ભારતને મોટો ઝટકો લાગ્યો, ઈજાના કારણે એશિયન ગેમ્સમાંથી બહાર થયો નીરજ ચોપરા
છેલ્લું અપડેટ : 29 Aug 2026
બે વખતના ઓલિમ્પિક મેડલ વિજેતા અને ભારતના સ્ટાર જેવલિન થ્રોઅર નીરજ ચોપરા ઈજાને કારણે 2026 સિઝનના બાકીના ભાગમાંથી બહાર થઈ ગયો છે. નીરજ પોતે પુષ્ટિ આપી છે કે તે ઈજાને કારણે આ સિઝનમાં આગળ કોઈપણ ઈવેન્ટમાં ભાગ નહીં લઈ શકે. આનો અર્થ એ થયો કે તે જાપાનમાં 2026માં યોજાનારી એશિયન ગેમ્સ અને ડાયમંડ લીગ ફાઈનલ્સ સહિત કોઈપણ ટુર્નામેન્ટમાં ભાગ નહીં લે. તાજેતરમાં લુસાનેમાં યોજાયેલી ડાયમંડ લીગ સ્પર્ધા દરમિયાન 88.05 મીટરનો શ્રેષ્ઠ થ્રો હાંસલ કર્યા પછી થયેલી ઈજાને કારણે તેણે આ નિર્ણય લીધો હતો. નીરજે આ માહિતી સોશિયલ મીડિયા દ્વારા શેર કરી.
નીરજ ચોપરાએ સોશિયલ મીડિયા પર માહિતી શેર કરી
નીરજ ચોપરાએ તેના સત્તાવાર સોશિયલ મીડિયા એકાઉન્ટ્સ પર તેની ઈજા અને સીઝનમાંથી ખસી જવા અંગે પોસ્ટ કરી. નીરજે લખ્યું, "ઘણી મહેનત પછી, મને આખરે લાગ્યું કે હું લુસાનેમાં 'સિઝનનો શ્રેષ્ઠ થ્રો' કરીને તે ગતિ મેળવી રહ્યો છું જેની હું શોધ કરી રહ્યો હતો. કમનસીબે, તેના થોડા સમય પછી, ટ્રેનિંગ દરમિયાન મારા પગની ઘૂંટીમાં લિગામેંટ ફાટી ગયું. મારા ડોક્ટર અને ટીમ સાથે વાત કર્યા પછી, અમે નિર્ણય લીધો છે કે હું આ સિઝનના બાકીના સમય માટે ભાગ નહીં લઇ શકું."
તેણે આગળ લખ્યું, "આ નિરાશાજનક છે, ખાસ કરીને કારણ કે મને લાગ્યું કે હું મારી લય શોધવાની નજીક છું. પરંતુ જેમ કહેવામાં આવે છે, અડચણો પ્રવાસનો એક ભાગ છે. હવે મારું ધ્યાન સારી રીતે સ્વસ્થ થવા અને વધુ મજબૂત રીતે પાછા આવવા પર છે. તમારા બધા પ્રેમ અને સમર્થન બદલ આભાર."
ભારતની આશાઓને મોટો ઝટકો લાગ્યો
નીરજ ચોપરા આ ઈજાને કારણે જાપાનના આઈચી-નાગોયામાં 2026માં યોજાનારી એશિયન ગેમ્સમાં ભાગ લઈ શકશે નહીં, જે ભારત માટે એક મોટો ઝટકો છે. નીરજના ખસી જવાથી ભારતને એથ્લેટિક્સમાં સંભવિત મેડલ ગુમાવવો પડશે. એશિયન ગેમ્સ 19 સપ્ટેમ્બરથી શરૂ થવાની છે અને 4 ઓક્ટોબર સુધી ચાલુ રહેવાની છે. ભારતનો 'ગોલ્ડન બોય' નીરજ હવે પોતાના મેન્સ જેવલિન થ્રોના ખિતાબને બચાવવાની તક ગુમાવી ચૂક્યો છે.
તેની ગેરહાજરીએ હવે જેવલિન થ્રો ઈવેન્ટનું સંપૂર્ણ દબાણ રોહિત યાદવ પર મૂકી દીધું છે. રોહિતે તાજેતરમાં ભુવનેશ્વરમાં વર્લ્ડ એથ્લેટિક્સ સિલ્વર-લેવલ કોન્ટિનેન્ટલ ટૂર ઈવેન્ટમાં 87.68 મીટરના વ્યક્તિગત શ્રેષ્ઠ પ્રદર્શન સાથે જીત મેળવી હતી. ત્યારથી, તેણે પોતાને ભારતના અગ્રણી જેવલિન થ્રોઅર તરીકે સ્થાપિત કર્યો છે. ભારત હવે એશિયન ગેમ્સમાં તેની પાસેથી મેડલની આશા રાખશે.
2026 સીઝનમાં નીરજ ચોપરાનું પ્રદર્શન
28 વર્ષીય નીરજ ચોપરા માટે 2026 સિઝન મિશ્ર રહી છે. લાંબી ઈજા બાદ, નીરજ જૂનમાં દોહા ડાયમંડ લીગમાં એક્શનમાં પાછો ફર્યો, 85.69 મીટરના થ્રો સાથે ચોથા સ્થાને રહ્યો. ત્યારબાદ તેણે ગ્લાસગોમાં 2026 કોમનવેલ્થ ગેમ્સમાં 85.83 મીટરના પ્રયાસ સાથે સિલ્વર મેડલ જીત્યો અને પછી લુસાને ડાયમંડ લીગમાં પોતાનો સિઝનનો શ્રેષ્ઠ પ્રદર્શન કર્યો.
નીરજે લુસાને ડાયમંડ લીગમાં 88.05 મીટરનો પોતાનો શ્રેષ્ઠ થ્રો ફેંકીને બીજા સ્થાને રહ્યો. શ્રીલંકાના રુમેશ પાથિરાજે 89.75 મીટરના જોરદાર થ્રો સાથે તેને ગોલ્ડ મેડલથી વંચિત રાખ્યો. આ ઈજાને કારણે એશિયન ગેમ્સ અને ડાયમંડ લીગ ફાઈનલ્સમાં ભાગ લેવાની તેની આશા પણ ખતમ થઈ ગઈ, જેનાથી તેની 2026ની સિઝનનો અંત આવ્યો.