં આવી ભારતીય ટીમ, પ્રેમા રાવતને મળ્યું સ્થાન
છેલ્લું અપડેટ : 02 Aug 2026
BCCIએ આ મહિનાના અંતમાં શરૂ થનારા 2026ના એશિયા કપ માટે ભારતીય મહિલા ક્રિકેટ ટીમની જાહેરાત કરી છે. પસંદગીકારોએ આ ટુર્નામેન્ટ માટે લગભગ એ જ ટીમ જાળવી રાખી છે જે આવતા મહિને એશિયન ગેમ્સમાં રમશે. લોર્ડ્સ ટેસ્ટમાં શાનદાર સદી ફટકારનાર યાસ્તિકા ભાટિયાને આ વખતે ટીમમાં સામેલ નથી કરવામાં આવી. તેના પર વિશ્વાસ દર્શાવવાને બદલે પસંદગીકારોએ 18 વર્ષીય જી. કમલિનીનો સમાવેશ કર્યો છે.
શ્રેયંકા પાટિલને એશિયા કપ માટે ટીમમાં સામેલ નથી કરવામાં આવી
એશિયા કપ ટીમમાં ફક્ત એક જ ફેરફાર કરવામાં આવ્યો છે. શ્રેયંકા પાટિલને ટીમમાં સામેલ નથી કરવામાં આવી. આનો અર્થ એ થયો કે તે હજુ સુધી તેની પગની ઘૂંટીની ઈજામાંથી સંપૂર્ણપણે સ્વસ્થ નથી થઈ. તે પગની ઘૂંટીની ઈજાને કારણે તેને T20 વર્લ્ડ કપની મધ્ય ટુર્નામેન્ટમાંથી પણ ખસી જવું પડ્યું હતું. લેગ-સ્પિન ઓલરાઉન્ડર પ્રેમા રાવતને તેના સ્થાને વર્લ્ડ કપ ટીમમાં સામેલ કરવામાં આવી હતી અને પસંદગીકારોએ પ્રેમા રાવતને એશિયા કપ માટે પણ ટીમમાં સામેલ કરી છે.
પ્રેમા રાવતને વર્લ્ડ કપમાં ફક્ત એક જ મેચ રમવાની તક મળી હતી
30 જૂને જ્યારે એશિયન ગેમ્સ ટીમની જાહેરાત કરવામાં આવી ત્યારે શ્રેયંકા પાટિલનો ટીમમાં સમાવેશ કરવામાં આવ્યો હતો, પરંતુ તેની પસંદગી ફિટનેસને આધીન હતી. દરમિયાન, 24 વર્ષીય પ્રેમા રાવતને વર્લ્ડ કપમાં ફક્ત એક જ મેચ રમવાની તક મળી હતી. સાઉથ આફ્રિકા સામેની એકમાત્ર મેચમાં તેણે 2 બોલમાં અણનમ 3 રન બનાવ્યા અને બે ઓવરમાં 21 રન આપ્યા અને એક પણ વિકેટ નહતી લીધી. ત્યારબાદ ભારતીય ટીમ ઓસ્ટ્રેલિયા સામે તેની અંતિમ લીગ મેચ હારી ગઈ અને વર્લ્ડ કપમાંથી બહાર થઈ ગઈ હતી.
એશિયા કપ 2026 ક્યારે શરૂ થશે?
એશિયા કપનું શેડ્યૂલ હજુ સુધી જાહેર નથી કરવામાં આવ્યું, પરંતુ એવું માનવામાં આવે છે કે આ ટુર્નામેન્ટ ઓગસ્ટના અંતથી સપ્ટેમ્બરના મધ્ય સુધી રમાશે. આ પછી તરત જ, એશિયન ગેમ્સ 17થી 22 સપ્ટેમ્બર દરમિયાન જાપાનમાં યોજાશે. દરમિયાન, ભારતીય ટીમના ચાર સ્ટાર ખેલાડીઓ, વાઈસ-કેપ્ટન સ્મૃતિ મંધાના, જેમિમા રોડ્રિગ્સ, દીપ્તિ શર્મા અને રિચા ઘોષ હાલમાં ઈંગ્લેન્ડમાં 'ધ હંડ્રેડ' લીગમાં ભાગ લઈ રહ્યા છે.
એશિયા કપ 2026 માટે ભારતીય મહિલા ટીમ
હરમનપ્રીત કૌર (કેપ્ટન), સ્મૃતિ મંધાના (વાઈસ-કેપ્ટન), શેફાલી વર્મા, જેમીમા રોડ્રિગ્સ, ભારતી ફુલમાલી, રિચા ઘોષ (વિકેટકીપર), જી. કમલિની (વિકેટકીપર), દીપ્તિ શર્મા, રાધા યાદવ, પ્રેમા રાવત, અરુંધતી રેડ્ડી, ક્રાંતિ ગૌડ, રેણુકા સિંહ, એન. શ્રી ચારણી, નંદની શર્મા
રિઝર્વ: પ્રતિકા રાવલ, ઉમા છેત્રી (વિકેટકીપર), વૈષ્ણવી શર્મા, સયાલી સતઘરે, મિન્નુ મણિ
