IND vs SA / રનનો થશે વરસાદ કે બોલર્સનો રહેશે જલવો? જાણો પહેલી T20Iનો પિચ રિપોર્ટ અને સંભવિત પ્લેઈંગ ઈલેવન
છેલ્લું અપડેટ : 09 Dec 2025
ભારત અને સાઉથ આફ્રિકા વચ્ચેની પહેલી T20I કટકના બારાબતી સ્ટેડિયમ ખાતે રમાશે. મંગળવાર, 9 ડિસેમ્બરે યોજાનારી આ મેચ ખાસ રહેશે, કારણ કે કટકમાં લાલ માટીની વિકેટ પર પહેલીવાર મેચ રમાશે. મેચ સાંજે 7 વાગ્યે શરૂ થશે, જેમાં ટોસ મહત્ત્વપૂર્ણ ભૂમિકા ભજવશે.
મેચ પહેલા ભારતીય કેપ્ટન સૂર્યકુમાર યાદવે પિચ વિશે કહ્યું, "મેં તે હજુ સુધી નથી જોઈ પરંતુ મને આશા છે કે તે સારી હશે." તેણે કહ્યું કે કાળી માટીની પિચ સારી રહે છે, પરંતુ તેનું માનવું છે કે લાલ માટીની પિચ પણ સારી હશે. તેણે કહ્યું, "લાલ માટીની વિકેટ ઝડપી હોઈ શકે છે, જોઈશું પરંતુ જો તે ઝડપી હશે તો સારું છે."
બારાબતી સ્ટેડિયમનો T20I રેકોર્ડ
બારાબતી સ્ટેડિયમમાં અગાઉ કુલ ત્રણ T20I મેચ રમાઈ છે, જેમાંથી બે ભારત અને સાઉથ આફ્રિકા વચ્ચે રમાઈ હતી. ખરાબ સમાચાર એ છે કે સાઉથ આફ્રિકાએ બંને મેચમાં ભારતને હરાવ્યું હતું. જ્યારે ભારતે શ્રીલંકા સામેની મેચ 93 રનથી જીતી હતી.
આ મેદાન પર સૌથી વધુ T20I સ્કોર 180 છે, જે ભારતે શ્રીલંકા સામે બનાવ્યો હતો. સૌથી ઓછો સ્કોર 87 છે, જે શ્રીલંકા દ્વારા તે જ મેચમાં બનાવવામાં આવ્યો હતો.
ટોસની વાત કરીએ તો જે પણ જીતશે તે પહેલા બોલિંગ કરવાનું પસંદ કરશે. અહીં ઝાકળ હોવાની શક્યતા છે, જેના કારણે બીજી ઈનિંગમાં બેટિંગ થોડી સરળ બની જશે. જોકે, હવામાન પણ સમસ્યારૂપ બનશે, અહીં રસાદની શક્યતા 10 ટકા છે.
પિચ રિપોર્ટ
લાલ માટીની પિચ ફાસ્ટ બોલરોને અનુકૂળ હોઈ શકે છે, પરંતુ અહીં એક હાઈ સ્કોરિંગ મેચની અપેક્ષા છે. પિચ બેટિંગ-ફ્રેન્ડલી લાગે છે. અહીં પહેલીવાર T20Iમાં 200નો સ્કોર બની શકે છે. ટોસ જીતીને પહેલા બોલિંગ કરવાનો નિર્ણય યોગ્ય સાબિત થઈ શકે છે, પરંતુ જો પહેલા બેટિંગ કરતી ટીમ 200નો સ્કોર કરે છે, તો બીજી ઈનિંગમાં રમી રહેલી ટીમ માટે મુશ્કેલીઓ વધી જશે.
બંને ટીમોની સંભવિત પ્લેઈંગ ઈલેવન
ભારત: અભિષેક શર્મા, શુભમન ગિલ, સૂર્યકુમાર યાદવ (કેપ્ટન), તિલક વર્મા, હાર્દિક પંડ્યા, શિવમ દુબે, સંજુ સેમસન (વિકેટકીપર), અક્ષર પટેલ, અર્શદીપ સિંહ, કુલદીપ યાદવ અને જસપ્રીત બુમરાહ.
સાઉથ આફ્રિકા: એડન માર્કરમ (કેપ્ટન), રીઝા હેન્ડ્રિક્સ, ક્વિન્ટન ડી કોક (વિકેટકીપર), ડેવાલ્ડ બ્રેવિસ, ટ્રિસ્ટન સ્ટબ્સ, ડેવિડ મિલર, માર્કો યાનસન, ડોનોવન ફેરેરા, કોર્બિન બોશ, કેશવ મહારાજ અને એનરિચ નોર્ટજે.
