IND vs AUS / જસપ્રિત બુમરાહે ગાબામાં ખોલ્યો પંજો, આ મામલે કપિલ દેવથી આગળ નીકળ્યો

ભારતીય ટીમનો ફાસ્ટ બોલર જસપ્રિત બુમરાહ ઓસ્ટ્રેલિયાના પ્રવાસ પર સતત સારું પ્રદર્શન કરી રહ્યો છે, જેમાં તેણે ગાબા મેદાન પર રમાઈ રહેલી બોર્ડર-ગાવસ્કર ટ્રોફીની ત્રીજી મેચમાં 5 વિકેટ ઝડપી છે. પર્થ ટેસ્ટ મેચમાં, રોહિત શર્માની ગેરહાજરીમાં, બુમરાહે કેપ્ટનશિપની જવાબદારી લીધી અને શાનદાર બોલિંગ કરી અને ટીમ ઈન્ડિયાને જીત અપાવવામાં મહત્ત્વની ભૂમિકા ભજવી. આ સિરીઝમાં અત્યાર સુધી બુમરાહ એકમાત્ર એવો ભારતીય બોલર છે જેણે ઓસ્ટ્રેલિયન ટીમના બેટ્સમેનોમાં ડર પેદા કર્યો છે.

આ પણ વાંચો: IND vs AUS 3rd Test Day 2 : રિષભ પંતે ગાબામાં બનાવ્યો રેકોર્ડ, આ સિદ્ધી મેળવનારો બન્યો ત્રીજો ભારતીય વિકેટકીપર

બુમરાહે કપિલ દેવનો રેકોર્ડ તોડ્યો 

જસપ્રિત બુમરાહે ગાબા સ્ટેડિયમમાં મેચના બીજા દિવસે ઓસ્ટ્રેલિયન ટીમની પ્રથમ ઈનિંગમાં 5 વિકેટ ઝડપી હતી, આ સાથે તેણે ભૂતપૂર્વ ભારતીય કેપ્ટન કપિલ દેવનો મોટો રેકોર્ડ પણ તોડી નાખ્યો હતો. બુમરાહે સાઉથ આફ્રિકા, ઈંગ્લેન્ડ, ન્યુઝીલેન્ડ અને ઓસ્ટ્રેલિયા એટલે કે SENA દેશોમાં 8મી વખત ટેસ્ટ મેચની એક ઈનિંગમાં 5 વિકેટ લીધી છે. અગાઉ આ રેકોર્ડ કપિલ દેવના નામે હતો, જેમણે ટેસ્ટ ક્રિકેટમાં પોતાની કારકિર્દી દરમિયાન કુલ 7 વખત SENA દેશોમાં એક ઈનિંગમાં 5 વિકેટ ઝડપી હતી. એશિયન બોલર તરીકે, જસપ્રિત બુમરાહે ઈમરાન ખાનની બરાબરી કરી છે, તેણે પણ SENA દેશોમાં 8 વખત એક ઈનિંગમાં 5 વિકેટ લીધી હતી. આ યાદીમાં વસીમ અકરમનું નામ નંબર વન છે, જે 11 વખત આ કારનામું કરવામાં સફળ રહ્યો હતો.

SENA દેશોમાં ટેસ્ટની એક ઈનિંગમાં સૌથી વધુ વખત 5 વિકેટ લેનાર ભારતીય બોલરો

• જસપ્રિત બુમરાહ - 8 વખત
• કપિલ દેવ - 7 વખત
• ઝહીર ખાન - 6 વખત
• ભાગવત ચંદ્રશેખર - 6 વખત

સ્મિથ અને હેડની મહત્ત્વની વિકેટ મળી

એક સમયે ગાબા ટેસ્ટ મેચમાં ઓસ્ટ્રેલિયાની ટીમે 75ના સ્કોર સુધી પોતાની ત્રણ વિકેટ ગુમાવી દીધી હતી, ત્યારબાદ સ્ટીવ સ્મિથ અને ટ્રેવિસ હેડના બેટમાંથી શાનદાર સદીની ઈનિંગ્સ જોવા મળી હતી જેમાં ચોથી વિકેટ માટે બંને વચ્ચે 241 રનની મોટી પાર્ટનરશિપ જોવા મળી હતી. નવો બોલ મેળવ્યા પછી, બુમરાહે દિવસના છેલ્લા સેશનમાં પહેલા સ્મિથ, પછી માર્શ અને પછી હેડને પેવેલિયન મોકલીને ટીમ ઈન્ડિયાને કમબેક કરાવ્યું હતું.