એશિયન ચેમ્પિયન્સ ટ્રોફીમાં ભારતીય હોકી ટીમની સતત ચોથી જીત, સેમીફાઈનલ પહેલા પાકિસ્તાન સામે ટકરાશે

પેરિસ ઓલિમ્પિક 2024 બ્રોન્ઝ મેડલ વિજેતા ભારતીય હોકી ટીમનું શાનદાર પ્રદર્શન જારી છે. ઓલિમ્પિક બાદ હવે એશિયન ચેમ્પિયન્સ ટ્રોફીમાં ભાગ લઈ રહેલી ભારતીય ટીમે સતત ચોથો વિજય નોંધાવ્યો છે. આ સાથે ભારતીય ટીમે સેમીફાઈનલમાં પણ પોતાનું સ્થાન નિશ્ચિત કરી લીધું છે. ચીનના હુલુનબુર શહેરમાં રમાઈ રહેલી આ ટૂર્નામેન્ટમાં ભારતીય ટીમે ગુરુવારે સાઉથ કોરિયાને 3-1થી હરાવ્યું હતું. ટીમની જીતનો સ્ટાર કેપ્ટન હરમનપ્રીત સિંહ હતો જેણે 2 ગોલ કર્યા હતા. ગુરુવારે માત્ર ભારતે જ નહીં પરંતુ પાકિસ્તાને પણ પોતાની મેચ જીતી લીધી હતી. હવે ભારત અને પાકિસ્તાન આગામી મેચમાં સામસામે ટકરાશે.

પ્રથમ ક્વાર્ટરથી જ ભારતીય ટીમનું પ્રભુત્વ

પોતાની શરૂઆતની મેચોમાં ચીન અને જાપાનને હરાવનાર ભારતીય ટીમે અપેક્ષા મુજબ આ મેચ જીતી લીધી હતી. ભારતીય ટીમે મેચની ઝડપી શરૂઆત કરી હતી અને પહેલા ક્વાર્ટરમાં જ 2-0ની સરસાઈ મેળવી લીધી હતી. ભારતીય ટીમ માટે 8મી મિનિટે અરિજિત સિંહ હુંદલે ગોલ કર્યો હતો અને ત્યારપછી એક મિનિટ બાદ કેપ્ટન હરમનપ્રીતે લીડ બમણી કરી હતી. જો કે આ પછી ભારતીય ટીમને આગામી ગોલ માટે લાંબી રાહ જોવી પડી હતી.

આ સમય દરમિયાન સાઉથ કોરિયાએ પણ કમબેક કરવાનો પ્રયાસ કર્યો અને તેના કારણે ટીમને સારા પરિણામ પણ મળ્યા. સાઉથ કોરિયાએ બીજા ક્વાર્ટરની છેલ્લી મિનિટે (30મી મિનિટ) ગોલ કરીને ભારતીય ટીમની લીડ ઘટાડી હતી. આ પછી ભારતીય ટીમને લીડ વધારવા માટે ગોલ કરવાની જરૂર હતી. અંતે ભારતીય કેપ્ટનને 43મી મિનિટે સફળતા મળી હતી. હરમનપ્રીતે પોતાનો બીજો અને ટીમનો ત્રીજો ગોલ કરીને સ્કોર 3-1 કરી દીધો, જે અંત સુધી જળવાઈ રહ્યો અને આ રીતે ભારતીય ટીમ સતત ચોથી જીત સાથે સેમીફાઈનલમાં પહોંચી ગઈ.

હવે પાકિસ્તાન સાથે થશે ટક્કર

બીજી તરફ પાકિસ્તાને પણ પોતાની મેચ જીતી લીધી હતી. પાકિસ્તાને નદીમ અને હન્નાનના બે-બે ગોલની મદદથી યજમાન ચીનને 5-1થી હરાવ્યું હતું. 4 મેચમાં પાકિસ્તાનની આ માત્ર બીજી જીત છે તેમ છતાં તે પોઈન્ટ ટેબલમાં ભારત પછી બીજા સ્થાને છે. પાકિસ્તાને પણ 8 પોઈન્ટ સાથે સેમીફાઈનલમાં પોતાનું સ્થાન નિશ્ચિત કરી લીધું છે. જોકે, પોઈન્ટ ટેબલમાં તેનું સ્થાન છેલ્લા રાઉન્ડ પછી નક્કી થશે. શનિવાર 14 સપ્ટેમ્બરે લીગ સ્ટેજના છેલ્લા રાઉન્ડમાં ભારત અને પાકિસ્તાન એકબીજા સાથે ટકરાશે.