VIDEO: IND vs AFG / વ્યર્થ ગઈ ગુરબાઝની સદી, ભારતે કેપ્ટન ગિલ અને કેએલ રાહુલની બેટિંગના દમ પર જીતી પહેલી ODI
છેલ્લું અપડેટ : 14 Jun 2026
ધર્મશાલા ખાતે રમાયેલી રોમાંચક પ્રથમ ODI મેચમાં ભારતે અફઘાનિસ્તાનને 7 વિકેટે કરારી હાર આપી છે. વરસાદના કારણે આ મુકાબલો 4 કલાક અને 15 મિનિટના વિલંબથી શરૂ થયો હતો, જેના લીધે મેચને ઘટાડીને 25-25 ઓવરની કરવામાં આવી હતી. ભારતીય કેપ્ટન શુભમન ગિલે ટોસ જીતીને પહેલા બોલિંગ કરવાનો નિર્ણય કર્યો હતો. અફઘાનિસ્તાનની ટીમ 24.5 ઓવરમાં 194 રન બનાવીને ઓલઆઉટ થઈ ગઈ હતી. જવાબમાં ભારતીય ટીમે 13 બોલ બાકી રહેતા માત્ર 3 વિકેટ ગુમાવીને આ સરળ લક્ષ્ય હાંસલ કરી લીધો હતો. આ જીત સાથે ભારતે 3 મેચોની ODI સિરીઝમાં 1-0ની લીડ મેળવી લીધી છે.
ગુરબાઝની તોફાની સદી, શાહિદી સાથે 116 રનની પાર્ટનરશિપ કરી
પહેલા બેટિંગ કરવા ઉતરેલી અફઘાનિસ્તાનની શરૂઆત ખૂબ જ ખરાબ રહી હતી અને માત્ર 26 રનના સ્કોર પર તેની 3 વિકેટો પડી ગઈ હતી. ઈબ્રાહિમ ઝાદરાન 1 રન, સેદિકુલ્લાહ અટલ 3 રન અને રહમત શાહ 3 રન બનાવીને સસ્તામાં આઉટ થઈ ગયા હતા. જોકે, ઓપનર રહમાનુલ્લાહ ગુરબાઝે આક્રમક બેટિંગ કરી હતી. તેણે કેપ્ટન હશમતુલ્લાહ શાહિદી (27 રન) સાથે ચોથી વિકેટ માટે 116 રનની મજબૂત પાર્ટનરશિપ કરી હતી. ગુરબાઝે માત્ર 51 બોલમાં 8 ચોગ્ગા અને 8 છગ્ગાની મદદથી 102 રનની ધમાકેદાર ઈનિંગ રમી હતી. અઝમતુલ્લાહ ઓમરઝઈએ 26 રનનું યોગદાન આપ્યું હતું. ગુરબાઝ આઉટ થયા બાદ બાકીના બેટ્સમેનો ટકી નહતા શક્યા અને આખી ટીમ 194 રને ઓલઆઉટ થઈ ગઈ હતી.
ભારતના બે બોલર્સે ડેબ્યુ મેચમાં 3-3 વિકેટ ઝડપી
ભારત તરફથી આંતરરાષ્ટ્રીય ક્રિકેટમાં ડેબ્યુ કરી રહેલા બંને યુવા બોલર્સે શાનદાર પ્રદર્શન કર્યું હતું. ફાસ્ટ બોલર ગુરનૂર બરારે પોતાની તેજ ગતિથી અફઘાન બેટ્સમેનોને મુશ્કેલીમાં મૂક્યા હતા અને 4.5 ઓવરમાં 27 રન આપીને 3 વિકેટ ઝડપી હતી. જ્યારે ડેબ્યુ કરી રહેલા લેફ્ટ આર્મ સ્પિનર હર્ષ દુબેએ પણ 47 રન આપીને 3 વિકેટ પોતાના નામે કરી હતી. આ સિવાય અર્શદીપ સિંહ અને નીતિશ કુમાર રેડ્ડીએ પણ બે-બે વિકેટ ઝડપી હતી.
શુભમન ગિલ અને કેએલ રાહુલની દમદાર બેટિંગ
195 રનનો ટાર્ગેટ ચેઝ કરવા ઉતરેલી ભારતીય ટીમ માટે કેપ્ટન શુભમન ગિલે અડધી સદી ફટકારી હતી. ઓપનર રોહિત શર્મા 16 રન બનાવીને રનઆઉટ થયો હતો, જે બાદ ગિલે ઈશાન કિશન (34 રન) સાથે 70 રનની પાર્ટનરશિપ કરી હતી. શ્રેયસ અય્યર માત્ર 12 રને આઉટ થયો હતો. ત્યારબાદ પાંચમા નંબરે આવેલા વિકેટકીપર બેટ્સમેન કેએલ રાહુલે મેદાન પર આવતા જ વિસ્ફોટ બેટિંગ શરૂ કરીને માત્ર 19 બોલમાં 4 ચોગ્ગા અને 3 છગ્ગા ફટકારીને અણનમ 39 રન બનાવ્યા હતા. કેપ્ટન શુભમન ગિલે 66 બોલમાં 11 ચોગ્ગા અને 2 છગ્ગાની મદદથી અણનમ 84 રનની શાનદાર ઈનિંગ રમીને ભારતને 22.5 ઓવરમાં જ જીત અપાવી દીધી હતી.
મેચમાં બનેલો નવો રેકોર્ડ
આ મેચમાં અફઘાનિસ્તાનના ઓપનર રહમાનુલ્લાહ ગુરબાઝે શાનદાર સદી ફટકારીને એક મોટો રેકોર્ડ પોતાના નામે કર્યો છે. ગુરબાઝે માત્ર 48 બોલમાં પોતાની સદી પૂરી કરી હતી. આ સાથે જ તે અફઘાનિસ્તાન ક્રિકેટના ઈતિહાસમાં ODIમાં અંદર સૌથી ઝડપી સદી ફટકારનાર બેટ્સમેન બની ગયો છે.
