IND vs AUS / બોલર કે બેટ્સમેન, એડિલેડમાં કોનો ચાલશે જાદુ? બીજી ODI પહેલા જાણો પિચ રિપોર્ટ
છેલ્લું અપડેટ : 21 Oct 2025
પર્થમાં ટીમ ઈન્ડિયા માટે એકપણ વસ્તુ બરાબર નહતી રહી. રોહિત શર્મા અને વિરાટ કોહલી તેમની કમબેક મેચમાં ખરાબ રીતે ફ્લોપ રહ્યા, જ્યારે શુભમન ગિલ અને શ્રેયસ અય્યર પણ સારું પ્રદર્શન કરવામાં નિષ્ફળ ગયા. ટીમના બોલર્સ પણ લયમાં નહતા, જેનો કાંગારૂ બેટ્સમેનોએ પૂરો ફાયદો ઉઠાવ્યો.
સિરીઝમાં 0-1થી પાછળ રહ્યા બાદ, ટીમ ઈન્ડિયા હવે એડિલેડમાં મજબૂત વાપસી કરવા માંગશે. આ મેદાન કિંગ કોહલીના મનપસંદ મેદાનોમાંનું એક રહ્યું છે, અને અહીં તેનો રેકોર્ડ પણ શાનદાર છે. બીજી તરફ, મિચેલ માર્શની આગેવાની હેઠળ કાંગારૂ ટીમ બીજી ODI જીતીને સિરીઝ જીતવાના ઈરાદા સાથે મેદાનમાં ઉતરશે.
એડિલેડની પિચ કેવી હશે?
એડિલેડ ઓસ્ટ્રેલિયાના એવા મેદાનોમાંથી એક છે જ્યાં બેટ્સમેનોને બેટિંગ કરવી ગમે છે. પિચમાં સારો બાઉન્સ હોય છે, જેના કારણે બોલ બેટ પર ખૂબ સારી રીતે આવી શકે છે. બેટ્સમેનોને બોલને બાઉન્ડ્રી સુધી પહોંચાડવા માટે વધુ સંઘર્ષ નથી કરવો પડતો. જોકે, શરૂઆતની ઓવર્સમાં પિચમાં ભેજ હોવાથી, ફાસ્ટ બોલર્સને પણ પિચમાંથી નોંધપાત્ર સહાય મળે છે. આનો અર્થ એ છે કે મેચમાં પહેલા બેટિંગ કરતી ટીમના બેટ્સમેનોએ શરૂઆતમાં સાવધાનીપૂર્વક રમવાની જરૂર છે.
આંકડા શું કહે છે?
એડિલેડમાં અત્યાર સુધીમાં કુલ 94 મેચ રમાઈ છે. આમાંથી 49 મેચ પહેલા બેટિંગ કરતી ટીમે જીતી છે, જ્યારે 43 મેચ ટાર્ગેટ ચેઝ કરતી ટીમે જીતી છે. અહીં પ્રથમ ઈનિંગનો એવરેજ સ્કોર 225 છે, જ્યારે બીજા ઈનિંગનો એવરેજ સ્કોર 197 છે.
ઓસ્ટ્રેલિયાએ આ મેદાન પર 369 રન બનાવ્યા છે, જે આ મેદાન પર સૌથી વધુ સ્કોર પણ છે. દરમિયાન, કાંગારૂ ટીમ ન્યુઝીલેન્ડ સામે માત્ર 70 રનમાં ઓલઆઉટ પણ થઈ ગઈ હતી, જે આ મેદાન પર સૌથી ઓછો સ્કોર છે. આ મેદાન પર સૌથી વધુ 303 રનનો ટાર્ગેટ ચેઝ કરવામાં આવ્યો છે.
