Asia Cup 2025 / પાકિસ્તાનને હરાવવા માટે ઓમાન સામે પ્રેક્ટિસ કરશે ભારત, આજે રમાશે ગ્રુપ સ્ટેજની છેલ્લી મેચ
છેલ્લું અપડેટ : 19 Sept 2025
દુબઈમાં નબળા UAE અને પછી કટ્ટર હરીફ પાકિસ્તાનને હરાવ્યા બાદ, ભારતીય ટીમ પહેલાથી જ એશિયા કપના સુપર-4માં પહોંચી ગઈ છે. કેપ્ટન સૂર્યકુમાર યાદવની ટીમ હવે શુક્રવારે અબુ ધાબીમાં અંતિમ ગ્રુપ સ્ટેજ મેચમાં ઓમાનનો સામનો કરશે. આ મેચ સુપર-4 માટે પ્રેક્ટિસ પણ પૂરી પાડશે, કારણ કે આગામી આઠ દિવસમાં ભારતીય ટીમની ચાર મેચ રમવાની છે.
રવિવારે, ભારતીય ટીમ ફરી એકવાર સુપર-4માં પાકિસ્તાનનો સામનો કરશે, જેણે બુધવારે દુબઈમાં UAEને હરાવીને આગામી રાઉન્ડ માટે ક્વોલિફાય કર્યું હતું. સૂર્યકુમાર યાદવની ટીમે ગ્રુપ સ્ટેજ મેચમાં પાકિસ્તાનને સાત વિકેટથી હરાવ્યું હતું. ઓમાન સામે, ભારતીય ટીમ તેના બેટ્સમેનોને સંપૂર્ણ તક આપવા માંગશે, પરંતુ આમ કરવા માટે, સૂર્યાએ ટોસ જીતીને પહેલા બેટિંગ કરવાનું પસંદ કરવું પડશે.
ભારત પાસે અભિષેક શર્મા, શુભમન ગિલ, સૂર્યકુમાર, તિલક વર્મા, હાર્દિક પંડ્યા, સંજુ સેમસન, શિવમ દુબે અને અક્ષર પટેલનો સમાવેશ કરતી મજબૂત બેટિંગ લાઈન-અપ છે. આવી સ્થિતિમાં, જો ભારતીય ટીમ પહેલા બેટિંગ કરે છે, તો બેટ્સમેનોને 20 ઓવર રમવાની તક તો મળશે જ, પરંતુ ભારતીય દર્શકો પણ કેટલાક મોટા રેકોર્ડ જોઈ શકે છે.
કારણ કે જો ઓમાન પહેલા બેટિંગ કરે છે અને જસપ્રીત બુમરાહને આરામ આપવામાં આવે તો પણ, તેમના બેટ્સમેનો માટે વરુણ ચક્રવર્તી, કુલદીપ યાદવ અને અક્ષર પટેલની સ્પિનનો સામનો કરવો મુશ્કેલ બનશે. ઓમાન સામેની મેચ પહેલા, ભારતીય ટીમે ગુરુવારે દુબઈમાં ICC ક્રિકેટ એકેડેમીમાં પ્રેક્ટિસ કરી હતી. ભારતીય ટીમે બુધવારે પ્રેક્ટિસ નહતી કરી. ભારતીય ટીમ દુબઈમાં રોકાઈ છે અને આ મેચ માટે દુબઈથી અબુ ધાબી જશે અને રમીને પરત ફરશે.
ઓમાનની બેટિંગ ખૂબ જ નબળી છે
ઓમાન આ ટુર્નામેન્ટમાં અત્યાર સુધી પાકિસ્તાન અને UAE સામે મેચ રમી ચૂક્યું છે, જ્યાં તેના બેટ્સમેનોએ સારું પ્રદર્શન નથી કર્યું. તેના કોઈપણ બેટ્સમેન 30 રનનો આંકડો પણ પાર નથી કરી શક્યા. હમ્માદ મિર્ઝાએ પાકિસ્તાન સામે 27 અને આર્યન બિષ્ટે UAE સામે 24 રન બનાવ્યા હતા, જે એશિયા કપમાં ઓમાનના બે હાઈએસ્ટ સ્કોર છે.
શું બુમરાહને આરામ આપવામાં આવશે?
ઈંગ્લેન્ડમાં પાંચ ટેસ્ટ મેચની સિરીઝમાં ફક્ત ત્રણ મેચ રમનાર જસપ્રીત બુમરાહને આ મેચ માટે આરામ આપવામાં આવી શકે છે. જોકે, તેણે અહીં વધુ બોલિંગ નથી કરી, અને કોચ ગૌતમ ગંભીર વધુ પ્રયોગ નથી કરવામાં માનતા. તેથી, જો ટીમમાં કોઈ ફેરફાર થાય છે, તો બુમરાહની જગ્યાએ ફક્ત અર્શદીપ સિંહને જ તક મળી શકે છે.
પિચથી અજાણ
ભારતીય ટીમે તેની બંને મેચ દુબઈમાં રમી છે, અને આ ટુર્નામેન્ટમાં અબુ ધાબીમાં આ તેની એકમાત્ર મેચ છે. ટીમે મેચ પહેલા પિચ પણ નથી જોઈ. જો ઓમાન જેવી નબળી વિપક્ષી ટીમ ન હોત, તો ભારતીય ટીમ ગુરુવારે પ્રેક્ટિસ કરવા માટે ચોક્કસપણે ત્યાં ગઈ હોત.
એશિયા કપ માટે બંને ટીમો
ભારત: સૂર્યકુમાર યાદવ (કેપ્ટન), શુભમન ગિલ (વાઈસ કેપ્ટન), અભિષેક શર્મા, તિલક વર્મા, હાર્દિક પંડ્યા, શિવમ દુબે, અક્ષર પટેલ, જીતેશ શર્મા, જસપ્રીત બુમરાહ, વરુણ ચક્રવર્તી, અર્શદીપ સિંહ, કુલદીપ યાદવ, સંજુ સેમસન, હર્ષિત રાણા, રિંકુ સિંહ.
ઓમાન: જતિન્દર સિંહ (કેપ્ટન), હમ્માદ મિર્ઝા, વિનાયક શુક્લા, સુફિયાન યુસુફ, આશિષ ઓડેદરા, આમિર કલીમ, મોહમ્મદ નદીમ, સુફિયાન મહમૂદ, આર્યન બિશ્ત, કરણ સોનાવલે, ઝિક્રિયા ઈસ્લામ, હસનૈન શાહ, ફૈઝલ શાહ, મોહમ્મદ ઈમરાન, નદીમ ખાન, શકીલ અહેમદ અને સમય શ્રીવાસ્તવ.
