અભિષેક શર્મા અને સ્મૃતિ મંધાનાને ICC એ આપ્યું મોટું ઈનામ, આ ખેલાડીને બીજી વખત મળ્યું સન્માન
છેલ્લું અપડેટ : 16 Oct 2025
આંતરરાષ્ટ્રીય ક્રિકેટ પરિષદ (ICC) એ સપ્ટેમ્બર 2025 માટે ક્રિકેટર ઓફ ધ મન્થની જાહેરાત કરી છે. મેન્સ ક્રિકેટર ઓફ ધ મન્થ માટે ભારતના વિસ્ફોટક ઓપનર અભિષેક શર્મા, સ્ટાર સ્પિનર કુલદીપ યાદવ અને ઝિમ્બાબ્વેના બેટ્સમેન બ્રાયન બેનેટ વચ્ચે સ્પર્ધા હતી. અભિષેક શર્માએ બંને ખેલાડીઓને હરાવીને પ્રથમ વખત ICCનો આ એવોર્ડ જીત્યો છે. અભિષેક શર્મા ICC ક્રિકેટર ઓફ ધ મન્થ બનનાર 10મો ભારતીય ક્રિકેટર છે.
ભારતીય ટીમનો યુવા બેટ્સમેન અભિષેક શર્મા સપ્ટેમ્બરમાં પોતાની વિસ્ફોટક બેટિંગથી હેડલાઈન્સમાં આવ્યો હતો. તેણે ટીમ ઈન્ડિયાને એશિયા કપનું ટાઈટલ જીતાડવામાં મુખ્ય ભૂમિકા ભજવી હતી. એશિયા કપમાં, તેણે સાત T20 મેચોમાં કુલ 314 રન બનાવ્યા હતા, જેમાં ત્રણ અડધી સદીનો સમાવેશ થાય છે, જેના કારણે તેને 'પ્લેયર ઓફ ધ ટુર્નામેન્ટ' નો પણ એવોર્ડ મળ્યો હતો. તે હાલમાં વિશ્વનો નંબર 1 T20 બેટ્સમેન પણ છે.
અભિષેક શર્માએ એવોર્ડ જીત્યા બાદ કહ્યું, "ICC એવોર્ડ જીતવાનો અનુભવ ખૂબ જ સારો છે, અને મને ખુશી છે કે મને કેટલીક મહત્ત્વપૂર્ણ મેચો માટે આ એવોર્ડ મળ્યો છે. મને એવી ટીમનો ભાગ બનવાનો ગર્વ છે જે ખૂબ જ પડકારજનક પરિસ્થિતિઓમાં પણ જીતી શકે છે. હું ટીમ મેનેજમેન્ટનો તેમના માર્ગદર્શન માટે અને મારા બધા સાથી ખેલાડીઓનો તેમના સપોર્ટ માટે આભાર માનું છું. હું આ એવોર્ડ માટે મને પસંદ કરનાર પેનલનો પણ આભારી છું."
સ્મૃતિ મંધાનાએ ફરી બાજી મારી
બીજી બાજુ, ભારતની સ્ટાર બેટ્સમેન, સ્મૃતિ મંધાનાને ICC વિમેન્સ ક્રિકેટર ઓફ ધ મન્થ તરીકે પસંદ કરવામાં આવી છે. સ્મૃતિ મંધાનાએ ઓસ્ટ્રેલિયા સામેની હોમ ODI સિરીઝમાં શાનદાર પ્રદર્શન કર્યું હતું. આ મહિને, તેણે ચાર ODIમાં 308 રન બનાવ્યા હતા. ઓસ્ટ્રેલિયા સામેની ત્રણ મેચની સિરીઝમાં, તેણે 58, 117 અને 125 રન બનાવ્યા હતા. ખાસ કરીને, ત્રીજી ODIમાં, તેણે માત્ર 50 બોલમાં સદી ફટકારીને ભારતીય બેટ્સમેન દ્વારા સૌથી ઝડપી સદીનો રેકોર્ડ બનાવ્યો હતો.
આ પહેલા સ્મૃતિ મંધાનાએ જૂન 2024માં ICC પ્લેયર ઓફ ધ મન્થનો એવોર્ડ જીત્યો હતો. જ્યારે આ વખતે તેની ટક્કર પાકિસ્તાનની સિદરા અમીન અને સાઉથ આફ્રિકાની તાજમિન બ્રિટ્સનો પણ સમાવેશ થતો હતો. મંધાનાએ બંનેને હરાવીને આ એવોર્ડ જીત્યો હતો.
આ એવોર્ડ જીત્યા બાદ પોતાની ખુશી વ્યક્ત કરતા મંધાનાએ કહ્યું, "મને આ એવોર્ડ જીતીને ખૂબ આનંદ થયો છે, અને જ્યારે કોઈ ખેલાડીને આ રીતે પ્રોત્સાહિત કરવામાં આવે છે, ત્યારે તે ભવિષ્યમાં વધુ સારું પ્રદર્શન કરવાનો પ્રયાસ કરે છે."
